The Day before Tomorrow 明天過後

今早老佛爺(媽咪)要去太醫院玩照胃和照腸, 趁新年把把平安脈, 好讓老佛爺在牛年繼續母儀天下. 玩照胃和照腸事先24小時不能進食, 像去飢饉30一般.可憐老佛爺平時大魚大肉, 像 BB仔一樣要每兩小時食一餐, 要她忽然節食一整天, 如何受得了.

所以星期四就向老佛爺陳明偷食的利害關係, 節食受苦一天, 偷食就要再預約太醫院, 再受苦多一天.一個死囚行刑之前亦有隻雞脾食, 但老佛爺在「行刑」之前卻連咸豆都冇得食. 看到老佛爺百般飢餓的苦況, 於心何忍? 亦唯有全程旁觀, 鼓勵她堅持到底.

我們很識趣, 在這24小時內, 就算鮑參翅肚, 臉上也扮作愁眉苦臉的死樣, 食飯也躲埋一角, 免得老佛爺觸景生情.希望她明白我和小得子(Daddy)「狠心愛我(她)」的這份苦心啦!小得對老佛爺服事周到, 車出車入, 又預備稀粥和煎三文魚, 保証老佛爺用膳不傷脾胃.

之後, 老佛爺食了十碗粥就開心番, 恢復體力後, 就繼續煲神探伽利略和讀 Bilibala 個 blog. Billy 成功吸引到老佛爺睇 Bilibala blog, Billy寫 blog就不會被殺頭, 哈哈!

好難得老佛爺的「明天」已經玩完照胃和照腸, 那么, Billy的明天又如何呢?Billy明天去Toronto 400公里外的 North Bay, 和當地華人留學生一齊春節聯歡.09年 Billy終於坐正做 North Bay co-ordinator, 幾威(其實做阿四), 再重申 Billy 分析力強, 但 organize & admin屎到爆.

在教會宣傳叫人去 North Bay, 叫人攪 program, 分車, 頭都大, 又遇著公司 year end同美國各大公司齊齊出業績, 計埋自己公司 1月已經分析了 9間公司的業績和前境. North Bay天氣比 Toronto 冷, 晨咁早 7-8 點 上 highway有積雪, 還要踩百一二, 飛足四小時才到達. 希望旅途平安. 至於天氣, 出席人數 etc etc, 全是不確定.好像當初得 4-5個人去, 結果有34人出 8架車去, results好過預期, 同樣是不確定. 無所謂, 多人少人, 春節聯歡都開心.

請為 Billy's the Day after Tomorrow ;為我們和他們打成一片;為我們將耶穌介紹給我們 .

哈哈, 日忙夜忙, 去 North Bay當渡假, 換過環境体息下也好.

當老牛遇上鼠 - 流年運程

牛年過了幾日, 有沒有食肥牛火窩, 鋸牛扒, 食餐燈影牛肉剌身...實行以形補形, 以牛旺牛. 中醫說食牛毒, 熱底的你可以拍番粒牛黃解毒片下一下火. 若你是寒底也可以上 you tube, 欣賞「牛黃」發的求簽片段, 無論你信與不信, 保証的無名火起, 滿有火熱動感.

我們這些可憐的香港人, 居然養了一班成事不多, 連求簽也不成的高官(Come on, 你一係唔求, 你求, 造馬都造支上簽出來啦). 「眼前鬼卒皆為妖....」 真令信與不信的人洩氣, 和亞視管理層的12日風波不相伯仲, 兩個字 - 鬧劇!

試問這樣如何管理好香港? 感恩還有阿爺.

教完大家如何用牛黃解毒片清熱, 或者靠「牛黃」發來出火. 新年另一節目當然是讀運程書. 等等! 基督徒不是不讀運程書? 哈哈! 誰說?
聖經說不去占卜算命, 但卻記載無數未卜先知的事蹟(運程書是未卜先知的一種.) 同時又說除了神, 以及神啟示的人, 沒有人知道未來(但人可預測未來, 準確與否是另一回事.)

Billy對牛年運程完全無興趣(因為沒有人知道未來), 但回看鼠年運程卻非常有趣. 當老牛遇上鼠會是怎樣? 哈哈! 這樣讀運程書就不違反聖經, 因為聖經話未卜先知的話是需要作事後驗証.

Billy訂閱兩本雜誌: Economist 和信報月刊.
這兩日打開08年2月的信報月刊看鼠年運程(經濟月刊也有運程送), 一邊看一邊笑. 因為實在太好笑. 今期09年1月號, 同一班居士又寫牛年運程, 真佩服他們的創意和厚顏的本事.

