讀書好無奈讀書唔夠正

教會每年都推出靈修/讀經/讀某某屬靈書計劃，為什么往往推動的人多，真正讀的人只有一半，而最後完成的人有一兩成已經是神蹟，多半走到四分一就"隨流失去".
平時自發閱讀的信徒就更少，一年之中，能讀到一兩本書已經很了不起.

像胡志偉牧師在國際閱讀日(4/23)分享一文，信徒閱讀的好處不是很多嗎？為什么信徒閱讀率和閱讀胃口會如此偏低，教會推動又往往未如理想呢？

推動方法
推動閱讀，教會總喜歡用三種方法:
1. 成長: 閱讀對你生命有多好，多益處(像胡牧文中所言，本人完全同意)
2. 工具: 你要在某某事工稱職，就要讀它，裝備好. ie 做組長讀小組書，帶查經讀教查經的書等等
3. 見証: 針對成長(#1) 找人分享生命改變; 針對工具(#2) 找人分享事工如何看到神大能.

趣味
我不否定閱讀對生命和事奉的幫助，但幫助，需要，同我鐘唔鐘意讀+會唔會自發越狂咁讀係兩回事.

好比品嘗食物，不斷告訴我某食物多么有營養，多么健康，又找個有病的人如何因此變大隻佬，不會令食物變得更好味，令人唾憐三尺，食到Q太郎有公仔麵咁，幾多都唔夠.

要人愛上閱讀，重點係有沒有趣味和引人入勝的可讀性，而不是成長和功用.

問題在於閱讀不如美食，滿足感波動性大得多.
什么叫滿足感波動性呢？
我食四川菜，我預左辣，我去大排檔，預左污糟，食麥記預左唔健康，澳牛預左快快的吃，慢慢地動怒.
但一本書(非小說  non fiction)即使如何精采，滿足感落差亦可以很大. 讀到某個位唔明或者好悶或者忽然好忙，少一份堅持，就幾個月後才會繼續打開它了.

取捨
在教會這大家庭裡，有太多比閱讀能找到穩定滿足的活動了
崇拜邊個講員上台，你的期待沒有落差罷？精采的，從來都精采，沉悶的也沒有轉動的影兒，你繼續出席崇拜，就預左架啦！
無論唱詩的，領詩的，幾時企，幾時坐，幾時合眼呼求神，什么感動位，悔罪位，輕快位，同人握手叫耶穌愛你，歌詞重覆又重覆......一切從來不變，陶醉的人既繼續陶醉，碌木咁既繼續做木頭.
什么事奉，即使有突發，到最後(由於其實好小意思)都會順利完成，你總可以歡欣心裡感謝神.
但閱讀，一來有沒有讀冇人知，二來就算今天經歷到爆多"亮光"，heman咁充滿力量，明天可以變成丈八金剛摸不著頭腦.

結果
閱讀與否，往往不會即時看出分別. 唱詩笑容不夠燦爛，冇返團契，查經冇準備，會現眼報被關心. 冇讀經，冇閱讀，冇人會察覺到分別，你天天讀兩小時，也不見得比人更成長. 更何況，如果你分享自己多么花時間閱讀，多么追求，分享太多，反而會被人善勸不要驕傲，知識只叫人自高自大.

由於求成長和功用這種實用主義作崇，閱讀本身滿足感的不穩定，加上教會其他活動的取捨，以及教會對追求神 vs 知識的兩元觀，一般信徒追求閱讀，反而不如離教者般自由灑脫，令閱讀難以久持.

通常只會閱讀為應付一個查經雞精式查參考書 back up 自身想法，或者為某事工裝備. 最多還會每一靈修一篇什么什么日誌.

功用書有如洗衣機說明書，其中不會找到趣味，而靈修書要不是不斷重覆"阿媽係女人"(耶穌愛你; 你要傳福音....)，就是曲高和寡像 purpose driven life, experience God，你冇可能亦唔樂意跟，只製造罪疚感，而透過它令你感受神愛你，令你既 feel bad 又 feel good.
是否如端木凱言，"是吃奶不吃糧"，我不好說.

教會不斷推這些令人發悶的功用成長書，試問怎能提高信徒的閱讀興趣和自發性呢？

COC 老弱殘兵

在 COC中，有兩種戰爭
一是自己條村打另一條村，搜掠對方的資源;
二是己方聯盟 10，15,，20條村去同別的聯盟打仗.

如果聯盟戰整體勝出，就有一筆可觀的 war bonus，輸左就只有5分1 安撫金. 由於一班村長在這戰爭中榮辱與共，所以大家(尤其是強村)都會慷慨解囊，按各人所想所求，贈送最強既兵種，為求令己方(包括自己)勝出.

