Translate

Sunday, May 31, 2015

Bilibala fund 2015年5月表現

Bilibala fund 5月微升 +0.1%
截至今年5月29 回報 +20.53%(若剔除一切外匯影響).

5月回報遠低於預期的 +1.7%. 主要原因是Tiffany 在公佈業績後股價反彈,加上中國平安受惠上証指數創新而上揚,抵銷5月尾兩個交易日全球股市下挫的損失.
全球股市下挫主要因為希臘違約風險增加(年年都係咁喊驚),以及美國第一季GDP調整至 -0.7% 影響所至.
市場有所謂五窮六絕七翻身一說,見全球市場5月回報亦似乎引証了這點. 但上証今年似乎有免疫,即使中央出埋口術,5月仍升3.8%.

5月各大市場回報如下:
S&P 500 +1.1%
TSX -1.4%
FTSE100 +0.3%
EURO 50 -1.2%
HangSeng -2.5%
HK China -2.3%
Shanghai +3.8%

2015年回報亮麗,已超越一年19.7%目標.
以地域劃分,bilibala 亞洲回報 28.9% 遜於上証但勝過恒指. 歐美回報 16.5%,遠勝市場.
主要原因是 bilibala 亞洲重點投放於幾間大中資企業,隨著一帶一路這概念,和滬港通,深港通的憧憬和資金湧入市場,令回報在4月狂升. 加上在去年低位換馬策略(以 $32 中國人壽換馬 $86 平安保險以及以平均 $100 中國移動換馬平均 $110騰訊控股 ) 成功令回報勝過市場. 加上組合內歐洲金融及醫藥股上揚,能源股去年高位沽出在第四季及今年第一季趁低吸納,額外賺多一筆. 

唯組合內兩大巨頭 Google 及 Tiffany 都無什貢獻,Decker Outdoor 和 AMEX 大跌抵銷了部份收益.

2015年各大市場回報如下:
S&P 500 +2.4%
TSX +2.6%
FTSE100 +6.4%
EURO 50 +13.9%
HangSeng +16.2%
HK China +17.7%
Shanghai +42.6%

若問後市點睇,我通常冇答案,又或者經常做 lulu 燈神,所以比較愛從估值評估繼續持有,增持還是別的.
亞洲方面,短期升得太急太多,會繼續 hold 但唔會再加.
油價升番到$60一桶,可以再跌番落去,但我估55-65個位暫時對所有人石油既得利益者都最有利,會維持一段長時間,或者唔會上番75. 所以又係 hold 住唔會加.
從價值角度
美股我睇好 AMEX, 80以下真係超值. 雖然好多地方唔用得,客戶群比 VISA master 細多,但一條龍服務好,客戶平均消費力比對手高太多,相信一定會升番
加股我仍選 CN Railway. 之前分享過點解了
中港股方面,乜都升,我開始以淨餘現金收集一些防守性核心業務在香港的企業 ie 香港煤氣,中華電力,恒隆地產,領匯......

1-5月搬屋,裝修,家俬,交稅,嚴重打擊現金流,往後下半年,估計現金流會催向穩定. 不會再為 bilibala 基金帶來壓刀.

Top 15 Holdings
1. Google Inc
2. Ping An Insurance
3. Tencent Holding
4. China Construction Bank
5. Tiffany + Co
6. Starbucks Corp
7. Walts Disney Company
8. China Mobile
9. Wells Fargo
10. American Express 
11. General Electric
12. Johnson and Johnson
13. Royal Dutch Shell
14. Decker Outdoor
15. Berkshire Hathaway

Asset Mix by Region
1. USA 46.4%
2. Asia 32.7%
3. Europe 10.9%
4. Canada 10.0%

Monday, May 25, 2015

買樓思迷(5) 一條茂利的故事

2010年,加拿大仍未走出金融海嘯既陰霾,一家人4月搬新屋,直到8月仍未能將舊屋賣掉.
那4個月裡面,要背負著新屋舊屋兩邊同需支付沉重開支(供樓x2,水電煤x2,地稅x2, 管理費...), 加上父母問長問短,有要求,有意見,令我壓力爆燈精神緊張到一個經常失眠既地步.

團契弟兄姊妹為我祈禱,我自己祈禱.....都好似都冇乜用咁.
我知道阿媽係女人,知道船到橋頭自然直,遲早賣得出.
祈唔祈禱,信與不信,到最後一定賣得出架!
問題係,賣幾多錢? (不斷降價,一定賣得出架,鬼唔知呀,唔肯嘛!我肯,我父母都唔肯過我)
仲用要再等幾耐先賣得出? (每日都出緊血,頂到幾耐?註一)

我當時做左個好阿媽係女人但真係好有啟發性既禱告:
"神啊!我點祈禱我個心都仲係好驚好唔安落. "
我唔覺得神會介意,所以我繼續求:
"如果我好好記住呢種不安既感受,你會讓我學到什么嗎?"

後來那個令我哭笑不得,想打佢一餐既裝修佬,佢點醒左我,"你賣樓,就算一千人唔鐘意你間樓都唔洗驚,只要有第一千零一個人,一條茂利肯用果個價錢買你間樓,就得架啦!"
鬼唔知阿媽係女人!
但我覺得好正確,我同我既心就安定落黎,唔再降價但亦得到釋放.
最後,間樓以ookk既市價賣掉.

這次賣樓經歷實在太寶貴.
令我四年後再賣樓,以及後來兩次轉工都能以平常心面對,"我唔需要令全世界都喜歡我才成功架,某個HR 同某個老細兩個人(兩條茂利) buy 我咪得 lor!"

更大得著係:
一生人,我要討好邊個呢?
我唔需要討好全世界,我最愛既人仲有神喜悅我,咪得lor. 我就集中火力,去滿足到佢地,就足夠.
我因為得到一份釋放同喜樂,而且更加積極咁去尋求,認識點樣討神,討身邊愛既人同老細既喜悅.
其他人和事?我相信神會繼續透過他們去點醒同祝福我,愛佢地亦係神所喜悅的,同一時間,佢地點睇我點評價我,我又可以拿得起放得低.

