為什么教會會出現七級豬症後群呢？
這一切都從教會的一個信念講起:
"事奉一定會經歷神"
問題係: 究竟事奉是否一定會經歷神呢？
小時侯阿媽教仔:
"仔啊！你要比心機讀書啊！因為書中自有黃金屋."
人大了，結果發現廿幾年寒窗苦讀(係香港)未必供得起一間公屋. 方知道睇相佬呃你十年八年不算得什么?
事奉呢家野，又會唔會呃你一世呢?
最後發覺自己係隻大笨豬?
唔洗驚！
憑著我在教會打滾多年的經驗以及對無數信徒的觀察，我實實在在的告訴你們，在七級豬的教會世界裡面，事奉係一定會經歷神！一定會，牧師同弟兄姊妹冇呃你.
只是我話個秘密你知，唔係人人都能夠，只有三種豬能夠充充滿滿的在事奉中經歷神.
其他豬，膠膠豬罷！(即係瞓教，或者直接尐: "早抖啦！")
當你了解這三種豬，不但之可以經歷神，而且你會明白為什么七級豬症侯群得以在教會裡生存滋長，能以超乎豬人之上，貫乎豬人之中，也住在豬人之內的根本原因.
所以，凡有耳就應當聽.
自從佢既出現，每日都好似充滿陽光咁
第一種事奉能經歷神的豬
係不斷為七級豬症侯群源源不絕的供應新血，一班初信(疑似矇盛盛，冇得剩)既乳豬.
曾幾何時，我也是隻乳豬.
果時我覺得神真係好錫我，我雖然好多年冇理過佢(中學做了離教者)，但佢仍然揾番我，叫我返到佢身邊(番返教會).
我雖然渺少，神仍然透過弟兄姊妹(上級豬)邀請我服事佢.
可以為佢做番少少野(即係做豬)係我既福份同榮幸，當時只會介意自己太多野唔識，做得唔好，影衰神，點會介意做得太多？
記得第一次做佈道會招待，我緊張到雙腳不停打冷震，仲驚過班"新"朋友，唔識笑(四萬咁口冇我份，年初四咁樣都冇我咁惆悵)，又唔記得尐人名(依家都冇丁點長進).
只懂得到時到侯將張場刊遞出去.
奇妙是: 那些人就如同被神感動似的伸手接過，報以微笑，或一聲唔該.
嘩！幾大激勵呀！(呢個係我，幾低B)
第一次上台講見証，練左不知多少次，又廣發英雄帖叫人為我祈禱，求主幫助再幫助.
最後，當然分享成功，仲記得臨尾講: "願一切榮耀歸與神". 冇穿冇爛.
我幾感謝主呀！
(好似奧運，教練會叫運動員先多謝國家，你話佢假咩？那你肯定未做過乳豬)
我只不過事奉這一點點，神就叫我經歷多多，之前讀書(信主果時大學二)好緊張，人會進入崩潰狀態，考完試會全身虛脫. 但信主之後可以處之泰然，輕鬆面對.
當時最喜歡唱"主信實無變"和"全能父上帝"
自從佢既出現，每日都好似充滿陽光咁，真係覺得哈利路亞充滿愛架.
當乳豬愛上主，上級豬亦變得可愛，佢地既關心好似太陽咁溫暖.
果陣時成日會諗:
點解佢可以咁愛主，咁屬靈？
我幾時先可以好似佢咁祈禱咁有力？對聖經咁熟咁理解？
(依家點睇番同一班上級豬？
唉！做乜講呢尐?)
這種近似初戀無限 touch 既歡愉，唔知你有冇經歷過？
如果初信果陣冇，too bad, 陰公豬，你以後都冇餐屎(chance)，因為神只應許過人憑信可重生，卻冇講過一隻人老豬可以變返隻乳豬.
sorry.
但不管怎樣，乳豬都唔可以好似叮噹同星矢咁不要老伴你長高(多尐豬膏就有你份).
也不知什么時侯，這種初信的愛與誠既消失了.
有人話我地把"起初既愛心"丟失了，但點解我即使十分努力和真心悔改，求神比我智慧，我都冇辦法尋回那墮落的位置和因由呢？
難道往事真的只能回味？
你做唔番乳豬，可以點繼續經歷神？
唔洗驚，神既恩典夠用嘛！
父啊！你既美意本是如此
你做唔番乳豬，但可以做第二種豬去繼續經歷神，第二種豬就係唔識上樹既豬乸.
