組合在年頭暴跌，以$計，虧損第一次超過08海嘯時的幅度. 幸而去年底重組更有效發揮現金流和對沖所帶來的抗跌力，以致在低位可以守住，而且作少量趁低吸納.
加上今次在判斷中國經濟及其對市場影響又大致準確，令組合能夠迅速復完.
未來5月會再做多一次重組，到時該可大大提高對應大跌市的承受能力.
市升左咁多，bilibala 仍對 American Express 上升空間充滿信心. 此外歐洲銀行 Barclay 及 UBS ，藥物股如 GSK, Sanofi 估值亦相當吸引.
油股反彈了不少，為組合提供不少進帳，但未明朗下，不會再增持.
面對別人攻擊侵掠，令我引証到一點，健全的防守最重要兩點: 一，抵受得住攻者的第一擊，二，能致命的反擊.
升上八級鎮已有兩個月，忙於攻略以致疏於防務，最近發覺連七級鎮兵也可突破我的防線，直搗黃龍. 為什么？因為對方集中一點攻我，我的守器生命值不足，幾野就死，而其他反擊器打埋對方道卻無法至之死地，給對方用補命咒回復的機會是也！
原來這跟美蘇冷戰是一個道理. 雙方瘋狂發展足以毀滅地球幾十次的核武，但同時間，雙方都將武器藏入地底深處. 也就是說，即使一方集中一點用致命一擊，死的只是人民，而非武裝，那時，對方卻可反擊，同樣傷不到武裝，只死人民(exactly COC 中戰爭對決，你將一切擺在外圍，武器放中間)
跟 COC不同的是: COC 的人命賤過泥，財物如浮雲，建築不會毀掉，所以你 war 打輸左，被掠，最本能做法是打其他人，搶到幾多得幾多，所以戰爭越多，會鼓勵你我打得更多.
現實裡，即使國家視人命如泥，但當一下子死左幾億人，佢個江山一定不保，呢個時侯，佢唯有用報仇，殺番對方幾億人，動搖對方管治去還擊. 殘忍罷？
不! 和平得很呀!
當你發現致命一擊只會引來還擊，而且會動搖管治，你當然會一動不如一靜，你唔會真打，但會不斷增加軍備，用喊打去話比對手聽，"唔好亂黎，我保証你會得不償失架！"
這就是二戰到90年冷戰，軍備競賽的由來，換來相對廿世紀上50年更和平的有趣結果.
來到投資世界，散戶要在股海中賺錢，經常希望有水晶球幫忙，低買高賣. 現實中，要每次最高位離場，最低位入市近乎冇可能，較務實做法是，有實力承受下跌，然後有實力在人人怕接下墮飛刀時吸納.
實力敢決於自信(旁人對你的信任)，低/零借貸，足夠現金流，聲浪中獨立分析的能力.
這就是投資的防守武器.
醫生同丐兒，大家都係"衣"，卻有天淵之別.
我當然唔想做丐兒啦！
能原校升讀中一，還挨車邊入讀精英班，對父母來講，是延續了他們讓我做醫生的夢想，對小時侯的我卻是惡夢的開始.
默零分
小學靠短暫記憶，父母死逼，補習，補習再補習而賺得高分的我，上到中一，除了兩個較有興趣的科目數學和中史，其他都食屎. 成績都一落千丈，中英文跌到合格邊緣，默書零蛋成了新常態.
當時, 老師總喜歡將測驗卷由高至低或由低至高的派給同學，作為一種當眾表揚和公開羞辱.
起初，我會紅都面埋，到後來已經麻木了. 這叫"分到到無求羞自無".
不過有一次當老師分派默書簿，成楝鏟在我桌前，"邊個又零蛋？唔洗審又係你啦！"
我真係好嬲，比焗腸更唔順氣，雖然我真係零蛋. 但個死肥婆憑乜將行動升級，咁樣羞辱同睇死我?
我點解零蛋？係我蠢？太懶？定乜？我當時就已有先見之明，認定係制度問題:
默書幾百字(連標點)，錯一個字或一個標點扣五分，錯廿個就零蛋，我其實錯 5%都會零蛋，而唔係得反過來得95%，你話係我有問題，定佢有問題？
不似大雄可以將測驗收埋，返屋企父母要在卷上簽名，我將觀察而得制度問題講給父母聽，可謂一針見血，誰料被他倆一句KO, "又唔見其他同學食蛋！你懶就懶，仲性賴！"
將學童的 5% 錯誤放大，然後判定佢冇用，將來會做乞兒. 完全忽略其餘 95%一切做對付出和成果，再因此壓逼學童補習無間做，付出更多，還以為這叫作育英才，這就是這么多年的教育思維.