神的確會聽會答人既祈禱,即使個祈禱係"阿媽係女人".

這事以後,我經常做一個唔似祈禱既祈禱:
"神啊!我地有乜咁可愛?值得你道成肉身,降世為人呢?你仲唔係個茂利?"
聖靈彷彿同我講,"唔係茂利,係宇宙最傻大茂利,我鐘意呀!"
然後我通常會問,"我話你茂利其他人一定話我褻瀆,你嬲唔嬲架?"
聖靈彷彿用說不出既歎息答我,"如果你願意為我,學我咁做茂利,我開心都黎唔切添,點會嬲喎!"
又俾位神入添 :p
不過感謝主,又多謝在我生命中愛我祝福我既一班"茂利".

關於神係茂利一說,記得哥林多前書第一第二章裡面,保羅有分享過,佢當然比我正經同語重心長,言之有物得多啦!
"猶太人是要神蹟、 希利尼人是求智慧.我們卻是傳釘十字架的基督、 在猶太人為絆腳石、 在外邦人為愚拙 、但在 那蒙召的、 無論是猶太人、 希利尼人、 基督總為  神的能力 、  神的智慧 。因  神的愚拙總比人智慧.  神的軟弱總比人強壯 。"

xxxxxxxxxxxxxxxxxxxxxxxxxxxxxxxxxxxxxxxxxxx
註一
由移民到2010年,我們這一家住大廈 condo,一間卅年樓齡,200萬港紙都唔夠. 每月萬五港紙,儲三千絕對供得到既居所.
加拿大同香港國情唔同.
大廈 condo 係唔升值(僅僅跑多過通漲),但管理費卻年年加,仲要每幾年額外夾錢維修. 好處係交通較方便(都要用45分鐘返工,落到樓下計5分鐘行去超市),夏天唔洗剪草,冬天唔洗鏟雪.

考慮左好耐,一家人決定由賣樓買屋. 冬雪夏草又遠左好多,但好過捱貴管理費,又希望多尐升值. 大方向是對的,不過,一賣一買勁多錯誤決定,所以攪到咁煩咁大壓力.
自己抵死架!

我係金融佬,唔係地產佬,亦唔係炒樓人,住死一處十年都唔想搬果種人. 第一次做買賣,問左好多人,得到好多幫忙,依然做錯好多,唯有當買個真係好寶貴又好貴既教訓 :p

祈禱可以求雨過天青,求出人意外既平安,或者凡事謝恩.
我更喜歡求神比我智慧做事後檢討,下次對多尐,錯少尐.

Thursday, May 21, 2015

金融佬的原罪 (Re: 金融佬與教牧係同路人嗎?)

多謝 Tony 嘗面,兩個麻甩一起,以一個題目做起點,筆影舞動一番.

Tony話:
當我們再留心「積攢錢財」在雅各書第五章一至三節的經文意思時,經文指出當時的「富足人」積攢財富到一個地步,這些財富已經壞了、蛀了及生鏽了。因此,這些「富足人」的問題是他們不善用資源而構成浪費。固此,若財富資源能夠被好好管理、投資、善用及幫助他人時,留下錢財投資並不會構成「積攢錢財」所產生的浪費資源之情況。其實,當財富資源被好好管理及投資時,這是可以成為多人的祝福及幫助。

這是個對何謂「積攢錢財」很好的理解:
"善用資源,不浪費又成為多人的祝福及幫助."

無奈今日的教會/信徒,對何謂「積攢錢財」似乎有另一番解釋,令到金融佬和教牧就算要作同路人,都有點一水隔天涯,要起條橋或者划船先能同路.

在教會有唔少關於金錢的教導,有對有錢佬寶貴的提醒,亦有一些對「積攢錢財」的誤解或者不設實際的要求.

讓我羅列出富人的原罪(註一).

為左錢?
一般人話「積攢錢財」 = 淨係識賺錢
唔好花晒尐時間掛住賺錢!
比你賺到又點?如果冇左健康,家人關係,值得嗎?
錢可以買到呢尐愛同幸福嗎?
瑪門同耶穌,你為乜揀瑪門? 歌仔有唱,"愛了世界你怎愛耶穌,其實心底一早知道"

絕對認同.

但呢個亦唔限於教會教導.
我公司我老細都不斷講 work life balance 既重要,我都知架!未信既都知道.

問題係:
好多人係冇得揀.
好多人係有加班,但冇加班錢(我就係例子之一).
就算周五六日唔想返團契同崇拜,都冇人想加班架!我唔係傻,間間公司為左「積攢錢財」精簡人手,令幸存者多而又多咁加班,我冇得揀既話,可以點?
已經做到隻狗又冇加班錢,返教會仲要被人話為左錢同愛世界,豈有此理?!
感謝主,神已經訓練到我唔再嬲呢類親切既慰問. (註二)

如果低收入要加班,高收入又要加班. 咁有得揀既話,我希望高收入呀!

現實是....
跟據香港最新各行業收入中位數統計,金融佬係平均 2萬5千6一個月,同人均 gdp相若,又比工程系低,什么金融才俊,其實都係阿四.

金融佬不見得特別賺,有幾多係投行賺幾百萬一年,花紅仲要係人工既一倍.
佢地每周工作120小時起碼,但揾幾年就收得工,我唔敢話咁樣值得定唔值得.
我唔係佢地,某程度上我冇乜資格 comment佢地 work life 唔 balance.