教會既大使命就係傳福音(正版耶穌既大使命應該係叫人做主既門徒，但 who care? 叫你傳就傳啦)
一個七級豬教會，其實就等於一個祈求生養眾多的豬欄.
由傳福音到跟進，由栽培到同佢傾計等佢升級做豬，做更高級的豬這是個十分可佩服的任務.
當中多少生命如此誕生和孕育出來，需要諸多動物力和財力，以及工序才能令豬場的生意蒸蒸日上，持續增長呢?
你話，教會唔係 run 生意，我地係為主事奉.
你講得岩，所以你在這些工序中唔應該做一粒冇生命既鏍絲，而做到一隻生養眾多既豬乸，就一定會經歷神.
來罷！成為這豬欄裡的豬乸啦！
我雖然橫睇點睇都係個佬，但我亦做過豬乸. 等我分享下作為豬乸的見証
我實實在在的告訴你們，做豬乸真係好正架！
十隻乳豬/豬仔有八隻養唔大，關心多三四次，佢蘇唔出或者唔蘇你，你咪由佢死lor.
冷酷？但可以點啫？
逼唔到架，主耶穌都教我地，佢唔肯接待你，你就將腳上尐泥都擦走，大家開心啦，豬仔鐘意滾泥嘛，你唔識趣，繼續"泥"，佢都係叫你"滾"架啦！
十隻淨番兩隻，一隻會變做陰公豬，另一隻就勁啦，皮香肉滑，令你回味無窮既乳豬！
像抽獎一樣，你好彩養到隻乳豬，你咪做到豬乸，經歷神 lor.
之所以經歷神係因為你唔覺得自己做過尐乜，講過尐乜，但佢爆勁喎！覺得你好關心佢，你又屬靈又愛主，令你本來已經石沉大海既心，飄飄然咁飄返上天國.
更重要係佢既改變，你真係睇住隻豬日日咁大咁成長喎！
幾有滿足感呀！直程成個人後生翻晒！
自己又冇乜做過，仲唔係神既工作？幾經歷神呀！
當然，係佢"醒悟"過來之前，你最好由佢獨立，因為一百隻bb豬只有十隻乳豬，當中九隻成長後會中七級豬症侯群，變成上一篇所述果五種死樣.
服事那些變成果五種死樣既豬(容我統稱他們為人老豬)，係遠遠比唔到果份經歷神既實在過你. 他們在教會同鳩烏冇乜分別，分享來來去去果幾味，工作如何如何忙，屋企什么頭暈身興，呵唔出屎等等，不然就係百冇(冇分享，冇事，冇投訴). Action plan 永遠三幅被，但一切照舊，除了老左，肥左，尐仔女又大左，唔好期望人老豬有任何改變.
當你明白到教會係個豬場，生養眾多係佢既大使命，所以佢要重點訓練豬乸去養大乳豬.
而豬乸可以因此經歷神，又在養大乳豬，見到其生命改變又唔頂頸中找到滿足感，如此一個這個無限 loop 的七級豬生態圈，你就唔會怪，話教會出問題.
學你建議去花精力在你同我呢尐人腦豬身上，不但止乳豬欠奉，豬乸都比我們激死. 更何況豬乸既天職就係養大尐豬仔豬女. 你已經大過豬，叫你幫手做豬乸，明明益你，令你可以經歷神，你仲係度阿豬阿 jor? 仲好意思怪教會唔照顧你?
學超人話: "你估我好得閒呀？"
我當然要好似耶穌咁將時間花在未來的彼得，雅各，約翰身上啦！
父啊！你既美意本是如此.
對於馬斯特(同埋已經長大既我)呢一班做唔番乳豬，偏偏諸多計較做唔成豬乸，或者老是養唔出乳豬，只生出死豬同陰功豬的人老豬，點算呢？
唔洗驚，神既恩典仍然夠用嘛！
仲有第三種豬！
篇幅太長，這裡先賣個關子，過兩三日再post.
你可以估住先，睇下第三種豬會係乜豬？
Posts
