Bilibala talk 重睇舒特拉的名單後感

Bilibala talk 鉛美人生

Bilibala fund 2015 上半年表現+下半年評估

Bilibala fund 6月下跌 -3.5%. 上半年錄得16.3%回報 (若剔除一切外匯影響).

6月跌主要因為中資股高位回落，歐美加三地亦受希臘不穩因素影響受挫.
重估2015全年，仍抱信心回報會達到23%或以上，超越 19.5%這個以巴郡為參考的投資目標應該冇問題.

縱觀上半年，組合在新屋和納稅這兩個大量花費現金流的衝擊下成績理想，部份拜中資股騰飛的鴻福，亦因去年及年初對新屋各樣開支的充分分析和計算所致. 納稅則是個去年買賣的失算，雖然最後攪惦條數，但此後要更精細部署每一交易，不能重覆錯兩次.

點都好，我認為新屋最大問題係資金流，這次管理做得比上次好太多，行有餘力，資金在需要時侯就到位(賣，upgrade，搬，買，裝修，補回電器和家俬...).
由新換舊，股轉樓，再樓轉股這三方面現金流 breakeven.
由始至終搬屋冇諗過要賺更多，只求 breakeven(註一)
我地成功了! Breakeven.
同時達到Minnie和我搬的真正目的:
增加對家的歸屬感，共同再由零開始建立設計一個家這目標(註二).
實在感恩!!
(當然今後仲有大把 renovation 可以做，不過這已經是後話了)

6月+上半年各大市場回報如下:

• S+P 500 -2.1%, +0.2% 
• TSX -3.1%,-0.5%
• FTSE100 -4.3%,-0.7%
• EURO 50 -8.0%,+9.2%
• HangSeng -7.3%,+11.2
• HK China -6.6%,+8.3%
• Shanghai -4.1%,+32.2%

Top 15 Holdings

1. Google Inc

2. Ping An Insurance

3. Tencent Holding

4. China Construction Bank

5. Tiffany + Co

6. Starbucks Corp 

7. Walts Disney Company

8. China Mobile

9. Wells Fargo

10. American Express 

11. General Electric

12. Johnson and Johnson

13. Decker Outdoor

14. Royal Dutch Shell

15. Berkshire Hathaway

Asset Mix by Region

1. USA 48.4%

2. Asia 31.5%

3. Europe 9.8%

4. Canada 10.3%

預測淺析

1. Bilibala 估計下半年美國受制加息及匯率高企影響跨國企業盈利影響，股市會持續牛皮. 開始睇好早前跌到死既零售股 Wal mart, Whole Food，Johnson and Johnson這只醫藥股，被人睇死的 Amex, 和受惠低油價的 UPS.

2. 油價低迷，對於以研發再生能源及採油技術的 GE, 西門子等公司，我相信會有一定負面影響.

3. 加拿大則因油價低，油公司業績同亞省都仍然唔會有好日子過，銀行盈利增長亦會因此及地產市道在各省停滯而進一步放慢. 仍然睇好如 TransCanada的公用股，以及 CN Railway 這隻鐵路股.

4. 中國經過暴力救市後，幾乎可以肯定會在3500-4700點左右"橫行"，仍盼望阿爺會檢討及收緊企業停牌申請以及個人孖展限額/監管. 不然，下次救市會更慘烈.

5. 有人話港股平，我會話相對A股平. 先不談中國人壽和中國平安，這雙和A股共榮共辱的孖寶，騰訊升左唔少，電訊股要開發5g, 又要再減 Arpu , 我亦唔太睇好，我覺得仍然係建設銀行相對較合理.

6. 在更長遠的將來，避開中國政局同維穩前景不談，即使今後7年習大大政權穩定不變，一個缺乏互信的社會是無法發展更強大的融資市場，造假和抄襲成性不利創新科技，唔尊重私人產權(諸如隨什么發展或政令就遷折包括毀教會)，令內需同投資無法進一步擴大(即使目前狂印銀紙，gdp增長仍在放緩中)，除了像騰訊少數吃了人口便宜(即使係抄考)又成功走出去的公司可以持續增長外，我對中國股市未來是不樂觀，不樂觀是指它永遠只能是一炒賣市場而不是一創富市場. 

銀行，保險，電訊，能源目前在享受國家既保護政策以及人口紅利(penetration)未用光的情況下，係冇問題，5年後我唔敢講.

