Translate

Tuesday, August 18, 2015

教會玩殘腦朋友?

多謝陳到兄發文,講Inside Out (玩轉腦朋友),以及他對教會對”凡事喜樂”這類經文錯置而令信徒有”歡迎阿樂,抗拒愁憎怕怒“這種耶青病態的反思.

想分享我既睇法,先講少少影評,再談教會玩”殘”腦朋友之體會.

這套電影動畫,講述一少女 Riley 隨父母搬家,面對新環境她的情緒反應,內心世界的爭扎. 由於電影成功將大腦內世界以動畫型像化地展現出來,既發人深省又令人有共鳴,回憶少年十五二十時,同不少人一樣,去到幾場催淚位我得睇到好感動,眼濕濕.
所以有人話呢套戲係俾大人睇,唔係俾細路睇.

我係個大細路,難得呢套動畫,色彩繽紛,大歷險情節精彩,對於唔想諗咁多,又或者比我地單純得多既小朋友,都會覺得好睇. 正如細個睇伙頭智多星,不懂其背後烹飪之道,那又何妨?
inside-out01
講返教會,我不同意教會只是歡迎阿樂,抗拒愁憎怕怒.

的而且確,許多教牧相信,基督徒要常常喜樂,什么擔憂,焦慮都不是好東西,甚至認為是罪,而出現一些怪誕的實例:

1. 崇拜:
來到神面前,用詩歌讚美神,就要開心尐,一齊拍手掌. 什么擔憂,焦慮我地先來通通放低.
(第一,咁易放低就唔叫擔憂同焦慮啦!第二,我放唔低而唱詩果陣又好開心算唔算假面具?第三,我來到神面前,唔係應該將最真果面逞現么?點解要放下? )

2. 喪禮:
我明白你好傷心,但你個位阿邊個返回天家真是說不出的快活,冇痛苦,冇眼淚,我地應該為佢感到快慰…..
(家屬都唔知點答你好).
我地基督徒有復活既盼望,死亡!洗乜驚?耶穌話復活在我生命也在我,各位親友,快尐信耶穌
(如此阿樂上身, 將喪事當喜事辦, 百分百會發生).

遇上一班耶能阿樂,真會令人即場有愁憎怕怒四色混合的強烈反感.
insideout_joy_by_hentaib2319-d8hodlj

話雖如此,我仍然要為教會平反.
實際上,教會歡迎阿樂只是表面,其實教會是經常鼓勵信徒擁抱愁憎怕怒.

有些時候, 例如,做招待,做兒童導師,什么什么團體活動主持…..我認為阿樂/扮阿樂係有需要. 唔通成場年初四咁樣咩?

舉些例子:
1. 驚: 每逢遇到什么天災人禍,就會有末日快來,審判快來,人太敗壞得罪神所以依家神降災……你仲唔知驚?快尐傳福音啦!快尐信耶穌啦!
2. 愁: 聖經話不可停止聚會,做乜唔返教會? 做乜返教會又要遲到? 你點可以咁敬拜神?咁唔愛主架?你仲唔憂傷痛悔?
3. 怒: 某某國家又通過同性婚姻合法了,某某人又因堅持反同被人告,基督徒,你為何不忿怒?
4. 憎: 聖經話我地要順服掌權者,如果掌權者唔好,我地為佢地祈禱,求神比佢地智慧(仲比智慧佢地?至少叫佢食屎啦!) 我地相信神仍然掌權. 所以,我地唔需要鬧政府,鬧佢又有乜用,一來果班黃屍熱狗,出來攪係用人既方法,就算俾你攪到民主,民主又唔係絕對,又有乜用?
基督徒要討厭人既方法,用神既方法. 在神家裡合一,任何政治立場都ok, 基督徒要討厭捲入無謂的政治爭論中.


什么是神既方法?
說到神既方法,信徒生命比 inside out 有更燦爛的成熟表現:
心態上我們像阿樂,凡事相信,凡事盼望
行動上我們似阿愁,他(神)使我躺臥在青草地上,乜都唔做,唔好郁,一味祈禱, 熟讀大腦指南中某幾句(聖經金句), 以及同人講: “我明白你感受你真係好慘,相信神啦!神會工作架(即係佢淨係會等,唔會工作).”
InsideOut06
又或者如劇中阿樂跌入遺棄谷,發現主角過去某次開心回憶,是源於Riley 打輸波憂愁,因而到父母同朋友仔安慰和鼓勵,轉愁為樂.
所以喜樂有時可以源自憂傷.

