波係圓

每逢奧運/世界盃, 同事都會聚在cafe度一齊睇, 好熱鬧. 今次歐洲盃亦唔例外. 幸而時差配合得天衣無縫, 2:45pm 飯氣攻心過後開場, 太好!! 我個人工作比較認真, 唔想佔小便宜. 通常係臨完下半場15分鐘先落cafe睇.

最刺激莫過於德國對土耳其, 土耳其22分入一球, 德國跟手26分又入一粒. 估唔到土耳其咁勁, 上半場壓住德國黎打. 下半場三球都因為衛星唔work, 淨睇旁白, 真冇癮. 但正因為睇唔到, 又更加緊張剌激. 78分德國入, 以為佢惦, 點知86分土耳其又入一粒, 一定要加時, 點知89分德國入, 攪惦. 無論如何, 土耳其証明自己, 入semi final唔係符碌. 乜野叫「雖敗猶榮」, 經過今次, 我又領略到多一點.

最心涼要數義大利對西班牙, 義大利回家. 睇波好奇怪, 義大利一味玩穩守突擊, work, 但好悶lor, 所以唔鐘意佢地. 就正如網球比賽, 一味A屎球好勁, 一球起兩球止好冇睇頭lor. 猜下波過癮D ma. 睇波又唔係賭, 嬴輸唔關我事, 最緊要精釆. 唔知點解, 一班人睇波, 那怕三唔識七, 都比小貓三四隻好睇D. 最正係一住睇一住食薯片/花生/紫菜同飲汽水. 點解?

決賽邊個會贏真係唔知, 但知道左就唔好睇. 做人都好類似, 考試/搵工/搵男女朋/投資咁, 我地總愛知結果, 為左好結果, 我地會全力以赴, 但一但已成定局又少左好多過程中既excitement, 真係矛盾.

裝修

浴缸用左廿幾年, 開始生銹, 如果浴缸穿左就會漏水, 漏水就會好煩...

去管理處問, 仲煩, 又話要搵個有牌既來整, 又話全楝大廈要關水掣(咁激?!), 又話要換番同一個牌子既浴缸...總之好煩.

終於搵到個 C傅, 嘩! 貴到, 有牌貴近成倍, 真係冇陰功. 結果, 佢咪又係外判比個冇牌既幫佢做, anyway, 叫做整番好 lor. 浴缸都咁costly, 裝修成間屋唔知點算, 買個間會唔會仲化算, 成為呢次裝修後最新最煩既問題

給「最開心的人」之點唱

新聞美軍今年自殺率創26年新高. 長期在伊拉克駐守對自殺式突襲既恐懼, 冇左親友在身邊扶持慰問, 以及與所熟識社群社會脫節所產生既心理影響, 都令軍人自殺率除左比普通人高, 亦越來越高.

據統計, 地震後半年內自殺率係4.8%, 一年內係6%, 比軍人自殺率更高, 比普通人高好多好多, 假如以四川受災人數300萬人計算, 死亡人數會係死難者7萬多加失縱者2萬多以外, 再添18萬人, 數字係crazy, 再退一步講, 天水圍每年幾單自殺率已經令全港市民不安, 美軍一年死百幾人, 就有一半美國人恨死George Bush. 假如內地一個省一年內有18萬同胞自殺對全中國影響有幾大? 所以中國政府同越來越多人關注災後心靈同家園重建工作. 至於親身去唔去災區, 則有兩套意見. 一部份人認為應該去, 盡分力+體驗民間疾苦, 另一部份人怕越幫越忙, 選擇遲D去.

心靈重建重要性有好多人提到, 所以Bilibala亦唔多講(下一篇先), 反而想先講講救援人員, 解放軍, 義工etc etc一眾幫手既心靈重建.

