周六清早, 當管++仍舊抱著幫熊 me to you 如豬如寶, 瞓到死豬時侯, billy 會起床看書, 在床頭寫 blog, 或者為 bilibala bible blog 錄音.
碎牛粥
上周 prepare 命硬的勞斯萊斯, 讀完以賽亞書第一章. 之後周日崇拜結束, 同幾個弟兄姊妹去知粥盞食粥. 叫了碗豬熊碎牛粥. 誰知佢居然忘了落豬熊. 同伙記 reconfirmed 係有落單.
管++,"算lor, 如果一個價"
billy,"唔得, 我今日一定要食豬熊."
友,"你好鐘意食豬紅?"
billy,"這倒不是. 可我早上讀以賽亞書說你們的罪雖如豬紅(如果官肯秉行公義, 民願扶助窮苦), 豬紅也能變白粥. 我想更深刻投入想像段經文. 所以一定要食豬紅粥"
管++,"人地聖經邊係果個豬紅? 應該係朱紅."
billy,"朱沙個朱嘛! 我知呀! 但我冇嘛!"
管++,"成日諗爛 gag, 讀經都係咁."
billy,"咁呢個才是我嘛! 我對人係咁, 對你對老佛爺小得係咁, 對住神更加係咁有乜問題?"
豬紅粥
豬紅, 聖經話豬係不潔, 聖經又話血係生命, 唔准食! 所以豬紅去形容罪, 形容不聽神話 ok 架喎! 問題係罪如豬紅點可以變白粥?
難道神像伙記一樣走豬紅? 又或者我放棄罪, 請晒 d豬紅俾耶穌食. 耶穌食晒d豬紅, 咪淨番碗白粥. 耶穌係猶太人, 佢唔肯啦我食又點? 我可以請佢分開d 豬紅同白粥, 分別為聖, 哈哈!
幾勁既靈意解經.
金寶湯
聖經說罪如朱紅, 必白如雪. 為加強可信性, 說雖紅如丹顏, 也必白如羊毛.
我會問乜中東有雪? anyway, 明顯這是一個顏色比對, 金寶紅白大戰(又諗到食, yummy)
究竟古時的紅有多紅, 白有多白呢? 白如羊毛, 羊毛其實唔係純白, 有班有紋有管++最愛的波點, 而且好污糟. 我有理由相信白的程度只有 mini copper pepper white. 好難白到山水豆腐咁
羊腩煲
至於紅, 中東好似用一種花的花蕊作染料, 將布匹又或者羊毛染紅. 出埃及記廿六章不就記載神吩咐以色列人用染紅的山羊皮做會幕的蓋頂么? 一但白羊皮染紅(一定唔會係用來燜羊腩的黑草羊), 就很難變返白. 要變白會好費時失事而且會對衣物有一定程度的損毀.
我想以賽亞用這比喻去表達回轉係好貼切.
傳統上我地會將"罪如朱紅, 必白如雪. 雖紅如丹顏, 也必白如羊毛"錯解做美原髮彩, 逐漸變白得, 立刻變白亦得, 得左. 美善既神, 冇得彈.
然而按上文下理, 這比喻是用在一個貧富懸殊, 官商勾結, 不關愛弱勢社群, 卻每日叫喊 god bless america, 午間新聞有茂波兄同你分享生活見証, 晚晚真情播上帝早已預備的國家, 社會和教會中. 神話呢班屬靈信徒子民當佢冇到, 叫呢班友仔回轉, 否則死定.
燜熊掌
如果這樣, 紅變白就不是講赦罪, 而是講回轉. 之所以話比喻用得貼切(佢係聖經, 唔通話佢唔貼, 講你都唔 buy), 係因為冇人會, 亦冇人肯紅變白.
白色象徵意義係聖潔, 當時讀者冇你咁純情. 白代表平凡. 白羊毛是每個正常中東家庭都有能力擁有, 但紅色的顏料卻甚珍貴. 只有富戶才會穿有顏色的衫. 好似約瑟穿了彩衣(有色人種), 他十個哥哥眼白就紅了.
因為, 正常人是希望白變紅.
那紅變白是什么?
現代版可以是說你們罪似黑熊掌, 但必變成豆腐羮
雖污糟到似一箱銀紙, 亦可變返百貓廁紙
當時讀者好似我地一樣一定會明白回轉同赦罪, 但丹顏變白雪, 朱紅變羊毛就把他們弄胡塗了.
豆腐花
叫超人用百佳變百事人人明, 百佳變百福? 佢唔會想得通, 亦唔會肯.
叫既得利益集團放手不賺, 叫班狗官保留菜園而拆高爾夫場, 叫天天感恩的波兒只補60萬地價而不發展東北. 你講乜呀?
不但如此, 叫班信徒走上街, 關心除反同以外的弱勢群體, 唔係早午晚返教會? 你又講乜?
問題係我要不是跟本唔覺有問題, 就係覺得這條所謂回轉的路太荒謬, 太冇可能.
叫我用豬紅粥既價叫碗白粥我都唔制啦!
然而神叫以賽亞先知同那班慣左咁既價值觀既人講, 你地要洗濯, 自潔, 學習行善, 尋求公平.....
你可以改邪歸正, 關鍵係你肯唔肯捨紅取白?
大部份人寧願聽是聽見卻不明白. 既有朱紅了, 誰想變返白毛? 用貴重丹顏換一杯雪水?
阿媽教落,
要俾豆腐渣既價錢, 而享受燒鵝脾既味道.
要我去知粥棧俾豬紅粥既價食白粥, 仲要逼我知足同大叫夠盞?
白痴!
Posts
No comments:
Post a Comment