你生活 fail左, 人家就不信耶穌. 但運程講錯左一半(一半已經好叻), 人家下年依然賣過滿堂紅. 是因為香港太多人迷信嗎?

未必. 這就是做 sales, 做教書, 去傳道, 值得向人家學的地方
說實話, 運程書一定寫得精彩, 易明, 可讀性高, 印刷精美, 圖文並茂, 而且內容頭頭頭是道得來講完等於冇講, 才能夠年年賣到幾百萬幾千萬$$, 成為一盤商機無限的生意和作自己生招牌又可賣錢的廣告.
當中結集的各樣智慧, 技術和心思, 難道不值得我們學習么?

有人話: 風水可能是古代的室內設計, 掌/相可能是古代的統計學.
Billy 相信, 運程可能是古代的天文/氣像學. 通勝的春牛圖對古代農耕就甚有貢獻, 而且非常準. 對以農立國的當年, 春牛圖就是每年每個人的運程這恐怕也不為過份, 也不是迷信. (君不見鼠年的農夫都因糧油價格發財, 連自稱農夫為歌手, 俾 00贈兩句亦風生水起, 可見所有農夫都富甲天下, 運程多準.)
但時至今日, 在農業不是主流的城市, 以農業角度類推到各行各業, 它們有著獨特的危與機, 和行業興旺周期, 單憑 5行, 24節氣, 天干地支60甲子, 8x8 64卦, 386爻 etc etc能否助人趨吉避凶?
你估計數, 像 +, -, x, /, 可以類推? 神探伽利略也要每個 case 各種理據, 再寫條微積分啦! (not +, -, x, /, 而是 x, y, z).

Sorry, Billy不是要踩低某行業. 但你食果行飯ok, 唔好撈過界嘛!
你用運程預測一下天氣, 預測一下今年豬牛羊, 冬瓜, 傻瓜的價格好.
預測經濟? Come on, 你如果得, 我公司點? 我點? 有誰還還我和我公司的 products & services? 我到時咪食屎? 咁我運程如何?

大榮華五味雞

細個媽咪帶我坐小巴去元朗的什么法寺(sorry, 真不知道), 像去廣州似的遙遠, 坐在媽咪懷中呼呼入睡, 坐到腰骨都酸還未到. 所以每次去到都會喊到收不了聲. 媽咪怕我喊, 認為我「與佛無緣」和那間法寺不夠好什么的, 久而久之就不再去.
有那個三, 四歲的小朋友可以忍受個多兩小時車程, 不是去遊樂場, 也不是去波波池, 而是去聽經, 拜佛, 祈福, 食齋? (假如去教會大人崇拜, 立法會, 情況相信一樣).

05年回港, Daddy話帶我入元朗食飯. 聽到又勾起那段童年陰影.
又坐個半鐘做亡命之徒(坐小巴)同做齋公? No way!!

感謝神, 西鐵落成之後, 由葵涌去元朗不用20分鐘. 快到我難以相信.
也不是去做齋公, 而是去一間叫大榮華的酒家食豉油雞, 但它叫五味雞.
(它的老細就是日日有食神的肥仔滔, 那日也見到他)

這次以後, 幾乎每次入去元朗都會去探下肥仔滔(間酒家).

入到去沒有侍應在門口派籌, 要回復十多年前未移民前去茶樓飲茶的日子, 左顧右盼, 站在別人身後等位, 等得到, 等不到, 多少是眼光和運數.
(當時應該未禁煙)遇著那些食客, 吞雲吐霧, 一把把煙炮向我攻過來. 而我就像個活靶, 任噴, 又像空城計裡面, 點一縷青煙的豬腳亮背後的那個書童在罰企.
為了食餐好, 多辛苦也值得. 更何況, 十多年未認真試過, 一次半次, 都幾有趣.

圖中那綠碗用來沖杯沖碟. 在加拿大去飲茶, 見到人一埋位用茶沖杯沖碟沖筷子就知道不是本地華橋. 沖杯沖碟沖筷子對我來說, 太煩, 還不如大菌食細菌

一隻五味雞, 當時才 HK$48, 叫第二隻反而要 HK$68.
值得留意是: 它只有蔥蓉(而且是大粒蔥), 沒有薑, 而且伙記竟然未卜先知, 來兩碟蔥蓉. 一定有太多人叫完再叫, 他索性上多碟.

大榮華用碗上而不是碟上, 更加原汁原味, 但賣相打了折扣.
另一個在味道上打了嚴重折扣的是它的擺放. 將雞脾放面, 將雞胸放底. 給西人食或者適合, 給華人食, 多喜歡食脾, 食完脾誰還來食雞胸?
而我就是一個喜歡食脾遠超過食雞胸的人.