7. 歐洲剔除了希臘的陰霾，我估下半年會唔錯. 銀行上半年已升得七七八八，醫藥股 GSK 仲未升(因之前有企業醜聞)，Burrberry 同 LVMH 因全球銷售增長不佳亦偏低.

8. 投資者唔睇好歐元，加上歐豬久唔久爆鑊找唔到數危機都會不斷壓低歐股. 正因如此，成了長期吸納優質企業股票的良機，因為不理好醜，歐股股價都是偏低. 

投資者買股唔買市(ETF)就變得更為重要.

xxxxxxxxxxxxxxxxxxxxxxxxxxxxxxx

註一
意思係搬屋期間兩間屋升值+現金流變化產生的額外收益，抵銷賣屋和搬屋的一切開支

註二
同size,同價，一樣的遠，將來新屋唔會升快過舊既，一切都 breakeven. 冇financial 原因亦冇好學校好location原因. 有，都係舉出來令大家不會過度關心而矣!
嚴格來講你可以笑我地為搬而搬 :p

2015加東海洋省遊小結

A. 行程

Day 1
Fredericton 市心遊

Halifax 晚飯 @ Edna

Day 2
Halifax 農夫市場

Pier 21 移民博物館

海濱及市心遊
水陸一小時 Hopper
巡視業務: 遊Alexander Keith 啤酒廠
晚飯 @ Bicycle Thief

Day 3
Halifax 早餐 @ Just Us
Citadel National Historic Site

Peggy's Cove 燈塔及漁村

晚飯 @ 燈塔餐廳

(飛車去 Cape Breton 留宿)

Day 4
Cape Breton Fortress of Louisbourg

午餐 @ Fortress

Highlands National Park 行沙灘

晚飯 @ Keltic Lodge

Day 5
Cape Breton Highlands National Park 行山 Skyline

晚飯 @ Mcdonald's restaurant

PEI Confederation Bridge 拍照
Charlottetown 夜遊海濱

Day 6
Souris Basin Head Fisheries Museum
海上暢遊: 深海釣魚及沙灘摸蜆

Charlottetown 夜遊 Victoria Row
晚飯 @ Claddagh Oyster House

Day 7  

Charlottetown 早餐 @ Leonard's Cafe

海濱及市心遊

150年加拿大聯邦嘉年華

B. 旅費(exc. gifts, books and others)
食 $745
住 $1,089
行 $916
玩 $458
飛 $560

總 $3,769

C. Highlights:
1. 穿越返1744年既Fortress of Louisbourg，難得佢成個地所有景所有工作人員連午餐都返回古代，有種入主題公園 feel, 但呢個逼真好多
2. Walk through Fredericton, Charlottetown 同 AK 啤酒廠又係以穿越形式進行，今次係返回 19世紀，有帶街逐間建築物/process 介紹對我地呢尐乜都唔知既當然好好多又學多好多
3. 未試過深海釣魚，近距離同海豹游水，及沙灘摸蜆，係第一次. 更難得出發前去Basin Head Fisheries Museum，對漁夫同漁業多左好多認識
4. Cape Breton 郊野公園好靚，有海，有山，有崖，有林，有沙灘，有小溪，有動物....同管++ 行山，在海灘吹海風，的確心曠神怡.

D. 如果有下次？
1. 車程太長!!
由新蘇格蘭去王子島 6粒鐘(管你坐車定坐船)，Halifax 去 Cape Breton 又6粒, 其實可以集中玩 a. 王子島 + Fundy;
b. Cape Breton;
c. Halifax +  新蘇格蘭中南部

2. 如果一定要一次玩晒三省，又只得7-10日，建議先玩紐賓士域，Fundy Bay, 再過橋去王子島，然後坐船去 Cape Breton, 玩完落番 Halifax. 

咁樣行程一來順尐，又慳左過橋錢，我冇計，日期限死，冇機去想去既地方，焗住去Fredericton先而又焗住係Charlottetown 走. 揸多幾百公里.

3. 好曬，冇用太陽油，黑左，唔芳唔炭世界

換車？

2012年買了 Mini, 三年多一尐，現在已經行了11萬公里.