反觀"平日"單村搜掠，只會隨己意分給求救者，多數係 cheap cheap 箭手，相對起來，就老弱殘兵得多.

無他，出一個箭手幾舊水25秒，一條龍要30分鐘要幾皮，你次次問人要，人地肯比可能你都等唔切啦！

歷史上，輸出老弱殘兵的例子就多著. 除了冇著數會咁做之外，"輸出"本身可能就係著數.

要知道軍人有兩種，一種係要花米飯養住既職業軍，一種係放下田地臨時召集的"義務"軍(同樣要比飯，或比地等佢自己攪惦).
與其要花錢糧養住班弱雞，除非好有米，不然，佢地冇飯到肚就會搶，就會一個屈尾拾作反，不如調佢上戰場，死左唔洗養，好彩人多蝦人少贏左就仲開心，搶人地尐野去喂飽佢.

(從這角度重讀約書亞打耶利哥你就發現用條命攻城但唔俾搶，要燒清光對一軍人，特別係得幾日糧食而嗎哪已止降的以色列軍來說有多犧牲，你亦會看到什么叫順服同敬畏神，命仔黎架！唔係依家你好啦，幫下手做個事工咁簡單就以為 apply 左)

在這種情況下被逼上戰場的人，左右就係死，除了不斷搶之外，通常會扮勇武，因為只有勇往直前才是生路，死左冇人可憐你唯有靠自己. 但另一面係當有乜風吹草動，勢色唔對就走人，跑番屋企.

於是你又能理解為什么艾地一戰小小失利，眾人就要生要死，驚到鼻哥冇肉. 唔係冇信心，犯罪咁簡單，心態係，如果輸，就走得快好世界，大河另一邊又唔係冇得住，何必冒險喎！你一句要有信心，唔好犯罪，個故仔乜野味道都俾你蓋住左.

歷史上赤壁之戰，蒙古兩度打日本，都係用呢招. 表面上輸到七彩，實際上如果曹操唔將袁紹，劉表招安之兵用在攻擊孫劉，忽必烈如果唔用掉南宋及高麗降卒，咁多人反而會咬死自己. 呢個亦係點解項羽坑殺廿萬投降秦軍的原因，某程度亦係點解約書亞當年要種族清洗的因由，而為什么當年咁做合理，甚至可以話合神心意的解釋之一.
因為老弱殘兵，降卒，戰俘，當年係一個好難處理既問題. 你若將佢靈意化為對付罪，你永遠唔係解緊段經文，你若為神解畫，又永遠解唔通，其實只要弄清這一些古代難題，就好易明，你接唔接受係另一回事，唔好下下問點 apply, 先理洗一切好嗎？

歷史上亦有國家嘗試不斷養老弱殘兵，呢個就係宋朝，宋朝係史上最有錢，中國最尊重人權，自由貿易，思想文化科技最發達的時代，一奇怪是她開國時只廿萬軍人，北宋亡國時軍人卻過百萬，甚至二宋被擄，人迎接宋高宗返汴京時，各地勤王軍亦有百萬之多，有趣係，高宗依然一路敗走，如果冇長江，如果冇韓世忠黃天蕩頂住金兀朮，邊有南宋？
歷史考究結果係，果尐全部係老弱殘兵，一班冇地又失業，唯有扮軍人呃救濟金既"負累".
所以，高宗在臨安安定後，死都唔肯北伐，岳飛咁秋得寧願整死佢，一來老岳唔識 do, 二來佔回華北有乜用？收留班垃圾嗎？各地勤王之師？哈哈！丐兒就真.

黎緊分享多尐種族清洗 / 各自為政背後的戰略思維同心態

CoC 看部落聯盟

在CoC世界，不管你參與戰爭與否，總會和友人一起(泊碼頭)，組織一個部落聯盟. 聯盟雖然無法直接利益輸送(送金，命水，墨水同寶石)，只能送一定數額的援兵，但在平日掠奪生活，仍有百般益處，成王敗寇，往往取決於這支援軍.

同仇敵x, 守望相助，家家有求是CoC的核心價值之一.
我玩左兩個月就睇通一道理，儘管每條村的實力強弱懸殊，但多一個兵就多一分力量，何況在無限資源兼"人命"賤個泥的雙重因素下，主動狂送救兵給一切友軍，亦狂問人班救兵(多多益善，冇任何偏好)，久而久之，我為人人，就變成人人為我，大家一齊慷慨解囊，令人人都唔會受之有愧.