說也奇怪, 食第一舊入口, 沒有任何特別感覺:「豉油雞, ok, 唔錯.」但至少, 我沒有伙頭智多星裡味王那種興奮到變身的怪叫:「好味, 好味, 真係好好味呀呀呀呀呀!」
食第二舊:「依, 真係唔錯.」接著第三, 第四, 第五, 第 n 舊.....一住食到清碟.
兩個人( or 加埋老佛爺三個), 也會叫其他點心, 居然食清碟.

正常情況, 人會因為飽肚, 失去第一舊入口的新鮮感/驚喜, 又或者菜式由熱變冷, 而越食越打折扣, 至少, 不夠第一舊好味(除了薯片, 某些吃不飽的口果).
這五味雞卻是越食越好, 即使是先食脾而後食胸, 真是奇怪.

沒有先聲奪人, 剎那間的味覺振奮;
卻是細水長流, 綿綿無盡(直到飽為止)的地道飲食享受;
是這五味雞最特別之處.

所以, Billy concluded這是一生食過, 最好味而且好味最能持久的雞.
也不知加價沒有, 下次回港又要試試.

神也籍著這五味雞, 醫治了我對元朗的部段童年陰影(真誇).
雞呀! 雞呀! Thank You 你呀!!

恭喜發財! 恭喜發財? 恭喜發財:)

"Come here fat boy!"(恭喜發財的諧音)是今日一西人同事對我講的恭賀說話.至於「恭喜發財」是細個, 每逢過年過節年常掛在口邊的一句話.「利是逗來」則是骨子裡所想所求的願望.恭賀說話, 要講得人人都鐘意聽才算皆大歡喜. 加上頭大大, 面圓圓, 人人見到都話我又乖又得意, 就更加多 D分.

見到(外)祖父母就祝佢地身體健康;
見到舅夫/姑丈就祝佢地發財, 賺多 D;
見到姨媽/姑姐就祝佢地青春良駐;
見到表哥表姐就祝佢地學業進步;
見到表弟表妹, who care
細細個就識得見乜人就講乜話.

有些人喜歡在新年說風涼話, 說什么「恭喜發財其實不設實際, 講左又唔會真的發達」云云, 說起來頭頭是道, 其實說這些風涼話的人才是最不設實際和無知.照這說法, 唱什么「恭祝你生日跌穿過頭....」這樣的歌, 也是無傷大雅, 反正講左又唔會真的跌穿過頭 (細個同學仔經常唱的「流行金曲」).

恭賀說話能否成真跟本不重要, 最重要是人人都鐘意聽, 令到大家開開心心共聚一堂, 皆大歡喜嘛!! 當然, 派利是不及收到利是咁開心, 但有利是可派, 自然想聽番 D後輩講句恭賀說話 happy下, come on, 識做 la. 開心就得.攪串個 party, 篤爆個開心氣氛, 不是最不設實際和無知是什么?

新聞講, 有些人排隊上頭柱香, 拜許願樹, 亦有不少人笑這是迷信.這回, Billy 不否定迷信的成份(不管如何, 年卅晚下午3點開始排上頭柱香, 其誠心令我佩服和敬重).

當人去廟宇爭上頭柱香變成 on line 人人都是上頭柱香, 當人將願望拋上許願樹變成拋上個木架,即使上頭柱香, 拜許願樹本身真的靈驗, on line 和木架的靈驗程度也值得懷疑.有趣是: 電視機面前還可見到無數善男信女, 扶老攜幼的去 on line 上香, on line 解簽, 和拋 D 願望s上個木架.

於是, Billy 就開始胡塗: 是這世上有太多人迷信? (世上有如此竟然多人迷信 online和木架都work? Billy接受唔到.)我認為有一大半人是將它當成 happy family day, 或者求個意頭, 像「恭喜發財」一樣.

假如是 family day或者簡單求個心安, 我相信過程本身是 enjoy, 有趣和滿足. (我細個都好鐘意去廟宇買風車玩.

如果盼望求告神明而因此發達, 得福, 得到真正平安, 也許選擇正確和可靠的神明比選擇股票, 選擇前程更重要.Billy當然說選擇信主耶穌基督最好, 唔洗逼, 唔洗拋, on line也不用, 隨時隨地也可以祈求, 幾開心.

Anyway, 無論你信乜, 名乜住, 係邊一得, 希望你新年快樂, 身體健康, 和家人和氣生財, 團團圓圓. (今年唔講財源滾滾來, 費時人誤會你咒佢裁員滾滾來.)