聖經點睇?
回到聖經,「積攢錢財」既原話來自福音書裡的耶穌,馬太福音第六章. 從前後文可以了解得到,耶穌是以積錢在地(會朽壞)和在天(不朽壞)作比較. 打落去係叫我地醒少少(眼晴明亮)做明智決擇,事奉主還是事奉財寶. 耶穌進一步指出為何事奉主比事奉財寶更明智: a. 神會照顧人基本需要,人唔洗擔心,b. 擔心同搏命爬未必管用(誰能使壽數多加 + 之前講會朽壞) ,c. 世上什么最珍貴?耶穌話身體勝於飲食,生命勝於衣裳,當時人的飲食佔開支一半,而衣裳係奢侈品,翻譯成現代版,大概是身體重要過供樓,生命重要過去歐洲食玩買(唔睇戲唔去日本,再高檔尐),揸靚車.
所以,耶穌以先求神國神義作那段的總結.

這段經文如果冇理解錯誤的話,是個從屬的關係.
我們要跟從主. 沒有否定「積攢錢財」所得到的福氣,而是給人另一條出路和選擇,指出跟從主更好更明智.
傳統將兩樣放在對立面,及將金錢收入妖魔化,未必合理,除了加增人不必要的罪疚感,也無法令人停止追求"邪惡"的金錢(註三).

問題係: 乜野係先求神國神義? 乜野係積財在天呢?係咪心態ok就心安理得,只要我自覺為主就可放心揾錢呢? 如果係,聖經就專為我服務.
其實如果讀番轉頭,登山寶訓係有講一系列既行動同貼士,一大堆如何積財在天的建議,係富人窮人都可以做,難做但唔係做唔到架. 
當中冇叫你分晒成副身家,冇叫你唔比賺錢,只叫我地在公司家庭待人接物果陣,返教會果陣,點樣做番個合神心意既人.

呢點實情係叫我們番返 Tony 那個 point, "善用資源,不浪費又成為多人的祝福及幫助...."
假如我地將積財之簡化成"淨係識賺錢",瞎子領瞎子既離地教導,將會一生咁控訴我地,亦令金融佬永遠同牧師無法成為同路人.

當我地明白左乜野係積財同積財在天上. 咁具體既跟從係乜呢?當中有什么可行既路,有什么壞鬼攔路?

似乎 Tony 同我都冇乜多講,可以各自發表,講多尐嗎?

xxxxxxxxxxxxxxxxxxxxxxxxx
附錄:
Tony 文中第二點 - 財散人安樂提到:
若積財引至不善用資源而構成浪費,我們的確要好好計劃如何運用我們的財富。其中一個重要的計劃,就是在我們離世後的財產管理
關於遺產,財散人安樂我的確有考慮. 
見到身邊唔少人,唔係新馬仔,溏心風暴,小甜甜那樣大富大貴之家. 得幾十萬,百幾萬都可以令下一代反目成仇,甚覺可惜.

都係果句,具體上點安排,我仲諗緊,正如我上一篇分享,機構唔識賺錢,大舊遺產比佢,一係令佢大洗左,一係打散佢,再唔係遂年比,咁果筆錢又該交比邊個管呢?比自己人咪會爭,比外人又會唔會似梅姐咁?

哈哈,我有呢尐打算,又會被人話,"無知既人啊!我今日攞你命3000,你仲計咁多為乜?"
我會答,"我就係喜歡計,乜都會計一餐,所以我係金融佬,亦喜歡做金融佬."

註一
按美國人的定義,我未有耐係有錢人. 我又唔會折墮地話自己窮.
我屬於比下有餘,比上我會知足果隻.
我只能從金融佬/打工仔加一點生意人角度思考.
至於富二代同暴發戶,唔係本文討論範圍.

註二
教會人好叻,佢在台上,在大圍分享果陣話你,私底下關心你果陣又好同理心甘明白你好忙好困乏,但好明顯佢係同理心唔係同意你. 佢責備你嗎?冇,佢同大圍講之嘛!你覺佢講你即係中啦!可能聖靈同你講呀!

對住(某部份)一群真心,善良但離地既弟兄姊妹,有特別既價值觀,用特別既關心技巧關心你,我真係唔知佢心裡面真果句係乜(即使佢真心),
所以我唔介意,心領其良意,但又真係有困難交心架喎!
(PS: "你"當然唔係指 Tony 你啦!大家咁熟.)

註三
當時猶大人普遍覺得有錢係神既祝福. 點解神祝福佢?因為佢愛主,我以有錢人進天國係最容易.
這是當時猶大人的成功神學.
亦因為咁,當路加福音19章耶穌話有錢人入天國難,所有門徒都打左個突,問,"咁邊鬼個得呀?"

耶穌要撥亂反正,一定要串爆當時人,所以往往令我地覺得耶穌同錢係對立,跟從主唔可以揾錢.
對於 buy in 成功神學既,用耶穌呢招,對立串爆佢啦!
對其他人,我地要持平尐處理有關錢財的教導.

Saturday, May 16, 2015

一個耶教徒的告白(7) 不要叫人小看你係七級豬

一間七級豬症侯群的教會,最能夠經歷神既係第三種豬係瀕死豬.

瀕死豬跟瀕死的經驗唔同,絕對係一個只要你肯就能夠充充滿滿地經歷神既完美豬種.

乜野係瀕死豬呢?
瀕死豬就係事奉好忙,忙到死,忙到死都做唔惦果種信徒.

只要你係瀕死豬,就如同因信稱義咁(無條件得救),必定滿滿經歷神.
(補充: 因信稱義當然唔係膚淺地、無條件". 什么是"口裡認,心裡信"都可以辯論二千年.
但作為耶青的福音硬銷廣告聲明: 因信稱義除左信,就係無條件,就係白白既救恩. 信左你先知原來入教會會遇上七級豬,做到你隻豬咁).

乜野叫無條件經歷神呢??
a. 不管你係幾級豬
b. 不管你好屬靈定係屬靈低潮
c. 不管你最近"三多"有幾多.
讀經,靈修,祈禱(在"令人噴飯的謝飯"裡,加埋事奉,合稱為教會四多,做齊就係好乖乖,牧師同上級豬鍚晒你既教徒)
d. 不管你事奉動機,目的如何,事奉對象係為神,係人,係自己定係唔知為乜.
e. 不管你事奉態度,手法,結果是好是差.
呢尐通通唔重要.