唔少人話寶馬過10萬會勁多問題，咁究竟我地換新車定揸住先呢？

要衡量換車與否，有以下考量
1. 換車 vs 整車，邊個貴尐?
2. 換車(假設供)，開支幾多同幾時都是固定，整車幾多同幾時是不確定，也就是整車除了錢以外，要承受不確定的心理因素
3. 整車多，即使小毛病都煩
4. 換車係種資源浪費，即使你 trade in 舊車，而佢又能揾到住好人家
5. 平均每年揸幾多？

a. 如果每年真係2萬到2萬四公里，又有 business, 可claim expenses, lease 似乎最好.
b. 如果揸少過2萬，那么供就正，供完resell value 都唔錯，揸到11-12萬都六七年，可換可唔換，似乎也化算
c. 像我們每年揸3萬以上，resell value 低，3-4年就11-12萬公里，如果不停換車就好貴.
前兩周去了代理商那裡了解過，冇著數，所以咁既情況，都係揸到20萬以上，或當某一年整車開支完全貴過供車(12 x 月供)才換.
我認為係最化算.

煩？煩，但有借口告假，冇問題.
安全？通常有定期保養，換油換 brake 皮換軚....呢尐新車都要既野就好安全.
其他壞先整 lor，佢會亮燈 warn 你嘛！

反同的十個反思

初期教會面對當時宗教領袖逼迫時，有一位人所敬重的教法師發聲，勸一班猶太人小心處理這事.

他指出在過去歷史上曾經有人興起，最後都散去. 假如某事出於神，就會堅立，出於人，就會敗壞(徒 5:34-42)

這教法師名叫迦瑪列，是未信主之前使徒保羅的恩師.

面對越來越多國家直接或間接通過同性婚姻合法，得到和一男一女婚姻的相同法律地位，福利和權益. 令唔少基督徒不爽，感到勢風日下，道德淪亡.

即使你認為聖經立場是神不喜悅同性性行為，即使你因此反同是全對而對方是全錯，我認為，教會也應該在同性婚姻合法，甚至中小學教育內容上冷處理，小說話，多做實事:

1. 在自由戀愛的今夭，阿媽阿爸反對仔女同邊個拍拖都唔易，你認為教會站出來除了犯眾憎，令人越叫越走之外，會有人聽勸?
2. 假如你認為同性戀唔係天生，你怕乜學校教學生尊重同性戀呢？中國教小學生仇日，大個班人咪又係去日本玩，用日本貸，咪仍然覺得移民外國是好的.有尐野唔洗教亦教唔到
3. 假如你認為同性戀唔係天生，而係因為家暴等童年陰影或者感情傷害所致，那教會不是更應該關懷他們，在指責他們之先，聆聽和明白他們?
4. 耶穌不是在我們還作罪人，未認未知未改之先，就為世人死了么？羅馬書話法利賽人，你是誰？你話人有問題，自己卻又身有屎？基督淨係為你死，不也為那些未明律法的外邦人死嗎？如今我地有聖經，認為同性性行為唔岩，但我地能夠假設別人必定要按我們這標準，然後一切都照這些而行，然後你才能接納他們嗎？
5. 假如你認為同性戀係天生，你幹么怪人？按歷史統計，同性戀只佔全人口的3%，假設有另外3%是怕人言可畏而不公開，異性戀人仍佔96% 人口，人人繼續咁生下一代，但同性戀要下一代就必要付極貴代價去試管，代母代父. 只要你遵守聖經吩咐，生養眾多，而不是一個起兩個止，生到異性戀的比率會遠超同性戀. 你怕同性戀會加增是杞人憂天. 除非你不謹守生養眾多這命令，你唔好怪人，請怪自己唔夠愛主.
6. 如果同性戀父母領養，但同性戀又係天生，那你亦不用怕. 相反，你更該為同性戀父母爭取公平福利，令這世上的孤兒減少.
7. 過去什么反同遊行，令各國議會不通過什么議案，表面上看似成功，實際上令教會更犯眾憎，又令更多人同情那班教會所痛恨的同性戀者. 這又何必呢？
8. 更甚是，教會還要不理智地遷怒那班支持及同情的人. 罷飲某咖啡，罷穿某些波鞋，轉銀行等，實屬低智行為，令更多人不齒. 當人人視支持同性戀為支持自由，平等，公義時，你連這些人都容不下就係衰人. 反而當一切法案通過，你堅持自己又不反對別人，那么別人的道德高地就沒有了. 從更正面的看，教會應該在社會上為更多自由，平等，公義，仁愛事發聲和行動.
9. 人稱我們是基督徒，由安提阿開始，因為當時人開口埋口講救主講耶穌，人稱我地耶撚，卻由反同開始，因為我地除左耶穌愛你，聖經反同，就乜都唔講，乜都唔知.惡法唔知除左反同乜野政策都順服掌權，貧富懸殊付出少少植堂就叫人冇力都出盡力， 唱詩就大大聲，其他野未100%絕對清楚前就唔好出聲.
10. 假如我們如此篤信一男一女的婚姻，除了令人求女不得求仔不能的戀愛十誡，和 no sex until marriage 之外，我地只要活出精采恩愛的婚姻及家庭生活，又唔離地咁教到更多人經歷到，就拯救到好多人，假如有人堅持同性戀又在其中找到真愛，你表明聖經立場之後，就祝福他們，為他們祈禱，盼望基督的精采恩愛臨到他們一家罷！假如我們家暴和離婚率跟其他人冇分別，你遊行宣揚什么傳統家庭，有什么意義呢？只不過係攞瘀！