睇死我
有次為了一科學測驗力煲，誰知父母居然話，"轉死性？咁勤力？唔好俾我睇死你得三分鐘熱度！"
我被一句打沉左！
被外人睇死我會發奮，被家人睇死我就想放棄，反正我當年讀書讀到咁辛苦除了為他們的夢想，也不知為了什么.
心想，"初中比小學艱難，高中/會考又比初中辛苦, 大學課程比中學深，出來做野又比讀書更悽慘，我依家(i mean 當時)都捱到咁，將來點？"
在這個金字塔式的制度中往上爬，每爬一層就有一批人被 kick out，被 kick out 果一批無論你講乜野人生仲有機會，仲有好多出路.....你知道無論多真誠呢尐只不過係暫時安慰下你的台詞，you are loser 卻是個事實. 但即使你力保不失，繼續爬升，那份壓力，那種怕有朝被 kick out 或者風光不再的恐懼卻永遠伴我成長，那人生還有什么意義呢？
廢中廢
以前成班同學仔，喜歡鬥高分(是同學也是對手，唉！這就是香港，咁多年都冇變). 但中一開始我變左氈屍底，成了被嘲笑的對象. 加上我打機唔叻，打波又屎，仲唔識玩任何樂器，到中學連成績也不行了，真係廢青中的廢青(註二).
我覺得自己變左人人心目中的大雄，但我左等右等，也遇不見生命中的叮噹.
勤力有時亦有回報，大雄亦有發威的一刻. 如前所述，那次科學測驗派回成績，居然考到久違了的91分，
那天中午，我見到同班高材生"賓仔"在班房門口被阿媽媽叉到喊，我(大雄)走埋去慰佢(千載難逢).
點知......
賓仔飲泣著哭訴，"我真係盡左力架，但阿媽仍然鬧我點解得98分，另外果兩分去左邊？點解咁冇用喎!"
嘴已O.
我當時把口仲安慰緊賓仔，個心已經死左.
我發現就算成績由大雄變番賓仔，總管人人期望可達到，媽媽的希望只會比天高，人又怎能勝天呢？那我努力作什么？
當年點
父母日哦夜哦，叫我要發奮圖強.
每晚，真係每晚，食飯果陣都令我背脊骨落，重複又重複他們追悔莫及的往事:
爹地考到入理工，讀機械工程，讀左一年覺得辛苦，起薪點又不及他教補習咁多，就 quit 左.....
媽咪中學畢業就要出來工作幫補家計，以致後來錯失了幾次進升機會.....
所以他們期望我唔好學似佢地，努力讀書，最終做到醫生，可以幫人又可以衣食無憂，好似阿邊個大伯，阿邊個個仔咁，你睇人地幾叻！
最近許多青少年自殺，有人話佢地嬌生慣養，不似以前人那么吃得苦.
感受往往係主觀，人生經驗又往往無法 transparent. 就算將我的零分和耶穌釘十架及非洲飢民比較，一來我唔係佢地，佢地亦唔係我，你將我同佢地比，同你以前比，咪等於你繼續否定我. 我同人比叻已經夠廢，已經係廢青，連鬥苦都廢過人，都唔夠你當年叻，又比耶穌同飢民都更冇用，更無病呻吟，ok, 你贏，你再次 KO 我，唔該死開尐！(不過呢個時侯"安慰者"通常會繼續"安慰"，不打沉誓不休. 佢地說服你係出於關心，就覺得係關心架啦!)
時代唔同，總有它的獨特處境和挑戰，要比較當年，倒不如了解當前學童的處境和挑戰，再透過我們當年身在困局的掙扎，去嘗試和他們感同身受.
大家受
在成長過程中，我漸明白到，其實媽咪爹地只係想我健健康康成長，有份ookk既工作，唔洗連養頭家都唔得惦，就係咁多.