只要你事奉到一個地步,忙到進入瀕死狀態. 以為今次死硬,跳樓都唔惦,早知係咁不如一開始唔好應承隻上級豬.....
但係呢個時侯只要你堅持,甚至再激尐,加多幾個事奉上身,經歷神就完全冇難度.

咪住!
呢個好明顯係歪理,忙事奉有乜可能係咁正呀?

羅乃萱(何師母)最近不是寫左篇分享,話做馬利亞坐係度好過忙到爆既馬大?
耶穌話馬利亞選上上好既福份喎!
就連間中找羅乃萱來批評下既陳到兄不也叫人小心 burn out 么?
所有牧師都叫你有事奉之餘,最緊要係三多.
呢一點就算林以諾同曾思瀚,梁燕城與 Howtindog.....濟濟一堂,都會異口同聲,萬眾一心,同心合意咁叫你唔好盲忙盲事奉.

(補充: 馬大vs馬利亞果段經文,曾思瀚博士本新約壞鬼釋經有更深入的正"軌"解釋.
作為耶教徒,我當然要堅持"傳統",我唔會咁衰叫傳統做壞鬼,佢只不過係你懂我懂,約定續承啫!)

就連上級豬中最無人性既果隻,見到有burn out病徵既瀕死豬, 亦會勸導一句,"唔好不停忙,忘了三多. 要知我地力量來自神,唔好做到 burn out....."
轉下頭問,"呢個乜乜乜事奉,其實唔急,你可唔可以早尐done左佢?"
(頂!又話叫我三多,又話趕貨,有鬼時間咩!)

又或者

"我唔介意你技能唔夠同結果係乜,事奉最緊要係態度同個心 lor."
轉下頭問,"我覺得我地要練多次 lor."
(咁即係介意技能同結果啦!
你叫張學友來唱詩,張家輝來演drama,黃子華來講道,方太來弄茶點,佢地咪有心有 result lor.)

可見最無人性既上級豬都知道瀕死豬唔惦,你仲話佢最惦最經歷神?
攪錯呀!

你既牧者同上級豬永遠是對的.
錯既係你同我,走左入間七級豬症侯群既教會. 係呢度,係瀕死豬既天下,馬利亞會被人恥笑,馬大才會被受追捧.

人人叫你唔好咁忙,叫你做三多,你認真就輸左啦!
我咪人板,用最傻豬既方法証明乜野work, 乜野唔work.

以下係警訊時間,屋企既小朋友留心.

我信主之後,好聽話咁親近神.
人叫我讀約翰福音,我即讀,而且一個月內讀埋成本新約.
人話三多好,我就日日花兩三小時咁三多,堅持左三四年才因為返工減到少於一小時.

我認為我一係唔信,一係認真咁信,你話邊樣 work out, 祈好,讀好,背好,抄好,試著行也好,我就試. 可以既,我都會盡力,不惜工本時間咁試,試下果套 work 唔 work. 真係好似使徒行傳17.11話天天三多,要曉得這道是與不是.

點知當我去問牧者A, B, C聖經問題,和一些對壞鬼的疑問(睇得多,諗得多,試行得多自然問題多多又分分多多)往往得唔到答案同正視,仲比人潤,"你返屋企讀多尐聖經. " ,"聖經唔可以咁解架!唔好咁鑽牛角尖"

我心諗:
喂!你又唔知我讀左幾多聖經,就叫我再讀多尐,咁究竟讀幾多先叫多?
聖經唔可以咁解,咁應該點解你又解唔清,仲唔比我繼續諗,話我鑽牛角尖?
乜事呀?!

但我個人太低B,真係更勤力咁三多,希望揾到出路.
換來既係更多弟兄姊妹同上級豬都話我,咁樣唔健康,會頭大身細,會變法利賽人,我咁樣係靠行為稱義,我有屬靈驕傲...:

有唔少仲講:
你咁樣冇姊妹會鍾意你架
(你咁咒我?你地唔係叫尐姊妹鍾意愛主既人咩?)
係,但唔係咁 lor.
(點解呀!)
總之唔係咁啦!

信主頭五年,由於三多,乜野有愛心但好難聽既勸慰我都聽過了.
(又學使徒行傳26.29話,我希望你三多,但唔希望你有我五年既困苦同疑惑)

點都好,我用左五年去以身試法,証明當你三多做到比上級豬/同級豬/下級豬都多而又多,三多到多無可多果陣,會人人都話你有問題架!

經過幾年,我學聰明左,人家唔問,我唔會講我三多架(千祈唔好,會不得好死架),我永遠都好謙卑咁話,"ok la, 我仲有好多要學習既地方(我又冇講錯喎!我到依家都繼續精益求精咁認識神同體會主既心腸同埋七級豬既心腸架)".

我開心大發現,原來係七級豬既教會最理想既狀態係做"豬三少".
豬三少係乜?
就係三多指數永遠控制係有做同冇做,做得好同做唔好之間,間中拋句金句,分享出來,然後想做就去做. "以馬內利,神與我同在! "
咁就最屬靈,又夠謙卑,最適合做群羊榜樣了.
三多?咪比人當三多燒臘, 叉完再燒 lor.

當你三少,你已經好過好多人,好似 candy crush, 有幾個心心續命,就算做瀕死豬都唔怕 burn out, 又能保持一味順服同謙卑.
因為當你挑戰上級豬權威,又或者遇到挫折果陣,上級豬永遠可以用"你唔夠三多"作為一切問題的解釋.
如果你真係三多,佢點答同救你呀?

