多元社會下的基督徒 05 詩篇 19 篇 part 1 v1-6

詩篇 19 篇, 按傳統解釋上半(1-6)是講神創世的偉大, 下半(7-14)講神話語的寶貴. 但兩者有什麼關聯? 有更深入的解釋嗎?
這首詩又如何助我們在多元社會下, 當一個蒙神悅納又不離地的基督徒?

Re: 學睇《人民日報》

學睇《人民日報》

同意，依家個市有尐偏離基本因素，好似中國交通建設(1800)，一帶一路點計，佢咪值12-13. 但依家升過15. 

當年曾升近28(冇記錯的話).
你可以話亞投會令佢生意多左，毛利率大增，但全球經濟唔見得火熱又點有咁多項目同咁多白痴讓你提高做價呢？

又好似港交所，成交額1500億會常態化嗎？北水南調會持繼幾耐呢？

當一切都有點抽離而個市繼續升，係去定係留其實好唔容易決定.
我自己會選擇分段離開太抽離的企業，寧願賺少尐，佢再升我都唔會怨，為自己決定負責，反正都係賺，只係賺好多同賺更多既分別，我賣亦唔代表我其他冇咁抽離既冇得賺.

當年金融海嘯我係咁樣賺到尐又保留到實力，在大跌市執到更多，今日歷史未必重演，但我仍然會選擇呢個較穩陣又一貫既策略

Re:「33歲如何成為百萬富翁」

「33歲如何成為百萬富翁」

33歲揾100萬，25年後升到超過1000萬，即每年財富增幅至少9.65%，對比恒指同樓市升幅，唔算好多，但將來會唔會咁升法係一個問題，點賺第一個100萬係第二個問題，今日100萬值幾多係第三個問題.

識得每月賺三四五六萬既朋友s，100萬好多都有，但冇人再覺得係一回事

有1000萬么？海嘯價或沙士價買左樓既，就有lor，買唔到，幾專業果個都未有. 不過同意，兩者可以相輔相乘.

復活節後的門徒乜乜乜

陳到兄話，祝人復活節快樂仲衰過講粗口，拜讀過後，可能我個人比較衰，即時會諗:
1. 我最想祝邊個復活節快樂呢？
2. 有邊個聽完篇道會好想祝陳到復活節快樂呢？
3. 仲有乜野衰過祝人復活節快樂呢？

估唔到轉眼間復活節已經快快樂樂咁成為半個月前的矇矓記憶.

你果日做過乜，記得幾多呢？
會唔會只依稀記得果日崇拜篇經文出自乜乜福音書.
至於領詩帶了什么詩歌，午飯同什么人吃了什么，幾時躺下，幾時起來，都不知道，因為早已忘得一乾二淨.
如果惡習同污穢的心可以洗得咁徹底有多好呢？

原來這就是我們集體回憶的復活節鳥.
那日之前，我地返工，放工，飯聚，鳩嗚，事工很忙.
那日以後，我地返工，放工，飯聚，鳩嗚，事工很忙.

假如我們是活在第一世紀的第一個復活節，在耶路撒冷或加利利地，是其中一位跟從主，但名不見經傳的門徒乜乜乜，復活節果日點過同樣唔記得了，又或者只記得
受苦節那日死老豆咁樣，
復活節果日仲係一舊雲，食矇左咁樣.
可是復活節之後點過，肯定還歷歷在目，記憶猶新.

門徒乜乜乜 A (同馬利亞) 正在千里孤墓無處話悽涼果刻，遇見主.

• 乜乜乜 B (同革流巴) 去完耶路撒冷，返老家途中遇見主. 
• 乜乜乜 C (同十個門徒) 躲在家中飯聚，食食下乜乜乜整餅，遇見主.
• 乜乜乜 D (同彼得) 去海裡打漁，正在發愁，問，"點解冇斬獲？咁通乜都俾班大鱷吃光？" 遇見主.
• 乜乜乜 E (同另外500位乜乜乜) 遇見主，聽主講論，見主升天.
• 此外還有無數乜乜乜，乜都見唔到，冇遇見主，單純地"道聽途說"，就信鳥.

呢班乜乜乜，有遇見主的，有的冇遇見主，然而佢地既生命從此不一樣.

• 有的放下工作，唔怕死咁通處話比人聽主復活左，後來人稱這種行為叫傳福音.
• 有的恭喜賀喜賣屋賣田又賣地，分俾有需要既人
• 有的繼續做生意，賣帳棚，賣紫布，收下稅，各行各業乜都有，但開放屋企，攪家聚，收留有需要既人揾兩餐，十卜(支持)果尐傳福音既乜乜乜.