此爭議已有唔少人分享過許多，這只是我的想法，可能有重複，可能太樂觀，有認同，有反對，歡迎留言俾意見

護老風波(下) 老吾老以及人之老

繼護老院天台剝光長者衣服洗澡事件暴光後，在父親節期間，又有街頭惡女打阿媽片段上網.

段片令我睇到火滾之餘，係令我難以致信，怎能如此像佢這樣惡女? 當街喎！

之後發現信仰百川已經有文章講呢單野. 好同意作者話呢尐社會/家暴事件唔係一個 people need the lord, 信左福音，靠耶穌返教會就解決到既問題. 作者從群體性同社會性去分享我地基督徒容易忽略的盲點，好有提醒，在此再三推介.

但進一步去問，除左講耶穌同傳福音，我地有乜野做到？
等我接續上篇再分享多尐對Jared Diamond寫 The world until yesterday既體會同實踐.

書中有關老人問題的研究主要來自 chatper 6, 作者慣用勁多例子去支持一個論點，佢既書通常較累贅，說穿了其實是咁的:

在農業社會，平均壽命只有35-40歲，能活到一把年紀，一頭白髮，不但難能可貴，而且，在一個風調雨順才能五穀豐登的舊社會，老人家懂得睇天氣變化，廿四節氣，幾時會發生什么，要做什么，點樣做，佢講，你最好信，亦最好照做.
在這樣的社會熏陶下，老人家受敬重(而唔係被可憐)當然係天經地義.

Jared Diamond 認為，這些經驗就算去到廿一世紀的今天，仍然是寶貴，令較年輕的一代仍然感到家有一老如有一寶，即使照顧長者的精神，時間，金錢變得日益沉重.

上一篇文章發表後，Alan Lau 在面書有如此回應:

但現代社會，知識傳承已經不再由老人家負責，而分工給各種專門人士，加上現代社會變化太急速，很多技能及知識，隔一二十年可能完全不管用，老人家經營一生的技能及經歷，對新一代可能毫無作用。
不用說上年紀的老人家，就算是四五十歲的壯年，都面對這種被淘汰的壓力，更加劇了現代老人問題.

宏觀而論，我同意 Alan ，也認同這份無用感及被淘汰的壓力只會越來越厲害和年青化
(即 Alan 所說， 四五十歲就開始覺得追唔上).

但 Jared Diamond 話老人家仍可:
1. 幫兒女照顧下一代(抱孫)
2. 承傳非知識/技能性的生命質素
3. 親身經歷過的史實分享經驗之談

在google，youtube, ebook 攪惦一切又學到一切的今天，我發覺老人家(或者打算活過65歲的我們)仍然可以緊緊抓住這三方面，去延長自己的有用期. 我們亦可以助其活得多一點點尊嚴和多上半分精釆.
(當然它解決不了護老院和惡女事件當中的核心 - 長期病患對家庭，全家人的長久煎熬這問題)

1. 婆婆的照顧
小時侯父母揾食，要等埋發叔先收得工. 我是住在婆婆家，是婆婆帶大我.
那時在婆婆家，跟公公和幾個舅父s一齊生活.
每逢周末，婆婆就帶我食麥當勞早餐，下午/晚上一眾親朋表弟妹總會來訪，同我一齊玩，一齊爭電視睇. 雖然冇機打，又冇什么護毯護門，成日會仆親，兒時都在熱熱鬧鬧, 開開心心中渡過......

所以我主觀地想，今曰生B造人計劃，除了因為有上一輩幫忙照顧比請工人( in general )更有愛心同便宜，非常實際又有點市儈之外，對
於長輩的自我價值建立，年輕夫妻在教養兒女中培養出來的教導和領導力也有幫助，更重要是它更緊密地牽繫了三代的情誼，延伸了廿卅年前的兒時片段，令人對父母恩情有更深體會，而更加珍惜孝敬父母的機會，又體諒他們當年既付出.