窗外

說會計是一個枯燥乏味的厭惡性行業相信無人反對.
更何況在加班, 超時工作 year end的日子?

被一群如烏蠅一般的核數屍嬲來嬲去, 嬲爆爆的滋擾, 為求嬲死我同煩死我.
經常覺得這種在 office 「鐵窗」下的生涯, 有如坐監一樣無聊;
又像一部大機器中的一粒螺絲, 好聽 D, 冇左你, 部機器可能唔 work;
唔好聽講句, 冇左你, 要換另一粒螺絲, 哈哈, 有幾難?

每次埋完數, D 精算屍和投屍部就話要改數, 乜都改晒, 但 deadline唔改得, Oh!! No!!

今日, 同樣的事情又發生, 已經是10日內第 7次, 誰說會計屍是一個枯燥無味的厭惡性行業? (你自己 lor) 日日改數, 而且鑊鑊新鮮, 這份工作, 可說是你要幾激, 就有幾激 !! 係激氣個「激」!

以前份工, 做到心力交瘁, 比人催到死去活來, 每當望出窗外, 就會立時間有種心曠神怡的感覺.
抬頭是藍天白雲, 遙望是車水馬龍的 highway, highway後面是一楝楝民房和商廈, 再極目觀看, 可以見到 CN Tower 和 Lake Ontario 的湖濱區.
景色多美, 多震撼!

唯一美中不足是低頭望到稅務局那些芝麻綠豆官的泊車處.
他們居然得閒到每日每兩三個鐘就三五成群的走出去煲煙, 還互換車位(因為迫超過三個鐘要被炒牌), 身為納稅人, 見到這班狗官的所作所為, 簡直令人髮指.
作為一個要加班的打工仔, 見到那些食皇家飯的人這樣輕鬆舍意, 自己卻被關在 office中有如食皇家飯一般, 心情特別激動.

心裡面不知道立過多少志, 祈過多少禱:

有朝一日, 我可以食皇家飯, 打政府工,
朝九晚五, 遲到早退, 人工又高福利又好,
實在太好 !!

通常當時的老細/同事見我望出窗外呆呆出神, 就會講:

Billy, 發完夢未呀? get back to work !! 哈哈哈哈!! 哈哈哈哈!!

現在這份工, 望出窗外只見到對面的一楝住宅, 此外什么也看不見, 還要飽受兩大武林高手東邪和西毒兩面夾攻之苦, i mean 陽光東斜西斜.
經常希望住宅露台會有個女孩看過來, 最好是個姿色份子, 就算不看過來, 在露台曬下日光浴也是不錯的選擇, 東斜, 西斜, 追求健康膚色嘛!

但望穿秋水的等了幾年, 對面的女孩也沒有看過來. 卻招惹了老細, 兩隻馬仔, 和核數屍這些"女孩"每天每時每刻的看過來.

Sorry, Billy「這裡的表演不精彩, 請繼續假裝不理不睬.」

奉旨蛇王

加班加到連老佛爺(媽咪)或公司老細問起「今日星期幾?」 一時間也答不上來. 真的做到有點頭暈腦脹. 但雖然加班加到冇日冇夜, 但Obama今日就職, 還是知道, 亦沒有可能不知道.
早在兩星期前, 就有同事話要告假留在家中睇Obama.

Billy:「你放假, 咁個 report點?」
同事:「我會之前做起比你.」
Billy:「咁如果要改數點?」(一定要改數, 冇走雞)
同事:「咁咪放完假比你.」(語氣開始沉重, 聲音開始嘹亮)
Billy:「我唔係你老闆(我真係....你老闆), 亦唔係逼你, 只係想 make sure.」
(英文對話, 再翻譯成攪笑版廣來話)

記得奧運開幕禮, 8月8, 也是忙 quarter end之時, Billy 也是如此有勇氣地向老細申請告假 (參One World One Dream), 所以那位同事這么硬野, 其實我都好佩服. 能夠不顧一切地做自己想做的事 (say 告假) 據理力爭:「我係咁, 你吹呀? 」我有時都有一時半刻衝動, 好想這樣跟老細, 同事, 老佛爺, 教會 D牧者, 弟兄姊妹, 甚至乎天父講 . 也不知是我這個人太細膽, 還是太會為人設想, 就算 say no都不會這么串.

查實我都好想在家中睇美國總統就職. 是 Obama, McCain, 還是 Bush, 其實有什么所謂? 總之令我有籍口告假就夠 .