每個門徒乜乜乜都好似判若兩人咁，從此甘心樂意(即使未必幸福快樂)走上一條不歸的十架路，佢地唔係返唔到轉頭，而係冇諗過返轉頭.
就好似用左 smart phone (加數據)，返唔到轉頭用龜殼機/水壺機
追過美劇，就算睇返 tvb，除左大時代會唔開胃，甚至反胃咁.

呢個係復活既生命.

我奇怪點解我地同呢班門徒乜乜乜反應咁唔同.
我地第二日就打回原型，過著跟不信主既家人/朋友/同事同學....完全冇分別既生活. 除左:

• 周日堅拒同屋企人飲茶或瞓雁尐，而選擇返教會打發一個上午，
• 別人進修/教仔/做運動/做義工/捕住個金魚缸/耍樂/瞓覺既時間，留在教會做那些比"愛"更加永不止息的事奉.
• 別人跟親朋飯聚或獨自去鳩嗚果陣，我地選擇同一班唔見得好熟但被叫做弟兄姊妹既分享人人一樣的生活事項: 工作忙，身邊的生老病死，事工忙，同某某關係差(唔溝又點通？但你都唔夠時間溝，講乜姐)

除此以外，有乜分別我真係唔知.

有趣既係:
我地照樣遇見主.

我地每一日都慶幸同感恩，
每日讚美主信實無變.
因著信，神與我同在，每天保守引牽. So sweet, my Lord Jesus, my baby. 就算生活遇到乜乜乜挫折，唔緊要，呢尐係試煉，我地仍然經歷到主. Amen!

點解有班人遇見主，乜都變晒
又有一班人乜都冇變，仍能遇見主呢？

我懷疑呢個世界，有兩個主，又或者主有至少兩種形態，讓人遇見.
一個是叫人得生命不怕死的復活主，而另一個是生活賜恩的主.

我們所遇見究竟係咪同一個主呢？如果俾你揀，你想遇見那一位呢？當然係生活賜恩的主，乜都唔洗變，只要不停止聚會，就有祝福，多爽！

近年流行一個嘲笑基督徒祈禱的笑話: 得著 -> 神大能，得不著 -> 神試煉，這個無敵自圓其說論，就是我們對這個生活賜恩的主經常掛在嘴裡的見証分享.

面對不信主的"無賴"取笑，我們當然要站起來護教，但我們內心深處其實非常害怕去問清楚:
1. 那個生活賜恩的"主"究竟係咪復活主呢?
2. 如果唔係，咁點經歷復活既主？
我地信仰立時迷失同破產.

回到聖經，我發現兩件事:

1. 神生活的祝福和咒詛，有至少一大半係賜給所有人. ie

• 日頭照好人也照歹人
• 春雨，秋雨，死亡臨到世上所有人，所以689遲早會死，我大膽預言.

所以，那個祈禱輪迴說冇錯，問題係佢同樣可應用在未信冇祈禱之人身上.
你若蒙神祝福有份好工，最近港交所賺到一桶金么? 在世上亦有不知多少人有份更好既工，在 A 股/乜乜乜估上賺了更多.
你遇上生老病死，全世界都遇上.
就連主耶穌釘十架犧牲，也是為世人而不是為你一個.
在生活裡，你沒有比人更特別地更蒙恩的地方，因為神不偏待人.

2. 世上有誰遇見復活主次數最多呢？

• 司提反臨死見過一次，
• 保羅在大馬色路上和哥林多見過兩次，計埋三層天頂多三次. 
• 彼得在空墓見不到，在屋裡遇過兩次，打漁再見一次，再加四十日講論，升天前再多一次，是四到四十次.
• 約翰年老在扙摩島遇見主，所以比彼得見多一次，至叻係佢. 不過相傳彼得被殺之前想著草離開羅馬城，在路上遇見主. 

但點計都好，史上最強既最多見過復活主四十一次.

我地依家開口埋口連唱歌仔都會遇見神，係我地勁個十二使徒，還是我們所遇見的根本不是復活主呢？

點先經歷到復活主呢?

或者我地由一開始，一直都問錯問題. 好比江仁佑牧師(福音派天真的释经观（五）：回到教会历史去) 一文所講，將聖經中一些特殊，可能只此一次只此一人的經歷對號入座看作慣例，將不該 personalize 既事件 personalize，令我們將一切都弄糊塗鳥!