教會團契的見証分享,豈不正是這樣么?講到點樣點樣慘,突然峰迴路轉,神好愛我,弟兄姊妹好關心我,我覺得好滾動,果尐慘比起耶穌釘十架算乜?所以我已經充滿力量啦!我相信神會保守,忽然間覺得好喜樂.
inside-out02
這種由愁轉樂的分享,在教會裡不但被視為經歷神,你起承轉合吹得好,加兩句金句,就是成長,成熟,夠屬靈的確據.

如果你一向風調雨順,你就大鑊!
返到團契,團契要人人都分享,唔分享又會令你自覺冇經歷神,咁點好呢?
有尐人會被這種群眾壓力引誘,將生活裡雞毛蒜皮之事加鹽加醋,冇內容,冇聖經教導(拋金句唔計),冇學習,冇改變,只係分享某事,由某情緒去到另一情緒,點解變情緒?因為主愛我,我經歷到佢.
講完.

這種情緒急轉彎的乾坤大挪移係教會生存之道,是做屬靈人的必修課之一.
各位要好好操練它,必有30倍,60信,100倍果效!

例如早前股票大漲,滿心喜樂,靈裡歌唱,但在教會時阿樂可以恐懼戰競咁話,”神啊!求你拯救果班紙醉金迷,窮得只有錢既靈魂!”

又例如聽到什么 howtindog,馬斯特發文,自己覺得樂透,一班人提起就扮阿怒,扮阿憎,”呢尐人一味鬧教會,建設性欠奉,內容一味營養也沒有.”

當乾坤大挪移到爐火純青的境界,一切樂愁憎怕怒情緒,都可以如隴溝的水隨教會之意流轉.
絕對唔會出現 Riley 讓阿憎阿怒扮阿樂被阿媽識破的情況(Riley 一定冇返教會,或者得12歲返得唔夠. 看啊!從小返教會學習做人道理有多重要).
New-Pixar-film-Inside-Out
你可能會話,這樣假裝,不是很痛苦么?只要操練到連自己都呃埋,甚至覺得正確,就不會痛苦.
當成間教會所有人都要求你在某場合就該有某表現某種情緒時,而你這樣做就有掌聲,反之就請自我審查
久而久之,你要不由骨子裡完全認同教會一套,自然流露出那份官方表揚的情緒;
要不就假裝,將原有情緒隱藏;
不然,你在教會會被視為不順服人物,最後,你一係走,一係扮隱形,一係學效前兩種人.

假裝是犯罪么?
即使假裝是犯罪,犯罪又點喎!
在新約,連彼得也曾假裝.
彼得同外邦人飯聚,但當”從雅各來的人來到”,彼得就怕犯罪咁唔敢繼續同外邦人飯聚(加 2.12-13)

基督徒都係人,在群眾壓力下,若無法真情流露,又或者覺得真情流露好衰仔,就容易假裝,假裝得多,就不覺得是假裝.

教會是個道理多多,要求多多的地方,它要求信徒有某些表現和反應,也許背後的真理和期望是正確(當然值得反思和更新),但當出現與其要求不同之處時,可能你同 Riley一樣,一時三刻唔知點比反應,又或者亂俾反應,假裝反應,我覺得冇問題.

問題係你會 frozen 左佢然後 let it go? 還是在腦海裡不斷尋求真我?
我努力, 不斷尋求, 真的找到陳韋安博士所講的第六位腦朋友 - 聖靈來帶領? 還是更大機會, 我只是被教內自 high 欺騙, 還以為自己經歷祂的大能?
當教會不重視理性,認為它只會叫人自高自大,駁嘴駁蝕的時候, 沒有理性思考, 真理的聖靈同一堆情緒表達沒有兩樣, 於是聖靈充滿同新酒灌滿又怎能分辨呢? 實在太相似,也因為如此, 教會才出了一大堆情緒指引,去規範同模造信徒生命,但這種欠奉自由的模造卻很容易成為轄制和集體假裝.

pic
我有時會憺心,自己究竟係追求成聖,還是只變得更有城府是將邪情私慾舊我釘在十架?還是將僅有的真我性情也謀殺掉呢?

Riley 最後返到父母身邊,而唔係離家出走. 如果教會這環境太廢,但你知道天父仍然愛你,認識你,接納你就係你. 其實可以鼓起勇氣,問佢,”教會要求我咁,但我依家係咁,點解會唔同?係我有問題?大家都冇問題?還是耶撚當道,我大可不理牠?”
inside-out04
同神一起尋找真我是個緊張剌激的 inside out 歷險.
而成長,成聖,成府,都係一漫長過程,點滴累積的結果.
inside-out
不幸是,我每樣都夾尐. 或者,這才是真我.

Monday, August 3, 2015

教會特別的靈命成長技巧

在教會裡,什么才稱得上是靈命成長?
標準問題當然係跟從主,生活結出果子,見証等.....
問題係生活呢家野,點去量化你係咪跟從主,結果子,同見証主?