但要做到呢個效果，我諗最好有仔趁嫩生(又一個"古代"格言)，這個"嫩"字唔單指年輕夫婦，也指未有長期病患的父母.

2. 婆婆的經驗
正如 Alan 話齋，我們現在可以 google 或 youtube，找來最勁既幾位大師做你的人生導師. 於是長輩的經驗和知識變得冇咁"吃香".

誠然，我婆婆經常講什么日本仔點衰亦無法改變我成日想再去日本旅遊同煲日劇的愛好.
她分享兒時在鄉下乜都冇，但逢過年一家人會出城買匹新布做新衫，就已經好開心. 在衫鋪多過超市，買衫又平又方便既今天，這經驗有何價值呢？
婆婆小時侯，鄉下人blog黃狗食平常不過，如何如何好味，我好難在這個人人視狗仔做仔仔囡囡的社會裡感同身受.
她和公公教我唱的山歌我到今日仍會唱不過一定唔會唱出來，將來亦一定會失傳.

不過，佢地話共產黨乜乜乜以前我當耳邊風，心想祖國都越來越好啦！97之前尐人講到咁可怕，97後咪回流！
誰知直到09-10年後我才後知後覺地感受到那份對祖國的震撼.

除此以外，記得在我還讀小學時， 某天有個媽咪和阿姨的朋友，由英國返港來婆婆家探訪，坐左一晚.
那人走後，婆婆問他是誰，媽咪和阿姨隨便答了，婆婆居然就再三忠告，"我覺得佢唔係好人，你地小心尐佢".
婆婆冇讀過書，字都唔識多個，從來唔講人是非，一家人雖然奇怪點解婆婆會咁講但都冇放在心上，因為婆婆根本說不出一個理由點解那人不好. 結果就是那個人騙了我媽咪和阿姨不少錢.

這也許是個別例子，但我從此更深信: 不聽老人言吃虧在眼前.
所以無論我覺得父母幾煩，忠告有幾廢，都會聽完諗多幾次.

除左一筆錢，一堆物業(如果擁有)我地仲有乜野有價值留俾下一代？
雨傘運動沒有成功的抗爭？
Anything but not 689這份先見之明?
SARS 的防疫意識(你愛傳，南韓似乎也不願接受呢)?
亞洲金融風暴同08海嘯？
唔好講到咁大，擇偶，結婚，打工，生b, 好多經驗都未必係書本教到我地.

可悲是有更多時侯提醒左，人亦會堅持踩入去.
勸告同俾自由佢選擇，有時真係唔易.

再想深一層，Jared Diamond 那書還有些警世的反面教材，值得我們注意的.

1. 老懵董
在農業社會，老人家係人類圖書館，佢做當家，佢大晒.
今日部份老人家只要不退下來，繼續霸住個位或者控制住資本，仍然係大晒.

在政府，在公司不是有類似程況發生嗎？
有些長輩死都唔放權又唔俾機會下一代. 也許怕他們犯大錯而禁止他們去闖去試去犯小錯.
又或者怕教識徒弟冇師父?

由於樓價太高，不少年青人三四十都要和父母同住，或者靠父幹上車. 財政權一直在父母手上以致人一直無法"長大"，乜都要聽父母支笛，會唔會又係另一類"老人"問題?

2. 死老野！
在農業社會之前，某些採集狩獵族群裡，他們會因為一個人老左冇覓食能力就整死佢，唔好累街坊

當人口老化，醫藥費日升，我地會唔會走回頭路，返到弱肉強食的"採集狩獵"社會呢?
護老院被剝光豬，惡女打阿媽，只是冰山一角的問題.
再去遠尐，在深圳河的彼岸，福利比香港差，互信度低，造假處處，人要更自私才能自保.....
十年之後，這樣的世界會點，我真係唔咁想像.

可以肯定一點:
這不是單憑 people need the lord 就能解決得了！

讀平準書後感

剛讀完"史記平準書"及其釋義一書
薄薄只97頁，兩日就讀完.

平準書是古代經濟史書，講述漢初70年的經濟政策及其對民生，社會，國力的影響.
令我了解在一個冇大數據既農業社會，如何係唔加稅既情況下，令政府財政充裕.
在國力不斷上升既同時，要不斷用兵，於是所有錢都用在維持同擴張，最後有係得個桔(雖然亦因為前後140年既興旺，令我地到今日都稱自己作漢民族，或者都係值得掛？!