其實，大使命咪講左，當主所吩咐一切的你都遵守，又教訓人遵守，並奉父，子，聖靈之名給人施洗. 主就常與我們同在嘛！

今日主活著. 主活著係唔需要透過遇見，感覺，祝福才找到.
當你願意聆聽，遵行，跟從和教導別人，就憑信心相信主仍然活著，不是歌仔話"主正仍然活心裡"，而是主仍然活著. 

於是當你生活上遇到全世界都經歷都既乜乜乜果陣，最該問既，唔係"主啊！你去左邊？"，亦唔係"全世界也安靜，為要聽我見証"
而係好似只見過主兩次咁大把既保羅問，"主啊! 我當作什么？"
係呢個處境中，點樣繼續聆聽，遵行，跟從和教導別人?

有時冇即時答案
有時會多做多錯

但經過好多年之後，你會明白

乜野叫"靠著那加給我力量的，我凡事都能作"，

乜野叫"我知道怎樣處卑賤，怎樣處豐富"，

什么叫"應當一無掛慮，只要凡事籍著禱告，祈求和感謝"?

誰說禱告係無限 loop?

那稱為萬百禱告的殿(主)，係邊個令佢成為賊窩？
主耶穌話，人拆毀了殿，佢三日(即透過復活)就能重建起來.

我想復活既大能，假如肯相信，就算多年禱告無限 loop既耶青亦可以被推倒重來.

假如肯相信.....
冇左每日既"主愛"，仍然經歷到主既一切.

多元社會下的基督徒 04 運程與信仰 (part 3) 耶青的迷信與今日的迷失

以前阿爸阿媽果代，聽到你返教會，會話，"好！返教會，尐細路乖尐架"
點解今時今日，我地會比人話我地耶能呢？

有人話因為我地離地，冇關心社會，可是一直以來，華人教會都重福音而輕社關，反而近十年更積極.

點解？點解？點解？有乜可能架？
係人對我地唔認識，係魔鬼指控

我想來想去，想到兩點:

1. 我地話人迷信，話人拜偶像，但我地更迷信
2. 我地話人愛世界，但自己變左離地

Clip 中承接上次，分享對此的體會.

耶教會思迷之擋不住的十億豪情

當香港人在鬧爆千四億三跑，為抗爭達致一周一行是得還是失，股市發癲咁升悔恨冇買港交所或鐵路股既時侯，我們耶教會亦不甘後人，來個更爆更 juicy 既十億建堂計劃.

爆因為十億對唔少人來講係天文數字. Juicy 因為無論教內教外，在坊間未了解任何具體細節前，而引起廣範而激烈討論.

九龍城浸信會籌建10億教堂 教友質疑建堂金現1.6億 執事會主席﹕不要怕 只要信

有全憑信心，不要怕只要信的
有開火鬧爆，指它為大白象，十億可以有更多用途等指責
亦有持觀望態度，想先了解同查訪"有消息人仕"再評論的.

計我話香港寸金尺土，樓市年年升，天價再天價，sky 唔係，heaven is the limit. 一間五千人，十年後可能過萬人既教會要用天價去蓋好有乜出奇呢？
一個連出口馬桶都話自己係一帶一路既基建年代，恐怕最後雯用卅億才完工.
我信會架
但不要怕
如果當中有些有錢既信徒，為呢個大家庭出人人出幾球，住大尐起靚尐，令多尐人信主，在區內做多尐社康關懷服務，又點解有問題呢？

串尐講，不信既傳媒或未信既朋友，"你地係呢件事上無份，無權，無記念"，又唔係叫你捐錢，關你乜事？
我有錢，我鐘意，我認為係合神心意呀！

若我要扮屬靈，從聖經同教會歷史既角度看. 你覺得十億建堂太大，你真係大驚小怪.

早在出埃及記，以色列人就用金用銀造了一敬拜中心 - 會幕. 當時以色列人是在曠野飄流，冇收入，靠神每周六日"救濟"嗎哪為生，用私己棺材本造出一個所費不菲天價會幕來敬拜神. 出埃及記 38:24-31記載了他們在金銀銅這些當時屬極稀有金屬的花費.

到大衛同所羅門建聖殿就更是豪情億萬噸. 記錄在歷代志上 29:1-10. 金銀銅鐵"石"，花費變態多.

教會歷史裡，靚靚教堂多的是，就是今天，你同我去歐洲，信與不信，都會同付一門票去 St Peter, St Marco, St......參觀. 裡面既名畫雕塑通通價值連城.

咁樣講代表我認為聖經支持嗎？
更正確講聖經冇反對.