在現實侵掠戰爭中，聯盟是有的，但不會如此出現.
就算統治者視人命如草介，做兵果個冇著數點會同你搏命，殺人喎！你估玩呀？要好有膽，而且隨時被殺.
而統治者在冇著數之下，一般只有幾個情況才會聯合助戰:
1. 要求助戰一方實力比自己強多，唔幫拖反而會被佢先打"內鬼"咁鏟低;
ie 約西亞王為埃及助戰攻亞述 or 西底家唔肯助巴比倫王打埃及，結果被先滅絕
2. 唇亡齒寒的最危急關頭
ie 以色列和猶大國聯合抗亞蘭; 聖殿保衛戰，三班本土派鬼打鬼但聯合抗羅馬軍
3. 十倍兵力於敵方，估計必勝，純粹令己方彷彿更人多，達到圍城，不戰而屈人之兵，怕乜助戰喎！
ie.  耶利哥圍城戰，唔識兵法既解經話會比人知道虛實，圍城走來走去係不智. 實情古代戰爭要晒馬，等你知驚. 可以想像頭六日行左六圈，晚上有幾多人偷偷逃命，令雙方實力更懸殊，呢招高啊！(只有城中寄得利益者先會賴死唔走) or 亞蘭三十二路軍企圖踏平以色列國

按歷史，亞蘭，以色列，猶大三方其實混合了上述1,2,3法
在約沙法年代，亞蘭三十二路打過來(3)，以猶共抗亞述(2)，之後係亞蘭在耶戶時逼以色列同盟(1) 一起打猶大，但其目的卻是共抗亞述(2)，至少要擺出夠踏馬令對方怕怕 (3)，不過亞哈斯卻選擇和亞述結盟，及至希西家作王(亞述已經將亞蘭，以色列，呢兩個以賽亞形容為好快熄冒煙的火頭消滅)他卻又跟巴比倫結盟，巴比倫強大後，約西亞打後的幾個王又跟埃及結盟......
以色列永遠和周邊聯合，而猶大經常愛跟第二大國聯合，多有趣的歷史現象呢！

當然，除上述三種情況，將老弱殘兵外借歷史上就經常發生，有機會再分享.

童年(2) 不要逼讀課程等他情願

連續出現多綜青少年自殺事件後，引起社會各界關注.
學童測驗，考試壓力大，同輩競爭大，功課勁多，放學/周末阿爸阿媽仲要逼他們補習，上一系列"興趣"班......

不少人勸家長不要逼得太緊，讓他們發展興趣，鐘意讀乜就讀乜，因為只有學童喜歡，學習才會事半功倍，他們才會開心地成長.

像我父母本來想我讀醫，結果我走去讀會計+金融. 後來信了耶穌，教會又期望我讀神學，全職做牧師，結果我還是做我的金融佬.

我認為:
1. 一個人喜歡，才會全程投入
2. 讀書為求學習，而不是求分數
3. 在學校小學六年，中學六/七年，大學又三，四年. 若能享受校園生活，至少"賺"取種種經歷和回憶，這比單單求張沙紙更有意義.

幾年前作了這首歌<<一千零一次求分>>，找友人錄了一粗糙的 demo.

能發掘出興趣，培育，以及用這興趣揾食當然最理想，但現實有幾多人做到呢？

1. 幾多人知道自己的喜好(科目上)？
2. 幾時才知道自己的喜好？我要到中三四才知自己討厭 biology.
3. 對一學科是喜好還是討厭，很大程度取決於你對它的駕馭力，你讀唔讀得惦
4. 駕馭力當然有部份取決於你性格同喜好，但邊位老師教，教成點，你付出多少時間，父母(某某)能否幫你一把....
5. 根據#4，某程度上，喜好也是逼出來的
6. 如果我們像耶穌時代，子承父業，木匠，漁夫，人生出來，幾乎就決定了他/她一生，沒有多少選擇，就難談喜好
7. 今日就是有不同學科，才須要分喜好，善長等，但又根據#4，人要有一定駕馭力，才能定出喜好.
8. 於是產生一個矛盾位，中小學有十幾個科目，假設你只喜歡三個，但你要用好幾年(甚至十幾年)努力付出駕馭十幾個科目的時間和精力，才能發掘出喜好.
一開始談不上喜好，點算呢？一定係被逼架!
9. 更大鑊係，你喜好考高分，其他肥佬，你還是會留班(除非你喜好去到神童級)，結論學習還是有太多必要的被逼

我中小學是全程被逼，在香港不用說，移民後，父母對我的強制少了，但我仍要痛苦地逼自己. Come on, 沙士比亞與我何干？點解要我讀佢而唔考三國演義(所有版本玩過，將領事蹟，數值都可以如數家珍)? 點解我覺得個故事好無聊作答果陣仲要我讚佢先有分，先升班，點解要這樣才能勉強入到大學，選讀我駕馭力較大，又不黑我憎的會計+金融學系.

