依然故我

最近聽到個同股市有關既笑話, 話說恆指由2萬點升至3萬2, 有個伙記在送外賣途中, 經過金魚缸, 抵受唔住「誘惑」, 入左去, 令送外賣遲左, 不過又賺左幾萬. 於是, 佢一不做二不休, 係佢老細未鏟佢同孖叉佢之前手起刀落, 炒左老細魷魚. (聽講香港因股市而令工作散慢, 服務態度變差既人越來越多, 因股市而辭職既人亦有不少.)

或者你會笑香港投資股票既人瘋癲, 居然quit左份工, 你會話佢地貪心, 話佢地賠了生命....但請你平心靜氣, 從佢地既立場睇, 當你每日都超時工作, 老細洗人唔洗本, 人工又"un"(冇人會覺得多), D顧客要求又變態, 好相與既, 一開口就話你:「今時今日咁既服務態度係唔得」(咁你想點? 咁叻咪叫劉德華來做lor), 唔好相與既就話:「你信唔信我打去明報」(玩野下, 揾餐食姐, 洗唔洗咁絕呀?) 咁既工唔知你會唔會enjoy? 「捱就捱啦! 鬼叫你窮呀? 頂硬上呀!」

夜闌人靜, 偷偷咁顧影自憐, 可能你會唱呢首歌(調用<<尋著你的那天>>: 「傳說人生只不過是個夢, 無方向, 無意義, 沒內容, 貧窮或富足結局多方面不同, 但偏偏我仍然在困苦中.......直到一天買下紅籌或國企, 徬徨空虛悄然消失遠飛, 國企是神奇妙賜畢生的福氣, 如黑夜盡頭重現晨曦.」你話佢crazy? 點crazy? 佢只不過買左隻股仔, 隻股不斷咁升, 唔通咁就犯罪就crazy? 點解唔可以話係神既恩典呀? 另一方面, 如果有人, 就算賺5/6萬月薪, 而自尊不斷被踐踏, 但股市一日既升幅就有等如你既月薪, 季薪, 甚至年薪, 令你有quit既衝動甚至行動, 唔通咁都唔正常? 咁「自甘墮落」繼續向「現實」低頭, 而且堅持唔投資股票果班, 就唔crazy? 反而唔貪心, 係屬靈同愛主? 呢D乜野道理?

我為教會既牧者/領袖 祈禱, 盼望佢地明白活在大升市既小市民/小投資者既心, 而唔係左一句貪心左一句crazy, 除左增加不必要既罪疚感, 你幫唔到佢揾到出路. 神係果位陪你走過高低起跌既主, 而唔係逼你低不成高不就既變態主子, 你要成長唔係有錢賺唔去賺, 亦唔係蝕到死就賭氣瞓教, 而係學會係乜野情况之下都能「保守你既心」又以神為主.

這令我想起聖經裡面既一個人物 - 未底改. 當佢mout係宮門口(可能佢係守門侍衛)比哈曼玩「殘酷一叮」果陣, 佢冇離開神; 當佢被萬人擁戴之後, 佢依然故我, 繼續返回岡位盡忠; 當佢最後一人之下萬人之上, 位極人臣果陣, 佢用盡佢既職權, 為百姓求好處, 呢個就係香港/內地投資者學習既對象.