不過，此一時彼一時，以色列人集全民族的財富建一會幕/聖殿，家陣香港有咁多教會，唔係只此一間.
另外，會幕/聖殿，或者中世紀時的教堂都係當時當地的地標，經濟，社群，醫療衛生福利，文化知識，甚至政治既中心(等於集金管局，庫房，福利局，教育局，醫管局，文化部.....甚至警務署，軍統於一身).

聖殿，教堂功能遠遠超過今天，起得勁尐人人覺得好正常，今日教會有冇必要花這么多在一所建築物上呢？

這問題值得那間教會(及一切計劃植堂的教會)再三慬思.

地方淺窄當然可選擇開多一兩堂崇拜，外判一些事工或聚會到別處，亦可選擇租用別處.
若說租，一樣要花錢，某些用具又要買兩套，可能花更多.
開多一兩堂會有人力資源問題，要不用多尐人，要不某些人要跑兩三轉，疲於奔命.

當地方有限而人數卻不斷加，亦容易產生資源爭奪的紛爭與不便.

問題係，地方大了是否能解決問題呢？

以前細個，暑假成班表弟妹會在婆婆家住，表妹一發痺氣就將自己關在洗手間，然後急死，因為大家都冇得用.
去到加拿大，地方多左，假如表妹大唔透，又玩關門，已經唔怕佢，因為加拿大的住宅有兩個甚至三個洗手間.

這種間歇性資源爭奪不再成為問題，但我要每月洗多一兩個廁所，吸塵洗地都耐尐. 結果地方大左仲做得多，而且人多左關係就會更易疏離，教會不再是一個家，變成一個小社會. 以無數節目同活動維繫，最後仍然係果句，有辣有唔辣.

更何況，五十幾年樓齡的建築物，重建好還是維修好，係一個實際而唔離地要面對既問題.

所以，如果根據市況，聖經，同實況，似乎十億，建堂都唔係非黑即白的對錯問題，而是財政，喜好，選擇問題.
那為什么每次建堂都攪到咁面紅耳熱？有尐人反面，有尐去另一間教會？

我認為就是因為教會牧者執事提出建築物的實況問題時，太屬靈化地將一切喜好，選擇變成非黑即白的對錯問題.

我經歷過兩次植堂，每次教會都搬出憑信心，不要怕，只要信. 以為那些是理由. 其實是偷換概念，令會友成了任何議題的橡皮圖章，我投 yes 才有信心，投 no 就冇信心，問多句都令我感到萬般無形壓力.

點解唔可以將所有選擇拿出來分析利與害，係，你做左好多功夫，到頭來奉獻最多亦可能係你，但一家人，你叫得我出錢，比我知多尐有乜問題呢？

要鬥玩解經么?

• 講約書亞記其實係爭戰唔係植堂，講所羅巴伯人家被擄歸回啊，仲有係全用政府錢興建架，689在三跑以外用錢幫你建堂才顯出不要怕只要信.
• 又或者你有信心，唔好借錢，等儲到一筆過才買，因為借錢，取利不合乎聖經嘛！
• 講返聖殿的歷代志，也是用政府錢興建，此後百姓奉獻主要亦只是維修. 聖殿幾百年， St Peter 文藝復興時擴建至今也幾百年，都是維修，為什么擴堂才合神心意呢？
• 大衛又點計？神講明不許他建殿，但結果給他更大祝福，應許他子孫繼承他的王位.
• 到新約耶穌時代，猶太人十個人就可立一個會堂，信徒兩三個神就耹聽禱告，聚會在大戶人家開放自己的家，是一堆家庭教會. 不用大型建築物. 上代華人教會多是承傳這個傳統，教會以樸實為主.

可見用不用擴堂聖經其他有贊成亦有反對.
(當然咁講會被人話你驕傲同唔順服，但我講聖經，企圖順服聖經，何來驕傲呢？一班信徒點解順服係單向？聖經話彼此順服，應如何理解？冇話過俾錢先算順服喎！)

當教會高層以為自己抓住神心意，在表達教會需要時顯得不顧現實，訴諸聖經但非常一面倒. 實在令人反感和失望.

用不信既傳媒術語講，求主幫助教會高層公關做好尐

可能不信既傳媒選擇性佈道，"不要怕只要信"不是教會回應既全部.
亦可能因為我經歷過兩次植堂，有過不快經驗，誤會左一件神看為美的事.