不過, 今日, 我還是如常上班, 其實計落都有著數.
因 為今日上午, 人人都像轉了 holiday mode, holiday mood湧現在全間公司, 在cafe看電視的同事堆得滿滿, 一見 Obama 出來, 就有人興奮到拍爛手掌, 跳來跳去, 像觀賞世界盃見有入球那種心情, 卻未見有人敢像輸波咁大叫:「車」

就是在 office的同事, 一個個都像奉旨蛇王似的上網收看 on live Obama 就職演講. 我忍唔住拿相機出來拍他們. 他們成班呆左咁望著我, 我唯有講個笑:「放心, 我唔會 send D相比 HR同你地老細.」令大家都哈哈大笑. 哈哈大笑即係冇事, 一於繼續影.
可憐 Obama 這個出名口才了得之人, 在網上斷斷續續的情況下慘被變成翻版胡嵐, 不停食螺絲, 真可憐! 靠 on live 上網來參選, 就輸硬.
Obama又如何? 口才了得又如何?
我要你食螺絲就食螺絲, 哈哈! 哈哈! 鬼叫你 online?
叫你唔好用 blackberry, 又唔聽, 依家食螺絲(有乜關係呀? 打橫來講)

不 知 Washington D.C. 的天氣如何, 那真是人潮湧湧, 電視機主播說有 4-5百萬人. 企足幾個鐘也未變雪條, 這才叫真正的熱心同熱情如火, 急尿又點算. Billy不是刻意講核凸, 這是現實需要嘛! 當年 Billy去日本愛知博覽會, 就是因為急尿的問題, 放棄在打了 5個蛇餅的高科技展館外守侯, 而決定周遊列國(展館), 我到依家亦為當年這個瀟灑的決定感到自豪和安慰.

Bush下台, Obama 上台, 是否代表"明天會更好"?
據統計, Obama 在整個競選總統的過程, 所有演講(包括今日)總共 450次用了 "hope"這個字, 當人失去希望, 就會失去爭扎求存的動力. 四川地震如是, 也許金融風暴也如是. Obama 能否帶我們看見明天的太陽?

看 到那裡美國人民企足幾個鐘而熱情不減, 是否代表"明天會更好", 我不知道, 但我更想問:「假如失業率不斷上升, 舊的$350B TRAP用光, 新的$800B也用光, 而經濟仍然是回天乏術.」假如有這樣的「明天」, 那么, 「明天你(美國人民)是否依然愛我 (Obama)」?

盡力!! 希望Obama, 希望美國人民, 希望地球村, 繼續有 hope, 繼續去 change.
要 change 人先 change 自己, 或者是美國人民和我們這班地球村的居民所要學習.

由:

"being with or go against America"
or
「順我定逆我? 望乜野望? 信唔信我捉拿你? 拿!」

(by Bush, sorry, 他那不怒自威的尊容, 真令我有被捉被「拿」的感覺)

改變成:

"we will extend our hand if you are willing to unclench your fist"
or
「你只要肯鬆開拳頭, 我地可以手拉手」
(by Obama, 01/20/09)

我地一齊為 hope, 去改變! 為明天, 去祈禱!
(祈禱都可以緊握拳頭架喎! )

有關 Bush過去 8年和 Obama 的政綱, 可參 美國大選 這10/26/08分享.

忙了, 忘不了

每年 year end都會忙個不亦樂乎, 今年亦自然不例如.
這個星期, 晚晚加班加到 8-9點, 回家已經10-11點, 連老佛爺(媽咪)都教教豬.

加班沒有加班費是當然, 今年仲沒有加薪, 花紅又凍過水, 公司業績樣衰到爆, 加班亦特別提不起勁.
Deadline每季的提前, report 每季的增多, 人手又不見得加多, 唯有安慰自己 - 天下加班不獨你一人, 有得撈總好過冇得撈.

在凌亂的工作間撥出一個空間來食晚飯, 可說是全日裡面最「安祥」和輕鬆的時刻.
雖然老細和同事s還是有意無意, 間歇性充當「勾魂使者」來催命, 令到我連餐安樂茶飯也食不到, 但有什么法子? 唯有變身成超級勾魂使者, 來個以牙還牙, 以催命還催命.

昨日食 Swiss Chalet, 在辦工室光明正大, 夠膽死集體叫雞, 你試過末?
其實, 集體叫雞真的好驚
之前有人曾經捉過蟲. 不要心邪, Billy好正經架.

之前有人食 Swiss Chalet中了大腸桿菌.
集體叫雞, 真夠膽, 不如每人再叫杯 3 6飲, 壯一壯個膽.

這次我們集體叫雞, 會否集體中毒?
假如中毒, 豈不是齊齊入院不用加班, 又有人工?
看來塞翁失馬, 焉知非福!

不想吃得太瘋狂. 「拿拿淋」食完, 做完就走人, 返屋企.