埋在瓦礫之下生存,要堅毅鬥志,所以應該稱他們為「毅 存者」而非倖存者.劫後餘生情況就有D唔同,越堅強不將軟弱顯於人前者(即死撐),越容易有心理病甚至自殺.災民喊出來有人安慰,人喊我喊,冇乜示弱 feel.但救災人喊/burn out,我地都知唔需要死撐,但果種環境同氣氛假如「唔容許」你倒下,要你死撐,唔谷死都屈到病.
據報去完振災既義工,歸家後同家人/朋友/同事相處出現好多問題,變得沉默不語同容易暴燥.佢地安慰人之後都要被安慰.所以,我地除在為受災同胞重建心靈 祈禱,亦要為救災同胞釋放及重建心靈祈禱.這令我想到林一峰一首歌<<給最開心的人>>.歌詞似乎講安慰失戀者,但亦7-8成 apply到to天災人禍中既安慰者.

http://www.youtube.com/watch?v=pYGXjN1ikXw&feature=related

窮途末路之時　我急需的是你聲音 每當天色昏沉　你就像太陽為我暖身 對於朋友　你的細心　已足夠花去半數時間 尚有精神娛樂大家　從沒離群
情路段段不幸　你用辦法沒有上心 慣於利用經驗　叫身邊的人勇敢
對於情感　你很有心 卻未曾聽過你埋怨 為了打救旁人幸福　沒時間傷心
＊感激你　最開心的人 陪伴著我每個無眠夜深　用你笑聲　修補我不幸　過濾失落　重獲信心　只不過　誰為你認真　習慣了悲哀中救傷的你　沒法放開　開心的責任　抱著心事無人問　壯烈犧牲　每當落淚之前　你可想找誰聽你說話
每當熱鬧之後　你最想誰為你留下　記得有天　你失了蹤　我頓時驚覺我未能夠　像你一半有耐性為旁人操心＊
多得你　最開心的人陪伴著我 每個難熬夜深用你笑聲　粉飾了天地
告別失望　無懼氣溫 只不過　誰為你著緊習慣了悲哀中救傷的你
沒法放開　開心的責任抱著心事　無人問　壯烈犧牲
若你想哭　即管放心吧　我不會過問 你可盡情在我肩膊哭泣　做個凡人

這首歌或者亦apply to教會既執事/團長/組長.搏命做故然勇氣可嘉,但做到有氣冇掟頭,死撐到burn out又算唔算越幫越忙呢?點樣避免burn out?
主耶穌在世,傳道3年,同樣忙過隻狗,日日比病人/鬼附的煩住,宗教領袖經常來比蕉皮佢踩,仲要抽時間將所言所行講解比一班「朱錦春」門生聽(某程度上即係我地).佢點handle呢D stress同因醫治/改變身心靈而產生既壓力呢?
讀4福音唔難發覺耶穌好鐘意亦好爭取時間祈禱,以祈禱同父神傾計/交託一切去將每日既勞苦舒緩.另外佢肯同門徒分享自己既感受,佢既笑與哭,亦三次分享自 己要釘＋架,在晚餐/客西馬尼園分享自己對死亡既睇法同感受,甚至同賣佢既猶大分享.身為神既兒子,至高無上,至少旁人眼中法力無邊,又係多人既老師/夫 子,向最明白佢既父神plus唔係咁明白佢既門徒分享自己既需要同軟弱,睇落一D都唔易,但正是relax同recharge既有效方法.

練習

兩星期前公司有人請我去參加個Golf比賽, 去Angus Glen既 golf court. 由於我係beginner之中既beginner, 於是臨時老細, 同D同事就同我去driving range度練波. 臨時老細係 golf lover, 12歲開始就日日打, 佢發起話一齊去練波仲開心過我.

係driving range度, 臨時老細釋心教導我點企, 點喳桿, 點 swing, 個頭同隻眼望邊...After一輪 practice, 我居然打到150-175 yard, 太奇妙!!

正式比賽果日, 又去practice果一陣, 第一個洞打到+2, 算唔錯. 但第二個洞開始比人吹, 就越打越差. 我去Angus Glen community center團契多, 估唔到隔離個 golf court咁靚, 係草地, 湖邊, 林中走走, 特別心曠神怡. 聽講呢個亦係Canada Open既場地.