總括文景時代，是無為而治，自由經濟，量化寬鬆，令百物蕭條的社會生機勃勃，但貧富懸殊到極點.
武帝時對外用兵，幾野就將70年儲下的國庫用光，利用鹽鐵，均輸，平準同緡錢四招就乜錢都番來，卻又害到國富民窮，到頭來這些計劃經濟不過是窮兵黷武，好大喜功，無功而回.

讀歷史令人以古鑑今. 但將來如何，真的可以靠望住倒後鏡去判斷前面條路係點，要開幾快，幾時轉彎幾時停，真係可以嗎？

201506 home base cell Caring 友伙心

友伙心 (song)

Bilibala fund 2015年5月表現

Bilibala fund 5月微升 +0.1%
截至今年5月29 回報 +20.53%(若剔除一切外匯影響).

5月回報遠低於預期的 +1.7%. 主要原因是Tiffany 在公佈業績後股價反彈，加上中國平安受惠上証指數創新而上揚，抵銷5月尾兩個交易日全球股市下挫的損失.
全球股市下挫主要因為希臘違約風險增加(年年都係咁喊驚)，以及美國第一季GDP調整至 -0.7% 影響所至.

市場有所謂五窮六絕七翻身一說，見全球市場5月回報亦似乎引証了這點. 但上証今年似乎有免疫，即使中央出埋口術，5月仍升3.8%.

5月各大市場回報如下:
S&P 500 +1.1%
TSX -1.4%
FTSE100 +0.3%
EURO 50 -1.2%
HangSeng -2.5%
HK China -2.3%
Shanghai +3.8%

2015年回報亮麗，已超越一年19.7%目標.
以地域劃分，bilibala 亞洲回報 28.9% 遜於上証但勝過恒指. 歐美回報 16.5%，遠勝市場.

主要原因是 bilibala 亞洲重點投放於幾間大中資企業，隨著一帶一路這概念，和滬港通，深港通的憧憬和資金湧入市場，令回報在4月狂升. 加上在去年低位換馬策略(以 $32 中國人壽換馬 $86 平安保險以及以平均 $100 中國移動換馬平均 $110騰訊控股 ) 成功令回報勝過市場. 加上組合內歐洲金融及醫藥股上揚，能源股去年高位沽出在第四季及今年第一季趁低吸納，額外賺多一筆. 

唯組合內兩大巨頭 Google 及 Tiffany 都無什貢獻，Decker Outdoor 和 AMEX 大跌抵銷了部份收益.

2015年各大市場回報如下:
S&P 500 +2.4%
TSX +2.6%
FTSE100 +6.4%
EURO 50 +13.9%
HangSeng +16.2%
HK China +17.7%
Shanghai +42.6%

若問後市點睇，我通常冇答案，又或者經常做 lulu 燈神，所以比較愛從估值評估繼續持有，增持還是別的.

亞洲方面，短期升得太急太多，會繼續 hold 但唔會再加.
油價升番到$60一桶，可以再跌番落去，但我估55-65個位暫時對所有人石油既得利益者都最有利，會維持一段長時間，或者唔會上番75. 所以又係 hold 住唔會加.

從價值角度
美股我睇好 AMEX, 80以下真係超值. 雖然好多地方唔用得，客戶群比 VISA master 細多，但一條龍服務好，客戶平均消費力比對手高太多，相信一定會升番

加股我仍選 CN Railway. 之前分享過點解了

中港股方面，乜都升，我開始以淨餘現金收集一些防守性核心業務在香港的企業 ie 香港煤氣，中華電力，恒隆地產，領匯......

1-5月搬屋，裝修，家俬，交稅，嚴重打擊現金流，往後下半年，估計現金流會催向穩定. 不會再為 bilibala 基金帶來壓刀.

Top 15 Holdings
1. Google Inc
2. Ping An Insurance
3. Tencent Holding
4. China Construction Bank
5. Tiffany + Co
6. Starbucks Corp
7. Walts Disney Company
8. China Mobile
9. Wells Fargo
10. American Express 
11. General Electric
12. Johnson and Johnson
13. Royal Dutch Shell
14. Decker Outdoor
15. Berkshire Hathaway

Asset Mix by Region
1. USA 46.4%
2. Asia 32.7%
3. Europe 10.9%
4. Canada 10.0%