俗語話:「雞脾打人牙骹軟」我看還是取決於什么時侯和時代.
以前大線雞, 牛白腩叫新年大餐, 現在只怕人家怪你寒酸.

Personally, 隻雞脾ok好味, 不過有些同事卻認為唔惦.
這個薯蓉不錯, 唯一美中不足是沒有半點蔬菜.
(呢班友仔, 真難服事)

今日 JP Morgan 出業績, 好過我預期, 居然有錢賺. 真不明為什么它們可以這么快公佈業績, 點做? 肯定 accrual (估/預測)好多東西, 不然, 根本冇可能.
下星期美國大公司s業績排山倒海地公佈, 相信有排分析.

寫 blog某程度上可以減壓, 至少這是 Billy除了讀聖經, 閱讀, 玩 wii fit, 早晚沖個靚涼之外的減壓方法.

忙了, 忘不了讀聖經
忙了, 忘不了寫 blog

但寫 blog的穩定性或者會無可避免地下降, 冇法.

寫 blog同加班那一樣緊要? 當然是寫 blog!!
但寫 blog同加班那一樣急切? 或者加班是無法自由選擇, 希望這些日子盡快結束.

一字錯, 滿盤落索

不懂打倉頡, 用手寫版逐隻逐隻字寫, 真費時失事.
九年前剛畢業, 有份工見不成, 就是因為不懂打倉頡 .
九年後依然不懂打倉頡(真係唔長進), 所以經常寫錯字都不知道(因為個手寫版有時 sensor唔到 or sense得好差.)

好似兩天前那篇 無所顧「妓」, 將「不代表我支持立法」, 出唔到個"不"字, 變成「代表我支持立法」, 意思由中立變支持, 認真滴汗(Billy好懶, 不喜歡 prove read, 但小學時代學騰文, 原來真有其用).
之後一日睇番先知道捉蟲, 心諗:「神啊! 大鑊.」

不過, 寫錯字唯有寫返篇錯字聲明, 唔洗死.
你可能問:「經過咁多教訓, 會唔會學倉頡?」
哈哈! 唔會 lor.

1. 太懶;
   
2. 每日寫成800-900字, 學倉頡會減慢出街進度, 承受唔起. 有成卅篇 sharing未出街, 一日寫兩篇都要追一個月(點解要咁趕? 又冇人逼你.) 咁有 idea唔通唔寫? 反正又冇野做;
3. Billy最強係文字和數字, 倉頡? 將某中文字拆開, 變成砌圖, 再轉成字母組合, 然後打出來, 幾難. 對Billy而言, 要比聖經神學, 保險/油公司(最難的2種公司年報)的業績分析/預測, 填詞或煮飯仔更深奧, 真的學不來;
4. 好似「建築有情天」楊怡經常說: "let the pen do the thinking." 手寫版雖然慢, 但令 Billy有時間組織, 構思和美化字句. 這是倉頡未必能做到;
5. 吃不到的葡萄是酸的, Billy是一個好例子;

話時話, 提到楊怡, 越來越覺得有個 friend, D動靜, 聲線語氣, 甚至個樣都有點似她, 當然沒有楊怡咁靚. 但楊怡的靚(明星wise, ok la)是幾成靠天生, 幾成靠打扮, 幾成靠化裝? 唔知, 是但啦!

咪走雞

當經常光顧的食店也食厭了, 要發掘新的食店, 就開始苦惱. 除了睇廣告, 靠朋友介紹, 伸個頭入去, 假如門庭如市, 客似雲來, 自然給人一份無形但無限的信心, 令你不再猶疑.

某日(08年初), 見報紙話 highway 7 & McCowan 間鴻昇館, 食雞半價, 去試下.

踏入門口, 嘩! 水靜鵝飛, 冷清清咁, 見到都唔開胃, 自然唔方好味. 不過, 既然一場來到, 又「不幸」曝光, 被伙記捉住, 唯有硬著頭皮, 用笨就笨一次的心態食一餐 lor.

一睇餐牌, 又嘩一聲:

什么王后雞, 咪走雞? 我心諗, 咪又係白切雞,

人家香港有些地方出一蚊(港紙)一隻雞, 它是卅二蚊(加紙)雞.

笨就笨一餐 lor, 反正半價. 另外再加幾個小菜.

王后雞到, 卅二蚊雞係貴左D(係半價), 但真係唔錯喎! 果然一分價錢一分貨. 隻雞冇乜肥肉得來幾滑幾甜(這是非常難得), 同一般走地雞瘦蜢蜢, 彈牙兼爽口不同.