須知令人噴飯的謝飯裡提到屬靈四定律:
1. 你愛主又得米,証明神祝福你
2. 你愛主但捉蟲,係神比你試煉
3. 你唔愛主但得米,係你愛世界,冇鬼用
4. 你唔愛主又捉蟲,証明冇好結果,抵死
如果你三多再有事奉,你咪一下子廢左佢兩條律 lor, 佢仲點apply? 點幫你呀?你咪令佢懷疑教會既屬靈四定律lor, 你咪即係絆倒人lor?
之前信仰百川都有文講絆倒,好危險架!那絆倒人的有禍了!
所以話你法利賽人,話你驕傲冇話錯你架!佢冇話我絆倒佢咪係愛心 lor.

你可能話,呢個只係我主觀個別例子,退一萬步講,你只要做豬三少,其實上級豬就收貨而你事實上又真係好多大半信徒了.
其實你諗番轉頭,只要提醒下你做瀕死豬好有意義架,三多好重要架,就算你三無,只要令你相信忙係有意義,其實你已經唔會 burn out. 我見過無數出色既三無瀕死豬.

係一尐事都冇!

關於親近主同三多,遲尐再分享多尐.
講翻第四多:"事奉"既極品瀕死豬.

你一定要做馬大,至少扮馬大,人地叫你唔好咁忙,要像馬利亞,你點頭認同,謙卑承認自己係三少或三無,會繼續努力......然後繼續努力做馬大就冇錯.
記住,認真就輸左.

呢個等於公司老細跟我講:
"billy 唔洗咁忙,快尐收工啦!聽朝交到貨就 ok, dont kill yourself, you need to take rest. thank you for your hard work. good night."
喂!聽朝交,依家下午6點,你岩岩先彈尐野來叫我做,我係超人呀?!有叮噹法寶呀?唔OT 兩三粒鐘點走到呀?聽朝仲要更早返先死得惦同向你匯報睇有乜要加同改,如果唔係聽朝咪食蕉同種蕉 lor.
但我可以點呀?
咪回老細一句,"dont worry, good night"
(即係,放心,我會做惦,你早抖啦!)

神有豐盛恩典,上級豬其實亦好體恤你既軟弱,因為佢幾變態都好,佢都係隻瀕死豬(唔係,根本冇可能做你老頂). 所以佢把口叫你親近神,佢有冇真係親近神你唔知(假設有啦!我地做主門徒既,疑點利益歸上級豬嘛!)
上級豬既行動明明話比你聽,瀕死豬洗乜驚,佢自己咪爆經歷神.
"再忙尐我都試過啦!"
(聽到未?佢咁講,你仲唔信靠順服?你有幾忙呀?學下我呢隻上級豬啦!想當年......)

呢個就係言教 vs 身教既分別 lor,你要在七級豬教會生存,當然要學身教果套啦!

在你舉手兼舉腳反對我再講呢套"歪論"前,請你回想下每年教會做完大型節目乜乜乜(佈道會,培靈會,堂慶...)又或者一年一度退修會,領袖營等等,總會有些感恩見証分享會. 尐人通常會分享乜乜乜?

我用左十八年做過一個官方統計
(官方即係我話乜就乜,好似張融咁. 但我唔送蠔油,不過會逼你飲靈奶).

當中勇敢分享見証的信徒s:
有四分一會講生活點樣點樣遇到困難,但得蒙神奇妙帶領最後逢凶化吉云云.....
有四分一係那些初信乳豬,或離教重返的回窩豬肉,分享出面世界點倒煤,點慘遭冷眼,而神又點愛佢,挽回佢,生命點被改變.....
其餘佔大多數最經歷神既,就係一班瀕死豬,分享佢一年既事奉經歷.

(透過分享指數這個有公信力又經過廣泛資詢既調查: 瀕死豬經歷神的質與量,都係起過三分二,大比數拋離其他信徒. 只有極小數有 burn out 問題出現.)

你自己有冇聽過呢尐瀕死豬經歷神既故事呢? 又或者有冇做過瀕死豬?依家仲係咪瀕死豬呢?

瀕死豬真係好經歷神架!
所以我每次都好留心去聽,聽每一個分享,好似主母馬利亞對耶穌咁,將呢尐見証藏於心裡,仔細分類和分析.

下次同大家分享一些瀕死豬既故事,佢地有乜得著同生命改變.
再分享下我呢隻過來(瀕死)豬既心路歷程同唔做瀕死豬會點過你聽.

Friday, May 8, 2015

當金融佬有一百萬 (re: 為富不仁要小心)

假如你承受了100萬加幣(約六佰多萬港幣)的財富時,你第一件會做的事情是什麼?

按"為富不仁要小心"一文,Tony 兄認為
每個人對財富的運用及安排都因個人的喜好及價值觀而有所不同.(有的為仔女,有的要還債,亦可以分開,有的投資,有的去旅行,和周濟窮人)但我們要小心,不要成為為富不仁的人. 因為積攢財富可以成為一種自私的浪費行為.....

關於呢個有左一百萬會點用既問題,我第一時間覺得依家"一球"真係唔算多 :P

根據美國時代雜誌 2013年一份定義"誰是富翁"的調查發現,6成受訪者認為要在自住物業以外有美金五球以上, 才稱得上是個富翁.
唔知你認唔認同,但連我公司尐同事都話, 就算中左 649 (六合彩),分到100萬,佢地冇一個會退休/夠膽退休.

(利申: 我唔買 649,因為這是賭博 !!
鬧我係耶能之前,請參閱註一: 一個耶能無法教你"點解唔可以賭博"的完美答案.)

Tony 的文章引用雅各書5章,認為
積聚財寶可能係一種自私行為.
在許多信徒心裡,大概認為,若有人願意散盡家財分給有需要的人 / 奉上所有給教會,就最了得. 反觀有錢唔願洗又繼續揾既, 往往就係愛世界.

Ok, 係咁的. 返返去原本條問題: 當我分到100萬,我會做什麼呢?