問題係，佢地覺得如果唔將標準定高尐，我就會懶尐. 如果等我慢慢培養對什么什么產生興趣，攪到佢地嘔血，我都只會對睇電視，捉棋，睇漫畫有興趣，對學校課本同背 model answers 視為受苦. 那么自由波只會科科肥佬，升唔到班，講乜都冇用，當然要逼啦！
更何況競爭咁大(唉！家陣仲大)，你ok 都唔代表你會ok, 要 sure win, 咪要努力尐，要補習，學多呢樣又學多果樣.
講真，係因為驚.
唔怕一萬最怕萬一，結果個細路，佢全家，全校，以致全個社會都在這種壓力下成長.
有人話自殺因為教育制度，亦有人話太複雜，不能簡單疏理.
以前沒有幾千人，大陸人過來同你爭一百個幼稚園學位. 你唔喊，識介紹自己就收你.
以前，我成績跌左，由精英班踢左出來，默書由五分一字變番兩分一字，就得到即時解脫.
以前沒有68狗，沒有唔焗腸，沒有上大陸膠流.
當社會格局變少，但人卻不斷加多. 即係僧多粥少，人與人資源爭奪就變得激烈，加上正苦不但廢而且處處火上加油(註二)
咁既情況，父母逼仔女，老師逼學生，當然不該，但恐怕也是逼於無奈， 也是被逼. 更不該是逼左廿年，畢業又如何，還不是面對一個不該的正苦，打扮不該的牛工？!
我咁辛苦為乜？
睇下人
在你爭我奪底下，同輩就有比較，長輩也喜歡為我們樹立一個個榜樣.
總喜歡拿仔女跟別人比，什么大伯，表哥，表姐.....你睇下人地點點點(雖然我知道，我的一眾舅父舅母，也是這樣對我的表弟妹訓示，"你睇下表哥...")
父母當年特別喜歡將我和鄰家(小時父母要工作，我住在婆婆家)比我高班兩年，跟我情同姐弟的一位姐姐比較. 人家全班三名內，佢勤力，令人誤會我好懶. 有幾年時間，放學會一齊做功課，溫書，食晚飯. 佢背書既聲音，總是不斷騷擾著做完功課期望把握父母放工前的一兩小時專心睇電視的我.
不過，這位姐姐同樣日日被阿媽鬧爆，而且得閒被打鑊金(多可憐！據說因為她一言九鼎喎！)
一起溫書(我係個除左睇卡通打機，集中力好差既人，溫書會不斷遊魂同講故仔給其他人聽)，有時也會抱怨說，"如果我讀書有你一半咁勁，爹地媽咪就唔會成日鬧我."
而那姐姐總會臉色一沉，咬咬嘴唇，跟我說，"如果我父母有你父母對我一半咁好，我就幸福了. 你知唔知其實你已經好幸福架！"
如前所述，話人家苦不及你當年苦，等於否定人家. 而當父母將你跟人比，又會把你比死.
可是說也奇怪，那姐姐算是個平輩罷！她比我勤力，成績比我好，可是家境比我差，同父母關係也非常惡劣. 她的話對我反而很受用. 我果然 clam down 了，覺得自己確實比上不足比下有餘，父母雖然經常很兇，但冇乜打我，周末亦會帶我去玩，成績達標又會買玩具給我，佢地逼我，就忍下啦(當時係咁諗.)
時光飛逝，轉眼廿幾年！
賓仔由細到大都考頭三名，中大高材生，依家係某上市公司𓄃下子公司既cfo, 間中會在某些剪彩活動見到佢站在照片的最邊邊位置.
我做唔成醫生，做左個金融佬.
三個月前，媽咪返港前我陪佢行街，講起讀書，佢仍然話，"好彩我當時我咁逼你，如果唔係...."
我唯有唯唯諾諾的點頭稱是.
至於那位鄰居姐姐....
她跟父母關係越鬧越僵，學業壓力日增，一家人都被診斷患上精神病.
媽咪好努力帶了他們一家信耶穌，情況似乎好轉了，但後來又轉差了，長期，多方面，壓力，藥物的副作用, 令姐姐變得沉默，不言，不語，不哭也不笑.....
我移民之後，某天，我還在讀中學，英文還是僅僅合格，還是每日水皮地打緊機，聽到媽咪來電，告訴我姐姐走了，跳樓，自殺了，報紙亂作新聞，媽咪當她像囡囡般，好失落，在幫忙辨身後事，在投訴報館中.....