走地雞健康喎?! 喂! 我依家食雞, 唔係食香口膠, 橡皮膠嘛! 還是這隻王后雞好.

火侯亦控制得很好, 仲痴骨, 而D骨仲係紅色.

那時, 個老細走過來, 介紹我們點樣食他那隻王后雞(咪一口一口咁食 lor).

• 第一口, 空口食
• 第二口, 點汁食
• 第三口, 點汁食, 飲杯茶, 細味一番
  
• 再食第四口, 空口食
• (Billy平時食都夠招積, 想不到這位老細更招積)

食一口雞, 飲一口茶, 先甜而後甘, 果然將美味昇華. 一隻雞用不同食法, 食出四種味道來. 不錯. (杯茶仲要咁骨子, 充滿古色古香的中國味道.)

公道話是: 它依然不及香港元朗大榮華的五味雞(即豉油雞)好味(遲些和大家分享), 不過, 在加拿大多倫多, 食過這么多中菜館, 這隻雞算不了第一, 也可算第二

記得有次春秋食軒(多倫多出名食府)食個魚翅龍蝦餐, 魚翅好, 龍蝦好, 但其他小菜不夠好. 鴻昇館這個金菇玉子豆腐 比D上湯喂住來炒, not bad. 炒得比春秋食軒好.

時菜海參 $14, 白菜苗炒得幾靚, 而且白菜苗亦是揀手.

經受不起伙記的推介, 叫了個山豬煲. 估唔到有驚喜.

未食過咁鮮甜既豬肉, 通常豬肉好"un", 燜完又太林(Billy 真難服事). 但今次這山豬有趙口得來又鬆化兼爽口. 筍同冬菇吸收左山豬, 豬膏同D上湯汁既味, 好正. 食到唔停得口.

這山豬煲多吃可能壞肚皮, 少吃絕對多滋味

食完, 飽飽地再食碗冰凍豆腐花, 舒服晒!!

好難得叫樣樣都咁有水準, 食完唔洗點飲水(少味精), 值得誇獎.

同老細傾談一番, 他說想在多倫多間專為食家飽嘗品福的酒家.

可能因為價錢比較貴, 又冷清清, 令人見到不想也不敢入去試, 不過, 一間好味的食店無人問津實在可惜. Billy 亦因為見到這酒家門可羅雀而差點走雞. 可見以貌取人, 有時真的會走寶架.

最近(09年 1月23日, 周五晚上 7點)教會話去那間酒家食飯賀新春.
迦密團請你, 隨便睇, 隨便食, 自己比錢.
一圍一圍咁食好處是可以試多更多好味的菜式, 又再試下點至食得招積.

卅蚊雞(包稅包 tips), 新年食餐, 對自己好D, 對家人好D, 心情都靚 D, 又點可以走雞呢?

無所顧「妓」

香港又發生一單妓女兇殺案, 同類事件08年亦發生了 5宗. 看完今早新聞才返教會, 到此刻還是為這件事感到不安.

性工作在香港是非法行業, 非法行業當然因為它在道德層面上不為社會各階層認同, 不值得也不應該鼓吹, 而且濫交亦有可能引到墮胎, 性病等社會具爭議性的種種問題.

但非法行業從另一方面代表這個行業是被社會各階層所忽略和鄙視, 而且也嚴重缺乏政府勞工, 福利, 安全上保障.

接 連幾宗兇殺案已經令業界帶來恐慌. 經濟不景, 卻又危機四伏, 是打開門繼續做生意, 是暫避風頭(能避多久, 私己又能涯多久?), 還是從良, 找份工? 但要找份工又提何容易? 人家問你有什么工作經驗, 點答? 難道又傻又天真地誠實作答? 要做低下工作又賺不到錢.

在缺乏政府和社會各界的扶幫下, 業界只有兩條路: 1) 建立同行的更緊密聯繫, 平時互通消息, 有乜時按「平安鐘」求救; 2) 和三合會人仕建立互惠互利的關係. 一方向客人提供服務, 另一方向性工作者提供保護.
方法 1 對緊急突發的意外傷害, 幫助有限.
方法 2 則助長三合會勢力, 令歪風更盛, 而且令性工作可能受到某程度上轄制, 有的染上毒癮, 有的想從良, 或者想停止雙方合作關係亦困難重重.

性工作的聲音, 以及他/她們的人身安全, 勞工保障, 有誰會聽見, 關注, 和幫助得了呢?

新加坡政府將性工作合法化, 以便於管制性工作, 同時對性工作者提供基本保障.
香港政府應否效法?