你唔殺人放火姦淫擄掠; 亦沒有遇上被強拆十字架的壓迫.
加上社會文明有套道德標準,普世價值(註一); 各行各業本身亦有一套專業守則及潛規則去厘定你的表現,你單單做個好人,a nice guy, 又或者敬業樂業,也有這兩把尺去衡量你,而你其實一直都用它們來衡量自己,只不過舉兩句聖經,甚至一個祈禱,就將這兩把尺說成係跟從主,結果子,作見証而矣!

為了令每個信徒都嘗到主恩滋味,跟從主,結果子,作見証....教會用心良苦的建立了兩個衡量標準: 傳福音,教會事奉成長升呢制.

你去傳福音啦! 汽車總動員攪佈道,參與啦!邀請啦!分享你覺得神點祝福你但其實好多人遇過又令更多人只能自歎冇你咁好彩既見証啦!
我知今日有好人人中傷教會,話佈道會洗咁多錢又花咁多人力心思,成效卻不大,人又唔得邀請到,信到. 甚至見証過太多咁樣信左之後走佬既人.
真正成效幾多,你班批評友識條鐵咩?
佈道會,甚至所有教會傳福音既事工,尐人唔洗真係信架,再保守尐講,唔需要有太多成效架. 只要令每個參與者自我感覺良好,覺得付出左,經歷到神,就達到目的了.
因為你們如此行,乃是理所當然的,你在"外面世界"生活中,找不到能量化的尺去肯定你是否跟從主,結果子,作見証,透過傳福音你找到了!而教會亦透過它簡而精地將增長方向同目標明確化同神性化,增加凝聚力同各信徒的向心力. 其好處比數字上有幾多人信超越太多.


成長升呢制
教會事奉成長升呢制(即係七級豬制),你問我由帶下詩升到帶詩,實習升上組長,由帶查經升去教主日學.....靈命,或者一個人活像基督的指數是否同樣升一級呢?

既係既唔係!
成長升呢制, 一級一級豬咁升
第一,令你自我感覺良好,覺得自己付出時間同心力,成長左,跟從緊主,;
第二令你自我感覺虧欠,覺得自己其實可以做好尐但冇做到,覺得有尐野本來做唔到但居然攪惦(忙到瀕死的豬豬),當然係神工作啦,咁就經歷神啦; 
第三,過程中信徒同工,透過祈禱,互相稱讚同表揚令各人打成一片,通常信徒既 bonding 是這樣煉成的.
君不見那些佈道會事後分享會及一年一度營會,那些信徒的見証?忙到隻狗,多次想放棄,但今天回想覺得一切都係值得!
還有第四點,透過成長升呢制和一班唔怕忙唔怕升級最後似乎多多經歷神既一班信徒及bonding 網,教會建立了一班順服的人和順服的階梯,既易於管理和動員,亦令大家同心合意去興旺福音(第一把尺),道過興旺福音產生的事奉岡位又令人更經歷神和同心合意.

有好多心灰意冷既人話
1. 事奉攪到人好忙,好dry
2. 事奉冇令人真正成長
3. 教會忽略一班有思考有意見信徒既聲音同需要
4. 離教者同笑我地耶L的人日多
教會點解唔反省一下呢?

我會答你:
1. 忙同dry 是為主犧牲嘛!耶穌也忙,在十架上也 dry 呀!
2. 事奉不成長是你有問題,其他人都分享到經歷神的見証呀!
3. 如果教會照顧那班所謂有思考動口不動手的大頭鬼,那些爭論也解不了,只會起爭執,令傳福音這目標變得朦糊,反而令信徒同教會冇左成長既方向
4. 離教者同嘲笑者? 我那裡管他?原諒他們罷!他們不知他們作什么!

我都唔知道教會作什么,但我知道以傳福音為方向,多多事工來實踐,確實令多人自覺跟從主,結果子,見証,又是教會多年行之有效而自給自足的板斧,為何改動它又有誰改動得了它呢?



註一
道德標準呢家野隨年日改變.
比如奴隸制,今日係人都話唔好,昔日就算聖經都只係問你對佢好定唔好.
昔日男尊女卑,今日女權抬頭
今日人人反戰,昔日戰爭係種對內對外資源爭奪的解決方法之一,冇人有問題. 問題係以前打仗勝方利多於害,得地,得人,得金,會死人嘛?他們反正過左50歲都生不如死. 今日國際商業和外貿關係千絲萬縷,盤根錯節,而得左塊地既要花錢維穩,又可能掃平當地最賺錢既軟實力,根本冇著數.
除了反同,同犧牲既愛有什么道德標準是令你堅決放棄今日既普世價值以追求昔日既聖經道德標準?
不要說犧牲既愛是今天普世價值所認同和追求的呢!