近兩個月在臉書有人不斷些牙關於自殺的報導，及後不斷些牙正能量，再後來，話報導是會感染和模倣，而正能量是冇用，最重要係聆聽，係陪伴云云.
當一個曾經和我，叫做生活了三，四年時間的人這樣離開的時侯，我們都被感染，變得不言，不語，不哭也不笑，電話掛線之後，我還是繼續打機，之後那幾天還是繼續打機，媽咪在香港，繼續辦後事而奔波，報導亦繼續成為我們的困擾，冇人接受得了，亦冇人希望舊事重提，事件成為了兩家人之間的一個禁忌，因為一提起就會勾起一切忘了卻忘不了，一幕又一幕的愁傷同怪責，你問我係邊個既錯？點解冇人事前做尐野呢？我唔識答你.
你話我冷血也罷，直到今日，我仍然認為她很堅強地活了廿年，珍惜她讀書的機會，盡了學生的責任，因為種種原因，生無可戀，最後選擇結束，我能夠理解亦尊重.
如果係我，會更早放棄.
我不贊同自殺，我每次聽到一單又一單都會勾起那份早已忘了卻忘不了的回憶.
冰封三尺非一日之寒，人話要陪伴，要聆聽，究竟什么是陪伴？什么是聆聽呢？你做到同行聆聽者嗎？
註一
運動 = 玩，打機亦 = 玩，卡通片冇益，只有做好功課又有好成績才有睇卡通，運動和打機的機會.
放學要補習，周六要上乜班乜班，試問還有什么時間？有空當然只會煲卡通，於是我變左個行行下路都會扑低又反應遲鈍的文弱廢青.
註二
以前作文沒有像"我最尊敬的68狗"這類題目;
以前畢業不用上深圳見工;
以前大學，圖書館，電視沒有政治審查，你沉默，你冷感，你既事. 依家你唔撐正苦同祖國，就冇前途; 你反對，就有人識做，會趕絕你同你一家，甚至會被失蹤
十九世紀是一個崇信科學的時代，當一切現象都彷彿能以科學解釋，當大航海歲月過後，世界彷彿再無人類未到過的地極，但作者用其豐富想像力，寫出一個個經典的海底二萬里，從地球到月球，以及地心歷險, 八十日環遊世界....人類繼續探索故事.
這些故事鼓勵了世世代代小朋友的求知欲，當中不少人長大後，成為出色的科學家，天文學家，地質學家，航天科技人.....
星空之上的宇宙是怎樣呢？
見到大海，大海彼岸是什么呢？
從大堆經濟數據和金融現象，可以找到什么原則和理論嗎？
我們對真理，對認知的渴求究竟有幾大呢？我們又會為探求花上多少時間和功夫呢?
我曾經被人數番質疑，花這么多時間在世上小學上有什么用？還不如花多點時間了解神的話語和心意罷！
叫人多花時間在聖經和教會裡面，不要追求"世界"我在講壇上亦聽得太多.
1. 望見星空，最重要是讚美神創造
2. 聲到潮聲，願你不忘記感謝神
3. 遇到挫折，要知道這是神的安排(背後衰左原因反而是次要)
4. 為主植堂，就憑信心(太多巧量幹么？你點解冇信心?)
5. 擇偶當然要找愛主的
6. 面對政壇惡棍如689，要相信神有審判，政教分離，教會中立.
7. 什么叫大是大非? 你在現場嗎？你一定100%對嗎？憑乜論斷？
我覺得這種意識形態令信徒對一切事物的探求上都不感熱衷，甚至消極兼被動.
傲慢與
但另一邊廂，我們對聖經認識卻不見得因此積極和了解透切(至少我偏見地認為)
當有人真的竭力追求，人又會說他在追求"知識". 而知識只能叫人自高自大(咁即係想點? 唔洗理世上小學，但認識神都係罪過). 因為最緊要係憑信心相信神的安排，最緊要的係愛主！愛主比你做大頭仔重要.
我係一個不斷睇聖經，研究聖經既金融佬，最頂唔順那些牧師/主日學老師咁樣教班信徒.
追求知識叫驕傲，唔追求，覺得有(稱呼)主(啊！至啊！)萬事足反而是謙卑?