誤解不足為外人道，可惜，從來不是清者自清.
即使乜都你岩晒，公關呢方面教會真係醒爬尐，又或者真係要悔改.
尤其係呢個有樓冇樓各佔一半，貧富懸殊，社會撕裂既處境，教會仍是世上既鹽同光，需要更多智慧同忍耐.

Bilibala bible 以馬忤斯路上你睇我唔到？

復活節期間我地都會無限 re loop 耶穌釘十架和復活顯現的經文，你唔爭在再 loop 多次.

今次我想 loop 一個現像:
點解復活之後尐門徒認唔出耶穌？

難道耶穌有特異功能
像周星馳在賭俠中運功，
"你睇我唔到？你睇我唔到？你硬係睇我唔到？"

傳統點解釋? 比對其他經文又點解釋?

解釋完呢個問題，so what?

關我乜事呢?

廷伸閱讀:

• 李家齊：“明亮”和“解釋”- 門徒如何認得復活的耶穌（路加福音二十四31-32）？
• 沒有耶穌的一天

一個耶教徒的告白(6) 講第三隻小豬之前的插曲

在七級豬症侯群的教會裡，就算乳豬已成為你的過去，而你呢隻"豬乸"每次攪珠都抽到死豬/陰公豬，你仍然可以亦必定有足夠條件，能力同無限恩典的機會....去透過事奉經歷神的大能同恩慈.

我要再次強調，事奉神是個"人人期望可達到，你的喜樂比天高"的經驗(那怕有七級豬症侯群).

問題只在乎:

你肯？定唔肯？肯唔肯做第三種豬.

第三種豬叫頻死豬. 

(改稱為"羊"罷，如果這令你自我感覺良好一些. 記住"豬"只是比喻！你定意硬著頸項，一心對號入座，唔好賴我.
這不是文章原意).

言歸正傳，讓我先探討乜野叫"瀕死"?

聽過 Heaven is for Real 那類見証，你會發覺許多經歷過瀕死的人都話自己見到一道白光，上過天堂，有的更加見到主耶穌....
你會奇怪為何這些"瀕死"的感覺都係超爽，而且其所見所聞居然如此類似?

一個人在瀕死既階段，是否真係上了天堂，遇見神呢？

信仰百川有幾篇文章解釋和剖析瀕死的經驗，值得各位閱讀.

• 「馬斯特，你死咗去邊呀！」– 甚麼是瀕死經驗
• 福音派信徒對瀕死人士有關天堂的講述有兩個截然不同的看法
• 四個不應再迷戀上天堂的理由
• 「真的有天堂」？從一個推翻自己「去過天堂」的見證之孩子說起
• 假如……真的（再）有天堂？！

既然有好些人提筆作書，述說在我們中間風聞有你的瀕死見証，bilibala 也不妨分享 billy 唯一一次的瀕死經歷，以過來人身份搭(豬)嘴.

可能有些離題，但想分享是因為:

• 一來了解瀕死對我們了解瀕死豬有助益，
• 二來受苦節/復活節在即，分享多一點有關生死既題目，也頂合適
• 三來真係親身經歷過.

是咁的

18年前， 97香港回歸，六月尾到七月頭，我到了加拿大十多天，移民報到 (landing).
嚴重感冒，兼發高燒，104-5度.
看過醫生，食過西藥，依然不見好轉.
整天迷迷糊糊，時差，頭痛，包雲吞，食念慈庵. 飲埋潘高壽，都係成日咳，四圍奔波，申請乜証密証，開戶口，報大學，病到死，還要去父母親朋求人關照既會飯局，頭重重的"至暈"飯局，日日如是，令病情加劇....
最心痛是:
幾乎冇人覺得感冒會死人.
但上述既一切事宜兼飯局，在父母心中，唔攪呢尐，先會死人.

呢段日子, 寄居係一慳慳朋友家, 溫馨提示過唔好開冷氣(唔熱喎！)，又唔好開窗(有麈喎！)，焗燒豬咁過每一個晚上.
(奇怪係，冇人因此被我交叉感染喎，呢個都係神蹟，不過當然更加冇人會記得).

第三還是第四晚，依然在發高燒，在床上焗到昏迷. 也不知過了多久，眼前一片白光，強烈但柔和(是可張開眼望那種). 身體忽然唔覺得辛苦，連多日頭昏腦漲也消失了，又有點魂有象外的感覺，然後在白光裡，聽到一把聲音，話已經令我好番，叫我學習乜野係愛，用此後的人生經歷"佢"既大能.

醒來，仍是漆黑的半夜.
熱退了，本來的超級鼻塞也沒有了，只淨下一兩聲咳嗽.
這次經歷大概能算作瀕死罷
(冇上天堂亦冇見到耶穌).