租golf set要$40+tax, 唔貴, 但如果自備golf set, 打幾次就 breakeven. 於是上網去SportChek, Golf Town shop around, 即刻買番, 感覺抵D. 尋日 US Open final, 班同事去晒 cafe睇第18洞, 我不停問老細同另一位同事賽例. 見到佢地咁緊張. 咁唔到一樣似乎非常懶洋洋既運動, 都可以咁剌激.

物競天擇

小學讀書, 老師教我地大自然係一個弱肉強食, 物競天擇. 獅子同土狼食山羊同梅花鹿, 山羊同梅花鹿食青草, 青草飲天露....好一條食物鏈. 時光飛逝, 讀大學果陣, 又聽D C哥 C姐話:「出到社會做野要小心, 因為弱肉強食, 就算你唔害人, 亦要小心比人蝦.」似乎由細到大, 所有人都認為「弱肉強食, 物競天擇」先係生存既必然之道....

上月四川地震, 卻比我認識到另一套人生哲學 - 原來守望相助, 係會對身邊既人, 以至整個社會同自身得益, 甚至令多人得救, 我又見到好多人犧牲自己去拯救別人, 感人之外, 又道出左呢個世界另一套處事方式, 又或者講, 呢個世界既出路 - 互助互愛同犧牲既愛.

香港人每次振災都好熱心, 出錢多, 出力亦唔少. 諷剌係: 香港人又正正係世上最貧富不均, 最弱肉強食既大都市. 點解我地可以對遠方受災同胞伸出血濃於水既愛心關懷, 卻同時對身邊既同事同學鄰居同弱勢社群不聞不問甚至落井下石? 振災出自真心, 我從不會也不應懷疑的. 但辦工室政治同M型社會現象又一點不假. 唔通「弱肉強食, 物競天擇」才是常理, 而「互助互愛同犧牲既愛」只適用於非常時期呢?

聖經裡面講乜野人係有福? 係清心定係爭名奪利? 係使人和睦定係勾心鬥角? 係宣揚公義定係千「謊」百計? 究竟邊套最work, 而我問心果句, buy邊套? 行邊套? 假如現實社會中, 我地愛多一點, 情願犧牲/禮讓多一點, 世界會比依家更可愛. 既然我經歷左主耶穌犧牲既愛, 以及教會裡(大部份正常情況下)既互助互愛, 我就有本份同本錢, 係冇地震冇水災, 平平無奇既日子裡, 令世界多一點愛, 少一D恨/愁.

火熱動感 walawala

天氣忽然間轉熱, 係屋企開行冷氣, 都頂唔順. 試左多種方法仍然無法解暑: 飲凍果汁, 飲果成樽都唔惦; 除衫, 除到除無可除既地步, 唔惦; 游水, 游果陣ok, 游完上水仲熱, 仲標汗 tim.

夜晚, 訓教都訓唔著, 係張床上面不停咁「典」, 「典」到兩三點都訓唔到. 一向習慣開大冷氣(怕熱), 開DD窗(怕焗), 開風扇(夠空氣流通), 大張羽絨被再加小背心(夠暖又小束縛).

古人話「高床, 暖枕」係幸福, 但Billy呢兩樣之外再加多兩樣「簿衣裳, 冷氣房」. 本來就係一個極不環保既訓教生活方式, 今日都算抵死(如果唔用「報應」一詞, 不過「抵死」似乎仲衰). 坐電梯遇到同樓住客, 佢問我, 我個冷氣係咪好熱. 一講之下先知道原來個個人都覺得個冷氣好唔惦.

熱左成個幾星期, 三日前大廈先通知個冷氣壞左, 已經修理好. 終於有教好訓, 感謝神, 不過, 天氣又轉冷了. 彷彿係神對孩子既提醒(環保)之後, 又跟孩子來個有關天氣既幽默.

小休復出

呢個幾禮拜唔知點解好疲累, 雖然冇乜點做野, 但冇乜精神, 亦冇乜 update個blog.