這爭議和 03年賭波應否合法化類似. 當時教育界和宗教人仕組成反對賭波大聯盟, 以賭波會助長社會歪風, 可能製造更多問題賭徒為理由, 反對賭波到底, 但賭波合法化依然以排山倒海的姿態, 完成公眾資詢, 也高票通過立法會.

假如這些兇案越演越烈, 引起各界關注, 政府會如何處理, 以保障性工作者的人身安全, 同時打擊三合會, 或者各種地下行業在經濟低迷的今天滋長勢力呢?
教育界和宗教人仕又能否吸取上次失敗的教訓, 在假如(我說假如, 不代表我支持合法)政府提出娼妓合法化的情況下, 不致於被殺個措手不及呢?

主耶穌在地上時, 沒有認同性工作這個行業, 但卻進入他/她們中間(當然不是嫖客)關心他/她們. 甚至被人取笑, 耶穌竟和罪人, 和娼妓, 和稅吏同行.
在香港, 有不少志願人仕/機構關心支援性工作者, 作昔日耶穌所作, 關愛昔日耶穌所關愛. 你可能不是什么志願人仕, 也不懂關心性工作者, 問題賭徒, 吸毒者 etc etc. Billy 亦彷彿是愛莫能助, 一個無所顧「妓」之徒.
但請為那些志願人仕的付出, 那些弱勢社群, 邊緣人仕, 和我們身處的社會, 政府禱告. 花多一份心思關注這些人, 事, 物.

其實除了娼妓業, 性和金錢互換的不道德交易.
老泥妹, 援交少女, 一夜情, 包二奶等社會問題亦有日趨嚴重和年青化的催勢.
色情影音業, 色情文章甚至上年中文大學學生報的情色版風波,
這些事, 這些人都離我們不遠, 都不陌生.
除了義正詞嚴的加以指責, 教育下一代, 關愛身邊人身邊事的「耶穌仔」,「耶穌女」在那裡呢? 我們可以不負半點責任, 到這些事發生在我們至親時才感到切膚之痛, 才知道醒覺嗎?

請為那些志願人仕的付出, 那些弱勢社群, 邊緣人仕, 和我們身處的社會, 政府, 我們的家庭, 近親, 良朋禱告. 花多一份心思關注這些人, 事, 物.

Sorry, 這篇blog比較正經. 我相信大家都希望社會繁榮昌盛, 而絕非娼盛.
多謝你耐心讀完它.

My cup of tea

禮拜六冇節目? 點會?
和朋友早在上年定下不見不散的海誓山盟(即幾日前約好) - 約好去滑雪, 不正正是今日(1/10/09)么?
可惜, 天意弄人, 作為會計師的「宿命」禮拜六的節目就是加班.
在公司滑雪是滑不成, 要試下滑鐵盧就悉隨尊便(thank you, 唔洗, 留比你啦)

一早做到兩三點還未午飯, 去了對面食日本野. 加班在這裡叫外賣叫得多, 堂食就第一次.

白日夢還未清醒, 就有湯飲, 感謝神.

個茶杯幾 cute, this is my cup of T.

雖然食阿公, 但無謂食到太盡(當然亦唔會委屈自己).
最後叫了一個牛肉蛋飯醫肚.

色香都不錯, 橙, 白, 紅, 青, 黃, 綠, 啡, 香噴噴, 熱騰騰. 味道也不俗. 就是牛肉切絲而不是切片, 煮出來, 尤其是煮到 well done, 就令我有點食牛肉乾那種口感. 可惜! 可惜!
整體而言, 食餐 OT便飯, 唔錯, 但唔算得好 lor.

真是快食不知時日過, 又要結賬.

本來成口油和汁, 就是飲完 my cup of tea都感到不自在.
就在這時侯教我遇見如此可愛的飯後果.

食完飯即刻坐好易有胃腩, 雖然走走, 散步甚至做運動, 也不見得能跟胃腩說再見, 但還是習慣食完飯去全加拿大最大的超市/食品集團 Loblaws 逛逛.
行過什么, 拿起什么, 都攪攪, 研究, 把玩一番, 但又唔買.
正式「攪攪震, 冇幫襯.」

假如你花式噴泉看多了, 可以上樓上俯瞰 Loblaws的蔬果部, 欣賞到時到侯為你表演的「菜」式噴泉, 自動自覺, 為蔬果來個花灑洗禮.

由於有這樣精釆絕倫的表演, 所以引來無數情侶在這裡約會.

你約下我, 我約下你;
你等下我, 我等下你.

Come on!! My cup of tea!! Let's 欣賞「菜」式噴泉 .

特別注意:
關於 Loblaws, Billy曾經有過一次前無古人, 後無來者的特別經歷, 請繼續留意同溜覽"留比你 Bilibala Blog"!!!