移民後我重新返離開了五年的教會，從此堅信耶穌，the rest is history.

從來沒有大大宣揚那次經歷
(印象中只點到即止地提起過最頂多三四次，從沒有上述那么詳細).
之所以藏在心裡多年，有以下幾個原因:

1. 小兒科
對比其他人的瀕死經歷，我的算什么.
冇見到隧道，又講唔出當時身邊人做乜(好肯定在瞓教，但唔係因為我睇到，而係我估到).
冇上到天堂，亦冇緣見到耶穌，只像以色列人在西乃山腳聽到聲音，仲聽得兩句(而非十句).

2. 主觀性
其他人的瀕死經歷有幾個疑點，係我解不開的. 我唔想分享見証，被人將我和他們掛勾等同:

a. 隧道: 

為什么上天堂要穿過有疑似隧道的管道呢？
難道天堂一早發展了四個現代化(一路一帶)有火車/地鐵？
後來讀創世記，雅各見異象(他不是瀕死)是看見上天梯的.

b. 聲音: 

我想先交待清楚. 當時聽見的聲音不是真的有把人聲，我想是近似心靈感應. 問題係，為什么"耶穌"/"神"同我講中文? 而且係地道廣東話呢(邊個話粵語唔夠國語正宗？神都肯用佢講說話，哈哈)?
後來讀使徒行傳彼得講道，十五國方言既人都聽到，係咪類似？

PS: 那些年聖靈同我傾計亦用"廣東話"，不過跟那次瀕死經驗的聲音有點不同，唔識形容，那次好 solid 同權威性，平時的聲音比較微小，要 verify 幾次(當然，我唔排除兩樣都可以聽錯 :p)

c. 耶穌:
最令我困擾是他們遇見耶穌.
第一我當日見唔到佢，無法引証，

第二，多數瀕死形容的耶穌是個棕髮白種人，而不是疑似便拉登的中東佬.

保羅話過，向猶太人保羅就作猶太人，向白人? 耶穌就會作白人嗎?
另啟示錄話，羔羊臉目會發光.

我地最近知道，在光線影響下藍/黑色可變成金/白色，棕色漂白又有何不可呢？
再退一萬步講，現代科學窗明，我們跑去韓國整容就得，耶穌在天國變像又有何出奇呢？

總之, 任何 Heaven is fot Real 的見証，都令我不敢斷言佢假，但又難以肯定！

3. 好衰仔
假如分享出來會唔會被人插，會唔會被人擺上神檯？
以為會勁尐，以後要醒定尐，唔衰得. 所謂人怕出名，豬怕肥.
還是實幹地做隻排骨瘦豬
樂得清靜.

今次在這裡分享，就以平常心去讀下 like 下 share 下.
我仍然係個普通人，同你冇太大分別， 亦唔會因為試過瀕死屬靈過其他人.

4. 求不得
耶穌有個比喻，有個無名氏財主話:
"若有一個從死裡復活的到他們那裡去，他們必要悔改." (路 16:30)
唔理上過天堂的見証係真定講大話，死過翻生既人講句野都似乎大聲尐，有力尐！
也基於人們是好奇心以及得唔到聽下都好既心理促使，呢類見証，一向都叫好叫座.

可是從另一個角度看，一來大部份我們不是生就是死，瀕死是個求生不得求死不能的(遇見神)經歷.  是可遇不可求，萬中也無一的.

所以當某些教會大力佈道時，信仰百川的作者對此似乎偏向負面或消極.
有作者主要為了打假. 指出那是假見証，即使令多人信主及受感，又怎能蒙神悅納？亦有些作者從學術角度剖析，認為是主觀經驗也好，是有沒有天堂的客觀証明也罷，信徒都不應沉迷於天堂經驗的追求中.

既是non transferable ，何必講太多呢？

過來人
說到這裡，我又嘗試換過角度，以一個信不信由你 so call 過來人既身份分享我的體會和學習.
(除我以外，絕不代表任何人，你可以參考，亦歡迎有不同立場.)

我覺得當一個人經歷過死亡.
(它可以指瀕死，上過天堂，平淡地一次大難不死，又或者某些忘不了的生離死別.)
我故然可追問它的真假. 有時會找到答案，更多時侯是難以判斷.

此外，如果我地話生命唔應該強求和戀棧這類經歷，我係同意.
而且如果唔需要經歷神奇遭遇，仍體會到神的美善，這當然好得無比.