10. 即使萬苦千辛找到喜好(不太討厭)，揾唔揾到食係一個令你身邊每個關心你既長輩所擔心你的問題，你擔心別人對你的擔心也是種巨大壓力.
11. 喜好當然不該用金錢去價值化，但揾唔到食，對許多人來說，也難以繼續那份喜好.
我很喜歡歷史研究，但阿媽話，你讀歷史就聽食屎，結果我唯有自修. 12. 喜歡歷史，對我後來分析同理解聖經背景，金融現象，經濟原則，會計理念都大有益處. 雖然喜好不會是種浪費，但除左自己冇人會咁樣肯定( recognize )它.
13. 但話說回來，即使是讀我不討厭會計/金融，在三年多大學生活，當中仍然有我討厭的某些學科，老師，及同學..... 我仍是要逼自己努力面對.
14. 讀書為求學習，而不是求分數. 這個我到大學三年級才體會.
我中學成績太差，講不求分數查實是葡萄. 大學頭三年 ok, 到第四年多野要靠之前學到的去深造，才發覺果尐一早俾番阿蛇，才懂得用心學懂學好，留得住才是自己，不然，有高分卻忘掉，遲早因為冇料到出事.
我到大三才真正領略到.

我寫這么多想講出，to 逼 or not to 逼仔女，thats no simply solution.

我認識被逼到成材的賓仔，認識被逼到終極放棄的姐姐.
我有朋友，父母隨便佢，長大後一點不快就裸辭，一鬧交就要分手的堅廢青(上天有好生之德，佢總有散工散拖果下厲害，雖然冇乜前途 :p)
我亦有個親戚，父母生左佢除左比錢佢讀完中學，從來冇理佢，小時候是個差點入黑社會的邊青，居然大學畢業，用自己錢創業，創到在大學客籍教 emba.

而在上述這四個極端，教養光譜下，有無數平凡像我的港孩，也有無數唔咁逼佢又可以點的"怪獸"家長，真係逼又死唔逼又死，一樣米養百樣人，最後結果係乜天曉得？

或者父母要做的不是逼唔逼的抉擇，而是讓孩子在還未懂得"棄惡擇善"之先，陪佢，陪佢讀書，陪佢玩.....拖住佢手仔，令佢感受到愛，感受到溫暖，以致在逼逼氹氹中堅忍下去，直到找到愛好，能自己逼逼氹氹自己為止.

不過香港功課實在太多，為了贏在起跑線而再去喪補習，學勁多野，無止境地加壓，是否超過了極限，令其適得其反？令仔女最終變得凡事討厭，凡事被動，凡事失望，凡事放棄，唯有你話"你愛佢"既逼迫永不止息呢？

COC 看經濟生態圈

在COC遊戲裡面，單靠開採自家金礦(gold)，命水(eli) 同墨汁 (dark)係唔夠升級用. 所以一定靠侵掠人家才有前途. 之前已分享過，呢個邏輯會令我地明白為什么以前的世代那么好戰，因為古代單靠種塊田，任汗流夾背也只能僅得糊口，有淨的要不給地主就是給政權的田稅.
所以古代每個民族都好戰.

來到今日，戰爭的利益減低了！
如中國佔了釸谷能佔領一切科技嗎？不能！因為今日的創新科技是軟實力，無法透過武力佔領.
此外，今天資本主義及全球化，就是靠一班人一齊做大個餅玩 win win. 打人就少了這個 multiple factor, 反而會令自己受損，這令過去五十年成為歷史上最和平最少戰爭的時代. 當然我們有恐怖主義，人太長命，也解決不了貧富和青少年問題.

在以前，一個餅就係一個餅，我搶多左代表你少左/冇左. 在富裕時是還可相安無事，在人口太多或飢荒/失收時你唔去搶人就會比人搶，搶即使不特別正義，也無人會覺得係個問題.

你明白呢個道理超級重要，不然，你冇辨法理解前人為何將殺人如麻之流視為民族英雄; 讀約書亞，大衛，以色列人打打殺殺，你要不是批評聖經暴力，就是牽強地為聖經辯護，說那些血淋淋的戰爭代表對付罪，而對付罪不但不代表種族清洗，而且多么合神心意，又多么分別為聖.

話說回來，古人透過戰爭去解決得一個餅的有限資源問題，在COC的場境中，由於資源是可再生，而又是取之不盡，所以，用戰爭掠奪就更肆無忌憚了. 然而，當只得一個餅變成五餅二魚可養飽無數玩家時，就會產生另一個經濟問題: 通貨膨脹. 這就解釋到為何升級雞碎，居然要花費龐大黃金，命水和墨汁之外，還要花曠長時間.

當年西班牙掠奪美洲，無數白銀流入，又或所羅門王與腓利基人合作，壟斷了歐亞非商道的經營，令銀子算不得什么的那些日子，似乎是比爭戰更"太平盛勢"，事實和coc一樣，寒天飲冷水，點滴在心頭呀！