是我中文差定係tree gun 臨格教會？
不恥下問，尋根究底不是謙卑表現嗎？
驕傲不正正是冇卻又目空一切嗎？
為什么要話追求者驕傲同唔夠愛心去掩飾自己的狂妄自大？
屬靈人不是該能參透萬事嗎?
如果教會是世上的真 . 鹽和真 . 光，為什么對世間事物就乜都唔望，唔聽，唔諗，唔理，唔知，唔肯定，唔郁. 只能給人一種抽象又主觀信念上的"主能夠"，心靈的慰藉，傳福音. 是真正的追求主嗎?
一個對世界世情沒有半點好奇心又害怕探求的教會，難怪善良，好似好善良但卻這么離地和反智.
求主幫助我地回復煩死人既死𑃁仔的樣式，問多尐點解! 追求多一點.
在追求過程中，會遇上許多人挑戰你，令你沮喪.
你睇咁多，唔明又有乜用？(書到用時方恨少，在教會以外從冇聽過讀得少反而會明得多)
明但行唔到出來又有乜用？(唔明，用自己方式咁行，反而更合神心意？)
你以為自己係神？人冇可能知道一切. 亦冇可能全對(學海無涯，越知得多就越清楚自己的無知，又越發清楚自己與全知的距離比遙遠更遠，這個擔心才是追求的絆腳石.)
求主賜我們竭而不捨的精神，做真理的追求者，而不是消費者，當認為找不到著數，太麻煩，無法全知，就放棄，而且滿有愛心地勸人放棄.
時侯到了，人要以心靈和真理(truth)敬拜神，這樣的敬拜本身就是生命，就是流出永生的活水流河.
教會若用信心，愛心，神安排，知識是驕傲這些宗教詞語去敵擋神，又攔阻一切追求者，這只會令信徒像飲鉛水般，逐漸低B, 更新變化成一班目空一切的耶撚.
分享一首兒歌做個總結.
故事講述一小撮眾人皆醉我獨醒的金融佬，在08金融海嘯前 big short 賺大錢.
如果你到現在還弄不清什么是次按，Asset back mortgage, CDS, CDO.....電影生動幽默的描述和比喻令人佩服，我無法將那些金融工具解釋得比電影更清楚明白，是 dummy 還是局中人我都認為值得一看.
The big short 簡直係一套教育電影(二級半果隻. 其中暴力，色情，粗口，貪婪包羅萬有. 不過，若這一點都會是巨大試探而令你跌倒的話，究竟係你太軟弱？還是你所信的神冇料到? 答案你懂的.)
作為一個金融佬，在全世界向好/向壞下力排眾議，獨斷專橫地做決定，並且堅持決定係好難又好辛苦. 尤其是當你要交數，當你唔能夠做得比人差太多，你會不知不覺，搭上這條可能會沉但目前仍然帶著你走往目標的爛船上.
我的公司如是，整個金融界如是，所有投資者和政府也如是. 事後諸葛亮，我們當然可以將一切簡單化，看成人無止境的貪婪，為求賺多一點點而不擇手段.
這也是我在海嘯爆發後兩三年之久，回到教會，找不到絲毫安慰，只聽到台上老生常談的指罵.
(他們真的明白發生什么事嗎？不，他們什么也不懂，但他們理直氣壯地發聲).
為什么海嘯前我聽不見那些指罵呢？為什么平時教會著緊的只是建堂擴堂和十一奉獻？這不也是求更多錢么？
海嘯後痛罵整個社會貪婪，我看不出有什么建立性，只帶來更大傷害.
心靈上，對我這個大花紅冇我份的打工仔，做成無形的自我控訴，當時我日日番工都唔知公司會倒閉，還是亞視永恆，死極都死唔去. 管理層像走馬燈般換了四次，壓力大到死去活來，教會還要久不久逼我悔過？
實際上，這種罪疚感加上大市不斷下跌的壓力，會否令信徒在那大市谷底壯士斷臂呢？果真如此，真係乜仇都冇得報！
我眼白白睇住唔少成了大閘蟹的信徒將辛辛苦苦儲蓄的血汗錢蝕掉還換馬去一些較"穩陣"的投資組合.
某，"唔玩! "
我，"你轉左追唔番. 揸住，個市會升番"
某，"我諗呢個係神既管教，唔想我玩股票，佢用今次去提醒我地太貪心既後果....."
當我嘗試解釋多一點分析，就會比人鬧或冷處理.
