買樓迷思(3) 福音係乜東?

日前，金管局宣佈六百萬以下既上車盤按掲降至六成，緊接著財爺派糖的新聞.

消息一出，有人歡喜有人愁，視乎你高收入定低收入，以及上左車未 lor. (雖說首置仍可借九成，但供額對比人工既壓力測試又加高了上限，點計都難左好多.)

面對當前窮富懸殊，政府帶頭由稅基，派糖到開放就業機會都盡顯不公平. 教會唔會發聲鬧政府，要求信徒順服掌權者，又或者那些被教會支持的高官，屯地自肥，組義勇軍，自叫人包容等等.....呢尐離地既行逕，今日唔打算講.

一個買唔起樓既信徒, 返到教會會得到什么勵勉和安慰呢？

你們安慰人反叫人愁煩(伯16.2)
除了宣告世界非我家，叫人唔好貪心，要認罪，大家一齊唱回家: "將傷痛放下，因為我已經看透俗世謊話，迷失漆黑中發現主總把我念掛"， 然後真的打發人回家之外，教會還懂作什么？

就是叫某些幸福的信徒分享他們的感恩見証或者獻金後有舊錢飛埋泥呢類"叫萬事互相效力"既神奇經歷？(潛台詞: 佢好愛神所以得益處 lor，你呀？
哈哈，冇話你，人地分享自己之嘛.)

那人回家，見到乜都加，人工冇得加，什么"回家"只能像 massage 一樣令人 high 幾小時，又再墮進迷失漆黑中，等侯下一次"回家".

上述類似的安慰，是我在金融海潚期間的親身體驗. 受左足足成年幾.
那些教導同見証，講者明明係真心，冇玩針對，但卻曾令我這個金融佬背脊骨落，難頂過粗口. 當時公司唔知仲捱到幾耐，自己又坐緊艇，就沉果隻.

我至今仍然相信教會真心想建立信徒，而信徒大部份都係善良熱心誠懇地分享他的經驗盼望祝福更多人.

係我自己小心眼諗多左，還是當中出了什么問題呢？

究竟有幾多人同我一樣有這份反感? 我唔知，或者只係我，又或者有唔少，因為就算有，如果仲留在教會，未必會分享，一來冇人明，二來怕前後左右十九幾個護法撲出來，當我妖咁捉妖我.

面對貼身的社會問題/自身煩惱時，有時覺得教會唔幫好過幫，比我返來，坐低，靜下啦! 

sorry, 又到企起身唱詩既時間.
唱詩可唔可以比我係度默哀，"唱"到死老豆咁樣呀？
唔好逼我笑啦！當我笑唔出果陣

果年幾，我係度諗三樣野:

• 第一，點分享生命，才算經歷神，又冇咁易令人難堪？為什么有些分享會令人難受？難受是朋友你太儍豬？那食乜可以將你拯救？
• 第二，教會除左做道德塔里班，同用音樂和友誼麻醉蠱惑人心，令人做阿 Q之外，在理財/置業/窮富等那些題目上有什么教導呢？
• 第三，點樣自力更新，爬翻起身(for 當時我，係轉份穩陣尐既工同上返岸)

申命記話:"原 來 那 地 上 的 窮 人 永 不 斷 絕 、 所 以 我 吩 咐 你 說 、 總 要 向 你 地 上 困 苦 窮 乏 的 弟 兄 鬆 開 手 。"(15:7-11)

耶穌又話基督來到世上的作為就是叫"瞎 子 看 見 、 瘸 子 行 走 、 長 大 痲 瘋 的 潔 淨 、 聾 子 聽 見 、 死 人 復 活 、 窮 人 有 福 音 傳 給 他 們 。"(11:2-6)

神蹟我行不了，向窮人傳福音我卻曉得. 但為什么是傳福音而不是賜日用飲食呢？

清朝宣教士會開學校同醫院，上世紀清未民初二戰華人教會因時局太亂，認為傳福音緊要過社關. 家陣有些教會會兩邊各自各做，但在這段經文令我思考一個問題: 主耶穌所講的福音是什么福音呢？一個天國近了的口號? 四定律？與神和好？同佢分享一個你 deliver 唔到俾佢既幸福音？還是分享你如何幸福，釘佢上十字架？

這個福音點解有能力知道怎樣處卑賤，怎樣處豐富，或飽足或有餘或缺乏，點扭都得，又唔怕令人覺委屈?

昔曰彼拉多問耶穌，"真理係乜東東？"
真福音又係乜東東？

有時比喻勝過千言萬語，睇下呢出卡通講乜，去片！
(呢度冇大台, 自己睇自己去片)

我地會唔會好似片中既大雄？

有趣(或者更有血有肉)的是，大雄不好，可在行動上卻又似乎對多木同學有點建立, 大概福音透過我們傳開，"我們"這個福音"導體，也是如此"半泥半鐵"，混了"麥子稗子"，求主教識我地真正既福音，又時刻察清我們的本來面目，而我地....至少肯照鏡同肯跟住主走，而唔係.....你懂的.