其實我有幾多額外錢都好,我係個金融佬,所以永遠係果個答案:
用晒去投資,8成股票2成物業(註二). 然後齋用賺到既回報,十分一到十分之一作慈濟(可用作抵銷部份稅務),其他的唔係洗左佢,而係一生一世咁利疊利 (註三).
你話我市儈貪錢,話我只知積聚財寶都係咁話. 
首先千祈唔好誤會,我就算咁做,仍是將賺既十分一跟人分享
第二,我嘗試處理一個各盡其職既問題.
第三,我有做義工,幫身邊有需要之人, 有一直做開(我知唔夠 :P ).

呢幾年,我諗得好清楚
我係金融佬,強項係錢揾錢,唔係周濟窮人.
而那些周濟窮人既機構,強項係周濟窮人.
錢揾錢(係我眼中)佢地識條鐵咩(註四).

如果我呢刻比一百萬佢,佢會同我洗晒佢,洗唔晒,就諗尐新項目工程去花一千萬,一億,甚至十億,當中還不明不白小左 20% admin fees(教會 admin fees 更高,building 同人工只佔 40-50%開支已經係全球典範,註五).

因為佢無論收幾多,都會天真地認為,下年會收到更多,然後根據下年的估算收入,去定出一個更大目標而動用更大的開支,再根據這開支,去向全世界分享它有更多事工和夢想,需要比前述預算更多的資金. 請大家慷慨解囊.

相反如果我將一百萬去投資,每年賺到 15%(for 金融佬 only,鬼叫佢專業,賺唔到做乜要揾佢,DIY啦),然後比十分一,即萬五過佢.

第一,佢或者會因為經常手緊,更有智慧咁諗清楚點洗果筆錢.
第二,果一百萬仍然係我手上,會每年增加 13.5%,25年後我回報既十分一就會係一年 35萬5,到時佢應該更有智慧用果筆錢.
第三,這令我從來唔需要動用老本,因為它是錢揾錢的源頭,發揮我最大本事的地方.
第四,蝕左入我數,慈濟團體無需承擔任何風險,我賺到分出來,佢就可以做更多.

總之,我有自知之明,如果我參加會友大會執事一句憑信心就睬我有味,乜都通過到.
我唔祈望改變這些機構以洗錢去服務他人,但我可以開大開細同轉個水龍頭,去支持那些量入為出而唔係憑信心就奉旨貪得無厭既機構,令佢地祝福到更多人.

唔好話呢招唔 work.
約十年前,什么公益金,宣明會,紅十字會的 admin fees 通通高過 20%.
隨住勁多人鬧爆同因此罷捐,加上那些機構積極投放資源去簡化捐款流程,改善其宣傳手法,以致收入增加,支出持平,成功令 admin fees 跌到20% 以內甚至低於10%.

當然,教會牧師最愛問,"你儲咁多又唔洗有乜用?"
更重要既問題係,這一切通通可以係我積聚財富的美麗籍口,如果有錢會容易為富不仁,要格外小心,咁點樣小心呢?

下次再分享.

註一
唔賭博因為我對賭博定義是:
根據數學的或然率,而數學是按神旨意而成的普世定律,卻被博彩公司用上不公平的遊戲規則,令到這成了長玩必輸的遊戲. 所以我唔玩,除非我可以 a. 打破那些不平等條約,b. 做莊, c. 有料出千, d. 做博彩公司股東, e. 做澳門人,年年收錢
但 a. 冇可能,除非圍內玩下
b. 因為不公平所以唔合神心意
c. 因為會被人打死,亦唔想花時間學一門機會成本唔高既手藝,
d. 同 b 類似,再加被政府抽高稅而且股價已 priced in 那不公平的額外盈利,股價升與跌純粹是某段時同資金向賭場流入的力度高低所決定,我計唔惦呢尐盲流數.....
所以,我係唔賭博,呢尐叫智慧.
e. 呢個要研讀約翰福音9章,研究下點樣生來係澳門人,或自己做澳門人鳥. 然後耶穌會問你,生下來還是自己做,你管他! 總之都要任何人身上顯出神的榮耀,然後一腳伸你落池,大聲咁講,"大利大古米" 翻出來就係"你醒下啦!"的意思.

不過,我以前有個老細成日笑我,話我呢套理論正確,但對649除外,理由係649買小小可以賺多多,至少公司同事一起買,呢尐叫買保險,唔中得淡笑,中左唔會怨.

我覺得佢有道理架,不過我話,每周2蚊,加上買同核對所花既時間成本,我會用來投資,買你地中唔到. 假如我每年回報15%,四十年打落去,我會相對地比佢富買26萬,當只有一半機會也有13萬,機乎是穩勝. 而他則賠上 4千蚊,而中獎同事間分到一百萬既機會近乎零.
每次講到呢度,佢都會叫我返埋位做野.

註二
20萬點買到屋?有樣野叫槓桿效應,以25%首期計算,在加拿大20萬可以買間值80萬不錯的屋子了.

於是,portfolio 裡就有80萬股票和值80萬的房產,比重各佔一半,共160萬投資了.

註三
你可能唔明,點解咁多有錢佬咁孤寒(土豪,暴發戶和富二代唔計)?
咁有錢但唔捨得洗,為乜?唔辛苦咩?

我話你知點解,這可能源於中國人傳統智慧:積榖防飢.
也因為有錢人較叻賺錢,對佢來講,洗多一蚊就係減少左用果一蚊去賺錢既機會.

假設每年能賺15%,廿五年後一蚊會變33蚊,四十年後變成268蚊. 

所以今日洗一蚊,就好似洗緊幾十蚊咁.
於是乎,呢類人有三個古怪思想:
a. 每次都要計清楚洗得值唔值,有冇更好既 deal,
洗左一蚊能唔能夠換到至少值超過一蚊,又或者比錢更有價值既野.
b. 永遠唔洗老本,而淨係洗賺到既一小部份.
違背這規定,會覺得自己好低 B.
通常對自己,會嚴守呢套限制,對所愛既人或者慈濟機構會寬容尐.
c. 當你以為佢有理冇理好孤寒你就錯,當佢發現一個商機,佢可以瞬間一大舊錢紙拋出來,狠狠的 show hand. 
有如聖經某天國比喻,商人發現一珠寶,就不惜變賣一切去奪得擁有它. 你係商人,就好容易讀明這個比喻. 天國係一門大買賣,長線投資,值得你 all in ,係唔 all in, 就笨果種.