情況跟故事某一主角雷同. 海嘯前勸人真要投資就買政府債券唔好再買股票，被人怪責為何人家賺10% 而他們卻蝕了3-4%. 海嘯後，連分享自己入貨(我不敢再勸人)也會捱罵.
我公司好不了幾多，海嘯前，盡力揾生意，希望買多點AAA asset back 做保守投資. 海嘯後，盡力咁對沖，寧願唔賺都希望唔再蝕更多. 大部份公司同投資者都會聰明保守咁蠢兩次，但當你置身其中，所有人都在作出當下最明智的決定，那時侯對此提出質疑，即使多么有智慧，質疑本身就絕對是愚蠢，我在公司試過，在教會，在家中也試過，真的太傻仔.
當然，事過境遷之後，我們會把那些獨具慧眼，有膽有錢 all in 的人視作英雄高手.
金融海嘯，讓我對幾個道理有更深體會.
1. 傳道書話日光之下無新事，所重要的是人如何享受人生，以及在其中學習敬畏神.
頌聲背後，他們仿佛從未賺過百年一遇的巨款般，還是一如以往，日以繼夜，夜以繼日的分析估算，享受估算成功的快感，和優化從失敗而得的數據，去更新現有的金融模型. 他們為到自己的所擁有和追求感恩.
當日蝕到血本無歸的人，也仿佛從未蝕過一分一毫的幸福快活的繼續生活. 他們為自己能謙卑，順服和學會知足感恩.
每個人都仿佛因此得到些體會，學到些人生道理.
2. 但以理書話，許多人潔淨自己，但惡人仍是惡人，無知者繼續無知，智慧人總能明白一切(12.10)
原是形容災難/審判過後的死性不改現象.
所有人還是依然故我.
賺錢，蝕錢
教會繼續向信徒要錢去營運和植堂.
直到下次金融風暴再臨.
又有一班人賺好多好多，而所有人在蝕錢後完全放棄離場，教會又再次勸人唔好貪心.
不過風雨過後，不管你是誰，還是會照老方式活下去.
3. 以西結書話在任何一個時代，就算像挪亞，約伯，但以理般的義人，充其量只能救到自己(潛台詞: 無奈地眼白白睇住身邊人一個個倒下，站在破口守望又如何？人總是聽不進耳)
4. 不要有理冇理指責人貪心，不如教曉人如何把握時機. 也就是在世人貪心時憺心，在世人憺心時勇武(貪心).
這句股神到師奶都識講既說話，到你真正可以實踐既時侯，你要先有得罪全世界，斷埋六親繼續任性的固執才好，做唔到，就乖乖做羊群中的一員，你蝕完不要緊，三四年後依然幸福快活，總比斷完六親，跟住把持不定蝕得更多，到時真係賠上生命.
5. 教會由一班普通人，一班羊群組成，它儼如一小社會，所以不能期望它在什么問題發生後會有異放羊群心理的安慰和鼓勵，我不再對此有任何期望，也不會分享作金融佬(成功定失敗，冇分別)的壓力和掙扎，看一齣 the big short 或者 margin call, 甚至 the wolf of wall street 比返教會安慰大得多呢？
6. 金融界改革，聽起來非常諷刺，不是為了悔改，不是為了不再貪心，而是為了將來賺更多又蝕更少的這份"貪心"，這貪心成了新的動力，將現有問題解決，修補漏洞.
更諷刺是: 這份貪心所帶來的更新改變，比教會和信徒的下巴輕輕滿口仁義道德更有效，更實際和更徹底. 唔係得把口講，唔係心態上以為變左但乜都冇變不過自我感覺良好. 說到尾，最唔想金融核爆的是金融界，if party is over, 仲賺乜？
想對這幾年金融改革了解多一點，建議讀前 Federal Reseve 主席 Ben Bernanke 的著作 The Federal Reserve and the Financial Crisis, 薄薄的一本由講座變書深入淺出的尾尾道來.
成也蕭何，敗也蕭何
如果泡沫是由貪心和過份信心所產生，谷底反彈也是貪心和信心回復所帶動.
所以教會要指責人貪心，要在泡沫之時，才算是智慧.
在谷底，要鼓勵人有信心(反正你乜都唔識).
鬧人貪心不過在人傷口灑鹽，叫人更失信心，曲線令市場插多尐. 何必呢？
Posts
All Comments
