一個耶教徒的告白(4) 教會裡的七級豬症後群

好多教會調查都話，教會有八十二十的事奉困局，就是80%事奉由20%信徒負責，令到有些信徒忙到像陳到兄所言 burn out, 卻有勁多人遊手好閒，衰尐仲會無愛心地指指點點，亦有尐唔肯順服，心高氣傲，選擇做離教者(參離教者之悲歌，作者和調查委員的分析及分享).

八十工十是教會實況，問題係，點解會咁？

教會唔係一個家？每人為個家出一分力唔係好應該咩？點解會咁呢？

我發現教會出現七級豬症後群.

有冇玩過一個叫七級豬(摸鼻哥)的啤牌遊戲?
每人抽四張牌並不斷交換手上的牌，首先抽到四張完全相同牌的人摸鼻哥，然後人人要跟住摸鼻哥，最遲摸鼻哥果個係豬.

當有人係豬果陣，抽牌遊戲繼續，但其他人在過程中不能回答"豬"的問題，一答又變豬. 如此類推，每一回有一個人摸鼻哥變豬，或升做二級三級豬，同時在對話閃失間被誘成豬，直到其中一人升為七級豬，遊戲完畢.

在教會裡，牧師係果隻高級豬(無意貶之，但原本遊戲係咁叫嘛！). 自他/她以下，有五級豬傳道，四級豬執事，三級豬主日學老師，二級豬團長/領詩，同一級豬組長....同埋一班冇乜事奉，志在參與的弟兄姊妹 (Others).

以下故事唔知有冇發生係你教會，有既話，就係症後群既病徵.

上級豬不斷用諸般智慧叫人參與教會事奉.
無論對方點樣威逼利誘，軟硬兼施，你一係死都唔答嘴，或者好好操練"我祈下禱先"這門太極神武功，否則你就會升級參與更多事奉. 升左級再要降級就難，難過同女仔分手或炒去細魷，上豬會話你已經應承左神唔可以半途而廢又或者有隻看不見既手令你感到壓力，唔quit得.

問題係你本來諗住幫一兩次手，冇諗過一生一世，成個老襯，從此被困.
可惜一切已經太遲，你只有兩條路，要不邀請更多人做豬去幫輕你(但你好快發覺，你既工作量係唔會因幫手多左而少左)，要不等侯生活的巨變(結婚，生仔，轉工)令你有唔再玩落去既"合法"理由.

我唔知你點揀，但有尐人一世都學唔精，唔識say no, 又或者對上級豬的招數冇防備， 唔夠警醒禱告，以致入了迷惑，say yes i do, 自掘墳墓.

我咁講你可能會反感，亦可能會話弟兄姊妹個個係出於真心，唔好講尐既冇愛心又冇建設性的控訴.

我首先要利申: 在教會多年，我都係隻豬.
但我係隻明白遊戲規則既聰明豬，寫這分享希望大家正視問題，不致無數事奉纏身，跌入 burn out 的危機.

五種豬
我唔否認，耶教中能人輩出如天上星星，海邊的沙，九把刀一人身兼好多事奉，做得到而且從他/她口中，會告訴你如何經歷神既奇妙，佢自己好廢，佢乜都唔識，一切都係神既能力同恩典云云. 教會那80%的事工，就交託在這群不介意升級的豬仔豬女身上.

然後教會有另一群人，在這班豬仔豬女身上睇到佢地忙到死去活來，見到就唔開胃，又自問沒有這份能耐透過這樣的忙碌去分享咁多經歷神的奇妙，他們在教會是最警醒的一群，有乜事最快摸鼻哥，亦唔會受上級豬的誘惑.

教會仲有第三群人，要不真的找到自己喜歡，愛投身的事奉岡位，要不受不了上級豬的愛心攻勢，找個不吃重的岡位 (parking) 做少少，你唔好意思話佢果隻，河水不犯井水. 這是一班聰明豬，又可能被教會視為老油條的一群.

第四班人，佢曾經大發熱心咁愛主，曾經豬過，但基於某種原因，在事奉過程中唔再經歷到教會不斷宣傳的那份經歷神和生命成長，而第一群豬反而對他們要求多多指點，不斷加重 workload 又唔見得其他(第二第三群)弟兄姊妹有什么改變(你見到教會團契尐 goals / grow 年年有今日就知啦! )就出現心灰意冷 "let it go 算啦！"的 burn out 現象. 

及至他們遇到人生巨變( 結婚，生仔，轉工，失業，太病，喪親，甚至買唔到樓，個政府食屎)，忽然驚覺過去所信既信仰面對呢尐衝激竟然係如此蒼白無力，而弟兄姊妹既關心頂多係"我為你祈禱"等廢腑之言，要不就是"billy, 你可唔可以幫手....."，自己問題自己解決，命運自決(中港矛盾可以咁就好)，於是有尐信徒就變做離教者. 那些選擇留低，可能因為朋友家人，又或者雞肋棄之可惜，成了第五班人，真正的老油條，要知邊個係老油條？好簡單，你問佢乜都能講出標準答案，但從來唔講自己點睇，滑不留手那個人是也.

你認唔認同這是教會實況？
為什么教會會出現七級豬症後群，俾尐時間你諗，亦俾尐時間我寫，下次繼續.

Reference:

1. Picture from http://www.sodahead.com/fun/do-you-think-pigs-are-cute-or-ugly/question-4685928/

2. 離教者的悲歌－回應《離開教會的一些前因》

3. 大力金剛箍：「你們不可停止聚會」