但像我這個過來人更想知道的第一個問題係: 透過這個經歷我有什么學習?

它會令人更深思想生命，珍惜生命同更寶貴身邊的人.
而我亦因此重新返教會，認真地，重新的了解這信仰
( 都係果堆眾所周知既老套野，冇乜特別，但你很難否定它的積極性).

當我覺得呢條命係神賜番比我，我既生命係屬於神. 由果日開始我就唔再覺得信仰係個可有可無的喜好選擇，而係一個每一曰，揀生或揀死的決定.
(我當然想"生")

第二個問題係，如何令這類人生意外經歷inception 植根在內心深處，令我成長得更精采，更歷久常新去經歷神?

就正如主釘十架和復活只此一次，但如何烙印在千百代信徒生命中，令我們到今天也因為主活著而為主而活，敢於打倒舊我，多一尐去愛一尐唔可愛既人，挑戰壞鬼以及和邪惡抗爭呢？ (面對強權，有時要沉默，要逃避，在那當口，我寧願做隻有點抽離既七級豬亦唔想做隻只求合一既河蟹).

回想番自己在瀕死之後，之所以重返教會，又堅信至今，我要"歸功"於兩個實際行動.

第一, 是豬乸的奶水
由我重返，除了團契慣常的彼此關顧，初信栽培，我入大學的過程，讀書以致待人接物，我都好感激所有花時間在我身上，愛過我，幫過我，扶過我一把的弟兄姊妹.
他們是教會裡又良善又忠心的豬乸.

第二, 是努力做乳豬
我瀕死得救，so what?
雖然我解釋唔到點解會忽然痊癒，也許我果日望見的白光是一堆"白"紅球，而不是神，在那一瞬間基因特變，強大起來，秒殺所有病菌.
就算係神，他救了我一命，我就要以身相許嗎？
你會以身相許一個救命恩人嗎?
a. 不會，如果佢係個長相似八兩金既小小救生員.
b. 會，如果佢係大醫生/大律師 (發夢都流口水啦！如果你遇到，你點祈禱，都係神心意架！)

所以初信果勁，隻隻豬乸都以為我係隻一級純天然有機乳豬，我確實唔壞(自己讚自己)，但其實我心裡面打緊另一個算盤，我搏命讀經研經，誓要曉得這道是與不是.
試下呢樣，引証下果樣，要知道值唔值得我繼續跟從下去嘛.

乳豬的奉上

我係個金融佬，我唔會咁天真因為一次"意外"而"賠上"性命去委身俾耶穌. 我要先驗貨，試下個信仰有幾堅先會繼續跟落去.
假如發現係流既，又或者雖然係堅，但堅離地，就盡快壯士斷臂，止蝕離開這豬場.
如果夠筍，你趕我都唔走啦！

你可能話我市儈，耶穌救左我(both 身心靈再加一次瀕死)都仍然咁交易心態.

你試諗下: 

• 每星期花幾多時間？返教會，團契，崇拜，十次有八次要承受被悶死既風險. 
• 做七級豬事奉，被上級豬洗人唔洗本，點到我駝駝拎，尐豬仔又唔生性，唱歌果陣誓神劈願，一轉身又去左鳩嗚，你估好爽？
• 已經盡了十斤豬奶力做十一奉獻，都唔識知足常樂，仍然劏豬咁叫人速速磅. 兩頭望下，即刻比人話冇信心....

喂！呢尐咪低程度既為主受苦. 

我做乜要咁？

無敵心豬算

對我來講，什么神好愛我，幾 sweet sweet, 為我釘十架，所以我要聽話, 做隻乖乖豬，不可停止聚會....

你試諗下:
佢救左我又點？大晒呀？
佢付出幾多幾多獨生子，十架，又如何？
佢係神佢唔救我我唔怪佢，唔係奉旨，但佢要救我有幾難，佢無限勁架嘛？
而我只不過係人，有限公司，微不足道，付出小小，其實已經好多.
等於李嘉誠同我一齊，我成副身家出晒，都唔夠佢個零頭，但那已經係我全部，所以，你唔可以將我同耶穌釘十架比嘛！

佢好愛我，赦免我又點？
我阿媽夠愛我，叫我飲湯. 我就飲咩？
我聽話唔代表覺得尐湯好飲.
我唔飲，唔代表我唔愛佢/感受唔到佢份愛.

一個金融佬，佢請我飲福杯我都要計下個 opportunity cost, 佢叫我喝苦杯，我一手揸住本聖經，一手拿住個算盤，我又唔覺得有錯.