註四
教會同慈濟機構在理財上通常偏向(過份)保守,亦有許多限制,他們通常表現,比香港財爺更不濟,賺就賺最少回報果尐,洗就年年洗凸.

所以他們的理財之道同月光族冇分別(但通常會用在較有意義的事上)
他們也積聚財寶去攪基建, 但卻不斷被地上那隻叫 inflation 既蟲子咬.


我對佢地冇任何期望,因為佢地根本唔係果科,除左小數找投行管數或者 Bill Gate 個 foundation 做得唔錯之外.

也許因為這種賺不到錢又狂洗錢的理財習慣,令教會非常戀棧於建堂, 因為這總比拿現金保值. 但既然教會也投資房產又有什麼資格批評人家積財呢?

註五
對教會而言,就算對事工鏈到盡,對建堂植堂卻好疏爽,一句憑信心,花上一百個事工也省不到的錢也在所不惜,問題係,一個事工能建立多少人尚可以數據作量化和評估.

花費在建築物上的 "admin" fees, 是有果效與否,有冇一個理想既系數,唔知!但可以肯定,花得太多,個 marginal benefits 就越低.

Wednesday, May 6, 2015

買樓迷思(4) 絕望的香港人

"話你乜乜怕你嬲"的原創人,最近出了新歌"這世界太荒謬".  道盡今時今日香港未上車的朋友買唔到樓既慘況.

點解上唔到車會咁慘呢?

想當年我地祖父母輩偷渡來港,男的做鬼叫你窮頂硬上既苦力,女的跟住寶珠姐做工廠妹 or 在家"臭"大班仔女....
全家大細住鐵皮屋就是租個房仔一家十口塞在一處,似乎又冇咁大怨氣喎!

依家我地投訴誠哥,四叔係地產霸權,新盤係棺材房同廁所廁所廁所,佢地太無良云云.
事實是: 信報"經濟3.0"用總住宅面積除以總人口作了一圖表分析,發現香港人的人均住屋佔地呎數在過去幾十年其實在不斷增加中. 也就是說,即使住棺材房,其實每個香港人,理論上居住空間係寬敞左,而唔係淺窄左.

有另一個分析指,雖然平均樓價對比平均人工,跟卅年前比較,距離由5-6倍,拉大到去年逼近18倍,但當年供樓達二分息,而今日只有兩厘,其實借款期裡樓房的總開支對比平均人工,跟以前相比,亦不見得是差天共地.

為什么以前我們父母輩做到,捱十幾年上到車. 而今天的年輕人,大學未畢業就已經埋怨供唔起樓?

從實際考慮去分析,就算上一代同呢一代因為利息由二分降到兩厘,以致供樓壓力差不多(就算係真),但當年有三個機遇值得注意:
一,中英聯合聲明出爐,鐵娘子不慎"跌倒在街上"(呢句野用廣東話就直接同傳神得多),於是我地阿媽果代有移民潮,令人材外流,升職機會擴大,加薪較快
二,香港由製造業成功轉型為服務業主導,加上成了中國對外的唯一窗口,都令整體經濟維持高增長及高就業率,市場對畢業生/專才需求殷切,你肯搏肯捱,遍地都係上位機會.
三,樓價被恐共思潮壓住,升得冇咁癲(90年代初至97,印象中係升得最誇,之前80年代係ok架).

相對依家,除了最高端既醫藥金融才俊,你要跟浸完咸水回流,內地精英/廉價勞工,以及死唔退休既"老而不"爭飯碗,人力資源供求逆轉,人工升幅自然有限,樓價卻高而又高.
有兩層樓以上既業主見樓價升,當然唔放過加租機會(唔怪得佢)
因為未能上車既人如要離開父母,與丈夫/妻子聯合,總要有個瓦遮頭. 於是,喪失議價能力,就算加租都焗住繼續租 :(
而加租又令百物騰貴.....

如此惡性循環下,你人工加多一點,升埋職又如何?儲錢反而少左,因為支出比收入更多(或繼續同屋企住),於是你要儲夠首期,就好似隻田鼠在無敵峰火輪追住塊芝士,係個永遠追唔到既moving target.

令人感到納悶的還不止這些.
成功靠父幹已經成為潮語.
每當聽到什么80後成功故事,就會出現這種關聯評述.
是我們仇富兼吃不到葡萄嗎?

人是互相比較的動物. 人有我冇遠比人人都有或人人都冇更唔開心.
五六十年代,人人都冇,個個肯捱,唔會怨亦唔識怨.
家陣大家係不患寡而患不均. 尤其是當我們發現各人的起跑線在資本和人脈關係網不對稱的情況下不再一樣,被壓下的一群就變得不安和絕望了.

你可能會話,香港政策向來是向精英和富人傾斜,為什么以前一代冇鬧爆?

首先,以前冇發聲唔代表依家發聲係錯. 以前打電報,依家用 facebook, 難道復古,改穿漢服才是對么? 若真要復古,唔洗民主,唔洗真普,我們就更該放棄資本主義,自由市場,推井田,更該廢棄外國勢力在上世紀初滲入我國的洗腦思想 - 共產主義,重建以仁為本,以禮待人的儒家思想.

第二,以前港英點都有套規矩,令社會中低層家庭可透過讀多尐書,超勤力或者勁儲錢慢慢爬升.
有多條往上流的路徑,至少給人一個夢/機會.

今日呢?
快跑的未必能贏,力戰的未必能勝....所臨到眾人的也不在乎當時的機會(傳9.11),更看重背景,資本,關係,邊個話事.

