逼得太緊

食完lunch會去library祈禱, 睇聖經, 睇報紙同代禱.....

最近中國內地雪暴, 雪暴既嚴重程度同影響既範圍係百年難見, 令電綱電力中斷, 以致火車服務停頓, 而停頓又令到沿海城市幾十萬要趕回家過春節既工人滯留係火車站. 呢個星期都不斷為此擺上禱告.

有一次多倫多雪暴, 我係Finch station等左3個鍾, 都等到腳軟, 更何況係果D一連日, 冇乜水冇乜得食又冇乜得去廁所既內地同胞呢? 難怪拾蚊既飯盒賣到伍十, 都可以係一分鐘之內賣清.

電視見到有好多人等到喊<<等車等到我心痛>>, 果種失落感, 果種對回家既渴慕感, 住大城市又係同一個大城市度工作既我, 點去明白一年一次, 回家千里路既心思? Billy返屋企有Local(53號B)同Express(53號E)倆條線, 果日排Local線, 當我遠遠見到53號來, 口中就不停咁喊"B", 身邊亦有唔少人同我一齊喊"B", 排53號E果邊條龍聽到我地叫, 佢地又跟住喊"E". 當架巴士行近左D, 發現架巴士係Express, 成條龍都不約而同搖頭:「Oh!!!」一聲(亦聽到有D人爆粗), 幾時先可以<<回家>>?

神既恩典係夠用, 架53號E居然停正係我面前, 開門仲洗講, 當然衝上去, 上到車果一刻真有種重生得救既感覺, 對住身邊陌生既乘客亦忽然有份同舟共濟既親切感. 望住上唔到車既人, 苦瓜面同抖震既身軀s, 群眾之中有人冷然舉高單手, 伸出中指對住我架巴士, 而巴士上既我則伸出食中兩指, 以得救/勝利手勢, 一個微笑再加招牌揮手動作做回應, 三招一氣呵成, 乾淨俐落, 在此時此刻, 大概比粗口手勢更加石破天驚, 當頭棒喝得來又不失君子風度.

「得救」既歡愉好快就消失, 寒冷天氣同擠逼既車廂令乘客分成兩黨: 保守派同開放派, 為開唔開「槍」而爭鬧, 呯!呯!呯!響個不停, 開了就會有人去關, 關了就會有人去開, 令保守派同開放派勢成水火. 相信火車上D人都係咁. 心急慢慢變成心急, 大急同小急, 只有回家先可以得到真正既釋放. 令我更明白「萬物都正在歎息, 等侯神得贖既日子來臨」果份心境. 冇水冇食冇得柯, 走走停停既火車路, 返到冇水冇電冇溫暖既家鄉過春節, 滋味會係點? 需要你代禱同捐助, Red Cross Hong Kong Donation online:

https://www.redcross.org.hk/donation/user_donation.asp?langId=2&operation_id=186