眼濕濕

今早帶了小得去同麥當勞叔叔食早餐, 晨早 8點半的周六, 竟然人頭湧湧.
要排長隊買早餐, 又坐滿人, 明明加了10-20%價, 依然如此門庭若市, 真厲害.

外國去探麥當勞叔叔的朋友通常會自己倒垃圾. 這張檯居然還有垃圾, 壞的說是「前度」冇公德, 好的說是提供就業機會.

家陣叫個早晨全餐 $3.59, 冇加價, 但叫豬柳蛋 combo 反而要 $4.99, 貴 D 又冇咁好食仲要加多 8% 稅, 我當然叫早晨全餐. 自己帶野飲.

原來好多公公婆婆晨早去同麥當勞叔叔歎咖啡同歎報紙. 見到全餐廳都是公公婆婆, 又令我有點觸景生情, 想起我婆婆.
比比不喜歡食西餐, 吃小小, 但帶她去見麥當勞叔叔, 她就大食起來.

記得有次比比來加拿大, 帶她去 Quebec, 食貴到爆的法國餐, 三文魚. 但比比成碟淨了下來, 淨係食包飽同飲水飽.
我當時好唔開心, 叫比比唔洗讓俾我食, 又話比比浪費食物仲打佢手板.

事後我覺得自己太兇, 同比比講「對唔住」. 但比比居然話:「做乜講對唔住? 你錫我先叫我食多 D麻.」突然之間, 我覺得好感動, 眼濕濕咁抱住比比, 一時間不知說什么才好.

有時工作/事奉/分析得太累太失意, 祈禱時對神也很兇很粗俗, 事後也會同神講「對唔住」, 有時神亦會這樣回應, 同樣令我眼濕濕一時間不知說什么才好.

同麥當勞叔叔講完拜拜後, 返教會主日學. 一班主日學阿 sir 同 miss 玩俄羅斯輪教同玩彼此互教學. 今次輪到我教, 教提摩太前後.

原來是校長 Ryan 生日. 蕭生(牧師)買左蛋糕同他慶祝.

這也是培正 120 年校友會, 小得去了, 但我卻趕不到, 於是去了街口間菜館食.

叫了個芥蘭咸魚雞粒飯. 年紀開始大, 快退休(又發夢), 食多 D菜健康 D. 味道不錯, 勝在菜多, 但 D飯有點生冷綱.

想 到飯, 又想起婆婆. 比比好喜歡食飯, 也喜歡望著食飯和添飯的我食飯. 每次我添飯, 比比就會眉開眼笑, 因為肯食飯愛食飯的小朋友才是最乖最聽話. 而 Billy 就是比比眼中最乖最聽話的小朋友. 比比自己當然也是最乖最聽話的小朋友, 所以我成日「曖」佢.

老佛爺最憎食飯, 所以最唔聽話. 我教極她, 她也不聽話.

聖經都勸人不要只飲奶, 要食飯, 因為肯食飯愛食飯的小朋友才是最乖最聽話. 而食飯就是好好讀聖經, 認識神同佢同弟兄姊妹建立好關係.

坊間有人話食飯對身體不好, 每次我聽到都會好憤概. 其實, 身體好不好是其次, 因為肯食飯愛食飯的小朋友才是最乖最聽話.
我唔識 E, 但我知. 比比食了多年飯, 比利又食了多年飯, 所有中國人又食了多年飯, 身體比常探麥當勞叔叔的老外好得多, 冇超肥, 冇他們咁多心藏病就証明. 又有人話食飯會肥, 那為何不食飯的老外更肥? 你唔係老外但唔食飯, 可以食乜?

好掛住比比, 可惜她無法再眉開眼笑地望著食飯和添飯的我食飯 .