政府或財團一次次帶頭鼓吹不公平的競賽和剝削.
惡人不單止冇事,仲扶搖直上.
叫人依法,令自己可以無法無天,港視冇得攞牌,亞視如果唔係王征貪得無厭仲有"牌"玩,梁特利益輸送,中港矛盾/水貨客問題就冷處理,三跑/之前東北發展咁多爭議同實際考慮就打橫泥都誓要通過,高官有利益衝突或公然受賄唔會被控,或者一招破產可以繼續住乜乜灣,他曰重新來過,連債都唔洗還.....你可以點?
還有班白痴好意思會叫你唔理好醜,順服掌權者,變相助紂為虐.

或者中國比香港更慘程,又或者對比東非飢民香港好幸福,同北韓鬥香港超級自由,但苦是一份感受,冇得量化,唔應該比較,覺得慘,就係慘.
在這個不患寡而患不均,起路線唔同,政府搬龍門的世代,有人絕望了,亦有人嘗試突圍而出.
節衣縮食,捱面包,同女友行公園當拍拖而成功上車
但佢咁做居然被人鬧爆.
這是叫不到葡萄的結果嗎?類似的故事換轉廿年前根本沒有新聞價值,亦唔會有什么社會迴響.
(印象中,那些年我們只會取笑小甜甜和邱德根,做乜咁x孤寒.)

一個怨氣咁重既社會,偏偏有樓冇樓既人各佔一半,正好是牛奶味與朱古力味之爭,房屋政策該何去何從?
教會又該如何牧養這兩群會眾呢?
今日這時代經常令我聯想到以利沙治好強國亞蘭那高官乃幔的故事,乃幔的痲瘋病被治好後,要重賞以利沙,以利沙卻堅持不受.
於是乃幔求以利沙兩件事:
一, 恩賜兩代泥土,此後一生只敬拜耶和華神
二,佢做大官,仍要陪阿爺入廟拜神,佢入廟一事,求以利沙唔好計較
以利沙准了
之後發生一段插曲,以利沙的僕人基西哈跑去追回乃幔,求銀子和衣服,得到雙倍的獎賞.

按理說冇任何問題,收取應得既服務費,朝中有人亦好辦事,賺到錢應該開感恩大會分享見証.
不料以利沙竟然責備基西哈,"這豈是買房買地買葡萄園既時侯呢?"
於是基西哈就患上痲瘋病,後來他似乎離了以利沙,服務以色列王,當政協?局長?人大?

係呢個時代,教會租也好,自置物業也好,我相信跟一切香港人一樣承受無比壓力,我地係以利沙,還是基西哈呢?
離地,耶能,係無理的指罵,還是教會真患上路人皆見的大痲瘋呢?
又或者教會好謙卑,唔會做以利沙,亦唔覺自己似基西哈咁衰. 係呢個大時代,還是不管別的,努力傳福音,同竭力保守所有人(有樓,冇樓,以利沙,基西哈,乃幔,阿爺,以色列王....)合而為一的心,凡事包容,互相尊重.
(所以,有人扮以利沙去責備基西哈,就係扮以利沙果個唔岩.)
更重要係,因為要傳福音同合一,我們要更多捐獻,唔該!為左神既國,為左快尐還債然後為神借更多,你有樓冇樓都好,有冇信心奉上更多?

Tuesday, May 5, 2015

多元社會下的基督徒 05 詩篇 19 篇 part 2 v7-14

神既話語比金子可羨慕,比蜂蜜更甘甜?係真唔係呀?究竟神既話語有乜咁寶貴呢?

Friday, May 1, 2015

bilibala fund 2015 / 4月表現

截至2015年4月30日, bilibala fund 今年錄得 20.4%回報(剔除一切外匯影響),較預期6.6%為佳,終於在此消彼長下超越歐羅50指數的 15.29%,亦略勝恆指 19.2% ,和中資指數 20.4%打平手.
所謂一山還有一山高,上証指數升破4400點,年頭至今升37.3% (對比 bilibala 淨亞洲股 30.3% 回報,依然勁好多).
四月份組合回報由10% 升變 20%升,大家都知係中國股市發癲上升啦. 月尾兩三日才有小小回落.
依家大家都估佢會升到幾多
3萬2? 3萬4?
仲有幾時回. 估佢唔會一支箭再標上高尐
我估就算回亦唔到好多尐人就忍唔住入.

之前講過如果離譜離基本因素太遠,冇貨唔會考慮,有貨的會分段沽出.
我要賺,但唔敢玩太高風險的. 對我來講,波動唔係風險,人人沽唔係風險,佢佢有價但我覺得佢唔值就係高風險.
我當然有可能經常估值錯誤,但我更信小心駛得萬年船.
舉個例,如果平安保險過 120,騰訊過180,中國人壽過42,我會覺得有點太高. 中國移動過了110,而我亦已經放左4成. 由第三大掉到第六大.

油價反彈,油股由 breakeven 到賺到些少,在 google 同 tiffany 都冇野好講既情況下供獻不少.
加元亦因此回升了許多,以致 bilibala 以加元計算的回報下跌 6%,總的計算,回報加元計仍然由3月18%升至4月26%.
但我唔覺得強美元會在短期轉勢.

最後一提,加拿大樓價,溫哥華同多倫多勁升中(6-9%),其他所有地方,只有0-2%微升. 以為只有天氣才有這么大不同,點知地產亦一樣.
這令今年 billy 的烏龍基金威番次,回報率勝過 bilibala.

Top 15 Holdings
1. Google Inc
2. Ping An Insurance
3. Tencent Holding
4. China Construction Bank
5. Tiffany + Co
6. China Mobile
7. Walts Disney Company
8. American Express 
9. Wells Fargo
10. Starbucks Corp
11. General Electric
12. Royal Dutch Shell
13. Johnson and Johnson
14. Decker Outdoor
15. Berkshire Hathaway

Asset Mix by Region
1. USA 46.3%
2. Asia 31.7%
3. Europe 11.5%
4. Canada 10.6%