尋找鬧市中的耶穌

參加完Across + Project417舉辦的 city warmer活動有感:

1) 過去對露宿者既印象和反應跟我對烏蠅既態度沒有太大分別: 他們是污糟和倒亂的代名詞. 所不同的只是: 烏蠅既 Wii Wii聲變成露宿者既一身惡臭, 趕走烏蠅既行動變成自己急急腳離開.

2) 今次, city warmer卻令我有不少改觀. 露宿者雖不至熱情, 但果份友善同對我們微少幫助既果份真誠感激, 令我發覺原來佢地同我地一樣需要人關心和幫助既人, 而唔係神憎鬼厭既烏蠅, 而且佢地都係耶穌所愛. 或者耶穌自己根本就係一個露宿者.

3) 當初有人想跟從耶穌, 耶穌就話:「狐狸有洞, 天空飛鳥有窩, 人子連枕頭被窩都冇.」去到露宿者之家(shelter), 我忽發奇想, 可能耶穌降生既飼養場(馬槽)裡面, 除牧羊人外, 亦有不少露宿者在旁, 見証住史上第一個普天同慶既日子, 為耶穌吹第一枝生曰臘燭(or 油燈), 第一個外人既抱抱, 第一個baby kiss.....係咪好sweet呢? 我過去有冇在急急腳離開露宿者既同時, 離開了耶穌既腳踪呢?

4) 提起 shelter, 呢次亦係我第一次 visit, 係果度放低食物包, 被同襪. 放低之後, 因為個背囊輕左, 即刻有種如釋重負既感覺. 我當時諗:「平時我地不停咁爭取物質需求, 興奮一剎那, 又回復平庸, give out會唔會反而令我地如釋重負?」

5) 天寒地凍, 在downtown留左幾個鐘, 在街上穿梭既我, 心情變得特別沉重: 佢地衫又少過我, 日日咁樣露宿街頭, 點樣支持啊? 呢個問題直到我行到路口, 踏在一個又一個在地上銀色金屬網既大廈暖風出口上既時侯才找到答案, 原來佢地係靠暖風口渡過寒夜. 當我踏係暖風口, 唔捨得走, 又見到前面有個露宿者之際, 聽到city hall傳來Christmas festival既演唱會music同人群吶喊聲, 果幅4D畫面係有D諷剌: 居然係同一條街上面, 有人因為無家可歸, 唔想見到嚴寒既白色聖誕; 同時有另一班人, 為慶祝白色聖誕, 有屋企都唔返. 我唔係第一類人, 但係果一刻, 我亦唔想做第二班人.

6) 係city hall附近見到二男一女, 醉酒既三位露宿者. 一個在唱聖詩, 一個語無倫次地講關於自己既故事, 最後一個流住淚, 指住自己個口, 話自己食唔到野, 好想同我地逐一握手. 我地係果度逗留左10分鐘, 咁既情境我亦忍唔住落淚. 我問Project 417既Andy, 通常遇到咁既情况, 佢會點? Andy話:「差唔多, 係時侯離開, 佢地醉酒, 你地可以stay few hours都係咁架.」平時冷淡既我, 要多D關懷; 今晚同情心好似山洪瀑發, 原來亦要節制.

7) 離開佢地之後, 有隊員問:「點解露宿者咁鐘意飲醉酒?」令我想起箴言一句話:「將烈洒比快死/心中愁苦既人飲, 令佢忘記困苦同不幸.」

8) event完左成班去成野, 叫左碗雲吞河走葱加醋. D雲吞又細粒又唔係純蝦仲乾到好似食蝦米咁, 我完全感受唔到包雲吞果位朋友既誠意. 一轉念想到剛剛探完露宿者, 忽然覺得自己其實好幸福, 食得咁picky又好似幾折福, 係時侯改一改.