耶穌叫人背十架跟從，都要先計算代價. 保羅亦坦言，跟從主係好苦，但對比將來既榮耀，就覺得那些苦係至暫至輕.

乳豬的覺醒

我對個信仰係好認真.

我之所以選擇繼續跟從，係因為我發現聖經講既神同耶穌夠勁，夠偉大，佢既道理夠真，夠力，值得我跟從同效法.
我佩服同願意降服係佢面前.

即係如果我阿媽煮野係好得，咁我十次有八次會自動自動飲湯，而且覺得好飲，飲到照鏡.
當中可能會有冇胃口既時侯，有鬧痺氣，"係唔飲，吹呀"既情況.
如果我唔 buy, 就算幾 love, 我都打定底先，求其攪下飲兩口，當佢 tvb 道具，做個樣就算啦!

人會Buy in 到乜野程度？
視乎對方有幾勁，而我地認識佢有幾深.

上級豬保羅?

保羅在書信中寫寫下會忽然發癲，詩興大發: "深哉！神豐富的智慧和知識，他的判斷何其難測...."這可是他最正經論述救恩神學的羅馬書呢? 仲要在今日最唔覺得關我地事既果段，9-11章結尾時，保羅有這樣的"爆seed".

對住佢養大既"乳豬"提摩太，就更表露無遺.

提摩太前書，但我有理由相信，當時既代筆先生會有咁既壞鬼想法

(純屬虛構, 提摩太前書或者冇代筆):

保羅啊，保羅，你想個仔做乜做乜咪好似上級豬咁講完一件再一件
因乜解忽然提到"基督耶穌降世，為救罪人，係可信".
Ok, 我知道，但你仲要加句，"係可佩服的"，未夠，仲要話，係"十分可佩服的."
跟住話在罪人中你係個罪魁，又乘機想分享見証

啊！你既見証，淨係使徒行傳都重覆左三次，你個仔阿Tim 聽左一萬次，佢知架啦！(使徒行傳係在提摩太前書之後成書, 但講故就唔好駁故.)

好不容易吩咐完一輪點樣選長執，其實教會既外憂內患真係幾匹羊皮卷咁長，頭腦死，吐幾車血都唔夠，但保羅一諗起呢個咁樣衰既教會係永生神既家，又係真理既柱石，就忍唔住高聲讚美
"大哉，敬虔既奧秘....."

寫到呢個位，大家都覺得神真係好正，我都停筆，跳起身跟大家一齊讚美主.
(大家放心，我地用人人都識既希臘話讚美神既能力智慧，係唔會出現"讚美豬能夠"呢尐詭異場面.)
唔知過左幾耐. 

突然漆黑一片
whats going on?
係世界未日，主再來嗎？

乜都唔係，係我的燈需要油，油盡燈枯左.

成村人本來高聲讚美
在漆黑中全部止息，然後一齊大笑.
"um......不如寫埋封信先再讚美！"
再沾油，點燈，將剛才既讚美簡短地寫埋落去，保羅，請你繼續講啦!

總結
瀕死是個難得的經歷.
跟任何和死相關的遭遇一樣，可令人思想生命，和更珍惜生命.
但它既是可遇不可求，無法令人人都體驗，同時是一次性.

所以就算它有其積極的建立和造就性，也需要人努力追求，身邊同行者關顧才能結出 long lasting 的果實，而要結出果實，又未必需要追求瀕死.
肯做乳豬，豬乸同瀕死豬咪得.

正如保羅在上過三層天回到極品七級豬哥林多教會的信中，也勸信徒，三層天雖正，但保羅更喜歡"誇耀"在地上經歷為主受苦和軟弱及從中得體會神的旨意，細味神的大力和安慰.

祝大家受苦節同復活節，除左商場鳩嗚，一家大細去飲茶之外，更多認識神既美善同能力，在往後一年更多跟從主復活得勝既生命，做隻乖乖豬 :)

等等!
講左咁耐，仲未入正題講第三種豬喎！有冇攪錯?

你冇攪錯！

聖經話神所賜的有.....牧師和教師，我兩樣都唔係.
我係豬欄某破口既導遊.
一個盡責既導遊既責任，就係帶你遊花園同講故仔過你聽.
我咪就係 bilibala 咁盡忠職守ing.

下回再分享乜野係瀕死豬.

你既然咁難得讀到呢度，叫 may 姐煮個麵你食，我又分享首歌你聽，一首我每年呢個時侯(復活/清明)都用來思想生命，記念我好愛好珍惜但已經離開我既婆婆既詩歌 <<4>>.